20-03-017 

گوستی ایں ماہ ھِند آ خلائی سائینس اۓ شعبہ آ خاصیں دیم روی کھُزا۔انڈین سپیس ریسرچ آرگنائیزیشن اسرو آ یک پھجی آ ۱۰۴ سیتیلائیت مدار آ اِلغ اۓ کار کھُذا او گوستی ایں ریکارڈ آ بھورینتھئی ہماں وخت ۲۰۱۴ آ یک روسی راکت اۓ مدد آژ یک پھجی آ ۳۷ سیتیلائیت خلا آ دیم داسی آ شُزغٓۓ ساں ۔اۓ ھِند اۓ اسپیس کمیونیٹی او مُچھیں مُلک آپا یک مزن ایں سوب مندی اسا۔ھِند اۓ سروزیر واجہ نریندر مودی آ دی سائینس زانتکار آنی وشادگی کھزؤ گوشتغۓ سا کہ ،ھِندوستان وتی سائینس زانتکار آنر سلام کھنت،ہمینگا کھنغ ہمیں خاطرہ ممکن بیسا کہ یک سیتلائیت آ اِلسؤ باقی مُچھین سیتلائیت نینو سیتلائیت تیکنیک آژ لیس اساں ہماں ہاں نی وزن دہ کیلو یعنی ۲۰ پاؤند آژ گیش نیا۔اے مُچھیں سیتلائیت امریکہ اۓ اساں ۔آنہانژ چھڑوئی آ دو ھِندوستان اۓ باقی یک یک قزاقستان ،اسرائیل،نیدر لینڈ، سوئیٹزر لیند،او متحدہ عرب امارات اۓ اساں ۔چھڑوئی آ یک سیتلائیت نینو اسٹیٹ نیا ،آں اِسرو اۓ اسا،ہمائی آ کہ عکس او نقشہ خط آنی آپا نمونہ کھُزی آ شُزا۔آنہی وزن ۱۵۰۰ پاؤنڈ آژ گیش ایں۔اے راستی آ یک مزن ایں کارنامہ اسا۔وش نصیوی آگو مُچھیں سیتلائیت آنر سوب مندی آگو مدار آ دیم داسی آ شُذا۔مگن اے ھِچھ اولی ایں موقع نیا کہ اِسرو آ جہانی ایں سطح چکا ہمیختر مزایں پزیرائی مِلسغۓ سا۔۲۰۱۴ آ دی مارس مِشن اۓ روگا یک سیتلائیت دیم داسی آ شُزغۓ سا ۔ھِند ،امریکہ،روس،او یورپین اسپیس ایجنسی آ پھدا اے چھیارمی مُلک اسا ہمائی آ ہمیں کارنامہ کھُزغۓ سا۔او آں دی اولی ایں کوشش آ ۔ناسا آ ۲۰۱۳ آ اسپیس مِشن اۓ روگا ہماں کہ سیتلائیت دیم داسغۓ سا آنہی بھا ۶۷۱ ملین امریکی ڈالر اسا۔درگتہ کہ ھِند آ ہمیں کار باز کھمیں لاگت آ کھُزا یعنی چھڑوئی آ ۷۳ امریکی ملین ڈالر ۔۲۰۰۸ آ ہمیں ڈؤل اۓ یک کوشش کھزی آ شُزغۓ سا او یک دوہمی سیتلائیت دی مارس آ چکا دیم داسی آ شُزغۓ سا۔نی ہمیں کوشش کھُزی آ روغیں کہ یک سیتلائیت وینس آ دیم داسی آ رؤ۔اِسرو وتی سیتلائیت آ گیش دھار دار کھنغ اۓ کوشش لافا مان ایں ۔ایم او ایم،گِرغ آ پا ہمائی آ پی ایس ایل وی چکا لانچ کھُزی آ شُزغۓ سا مریخ چکا دیم دۓ اغ آپا آربیٹر آ ڈغار اۓ نذیخ چھی اے گیش چکر جھنغی اسا تاکہ اے گیش بُڑزا تکا پُجھِس بی او ڈگار اۓ چھِکغ اۓ طاغت آژ محفوظ رہی۔کرائیو جینک انجن اۓ مدد آژ توانائی اۓ مسلہ حل بیس بی۔۱۰۴ سیتلائیت اِلغ آ پھدا ہی اِسرو آ وتی آخیری گراؤنڈ تیست اۓ کار پورا کھزغۓ سا،ہمائی مدد آژ ایندھن اۓ حد آ کھمیں کھنغ آ مدد بی۔آنہی آژ راکت آ گیش قوت مِلی ۔نی ہماں کہ سیتلائیت کار کھنغاں آں ٹی وی براڈکاسٹنگ،ٹیلی کمیونیکیشن،ہوم لینڈ سیکیورتی،ایبن پلاننگ ،ریل اسٹٖیٹ ،آ استعمال کھُزی آ روغین ۔مروشی ھِند اۓ ہمیں یک مزاایں ضرورت ایں ۔