نواب اکبر شہباز خان بُگٹی

بلوچ آنی عظیم سروک سردار نواب اکبر شہباز خان بُگٹی ۱۲ جولائی ۱۹۲۷ آ نواب مھراب خان بُگٹی اۓ لوغ آ بلوچستان اۓ ضلع  ڈیرہ بُگٹی اۓ نزیخ یک گاؤں بارکھان آ پیدا بیسغۓ سا ۔نواب اکبر بُگتی آ وتی بنگیج اۓ پڑھیائی کراچی اۓ یک گرائیمر اسکول آ کھُزئی پھدا اعلی تعلیم آپا آکسفورڈ یونیورسٹی شُزا ۔وتی پھِز اۓ مِرغ آ پھدا آں ۱۹۴۶ آ وتی قبیلہ اۓ ۱۹ اومی سردار بیسا۔۱۹۴۹ آ آنہی آ سرکار اۓ خاصیں اجازت آگو پاکستان سول سروس اکیدمی آژ، پی اے ایس ،سی ایس ایس ،اۓ امتحان دۓ اغ آ بغیر تربیت گِتا۔پھدا آں سِندھ او بلوچستان اۓ شاہی جرگہ اۓ باسک نامزد بیسا ۔۱۹۵۱ آ بلوچستان اۓ مُشیر مقرر بیسا۔آں ۱۹۵۸ آ وزیر مملکت اۓ ڈؤل چکا وفاقی کابینہ آ اوار بیسا،۱۹۶۰ آ آں نیشنل عوامی پارٹی آ اوار بیسا ہماں وخت عطا اللہ مینگل بلوچستان اۓ وزیر اعلی بیسا تہ نواب بُگٹی اۓ نیشنل عوامی پارٹی اۓ سروکی آژ ناوشی پیدا بیسا ،۱۹۷۳ آ ہماں وخت ذوالفقارعلی بھٹو آ نیشنل عوامی پارٹی اۓ سرکار آ برخاست کھُذا تہ اکبر بُگتی آ صوبہ اۓ گورنر مقرر کھُزی آ شُزا آں دھ ماھ تکا گورنر رہسا مگن پھدا ذوالفقار علی بھٹو آگو ناوشی اۓ سبب آژ استعفی خط داسئی ۔۱۹۷۰ آ آں ایر مارشل اصغر خان اۓ سروکی آ قائیم تحریک استقلال آ اوار بیسا ۔۱۹۸۸ آ اکبر بُگٹی بلوچستان اۓ صوبائی اسمبلی اۓ باسک گچین بیسا ۔فروری ۱۹۸۹ آژ اگست ۱۹۹۰ تک آ بلوچستان اۓ گچین بیسغیں وزیر اعلی رہسا ،۱۹۹۳ اۓ عامین گچین کاری آ آں ڈیرہ بُگٹی آژ وتی نوخیں جماعت جمہوری وطن پارٹی اۓ قؤمی اسمبلی اۓ باسک گچین بیسا ۔نواب اکبر خان بُگتی اۓ کوہلو اۓ مری قبیلہ آگو سیال داری اسا ،واجہ اکبر بُگٹی یک دلیر سردار اسا آنہی آ ہر وخت آ وتی بلوچ اُمت اۓ حق آنی آپا آواز کھڑو کھُزا آں یک عظیم سیاست زانتکار اسا ۔اکبر بُگٹی اۓ سۓ لوغی او ۱۳ چُکھ آں شش بچھ ہماں ہاں نی نام آں ،نواب سلیم،نواب تلال،نواب ریحان ،نواب سلال،نواب جمیل،نواب شہزوار،او ہپت جِنکھ آں ہماں ہاں نی نام آں بانکھ نیلوفر،بانکھ نازی،بانکھ دردانہ،بانکھ درین،بانکھ شہناز،او بانکھ فرح ناز۔اے ویلا آں عظیم سروک مۓ نیاما نعیں گُڈا دی آنہی اُمت ،مچھیں بلوچ قؤم ھِچھ وخت آ دی آنہی آر شمُشتھ نہ کھناں ۔آں وتی مخلوق اۓ دل آنی اندرا مروشی دی زیندغ ایں آنہی مثال یک اینگے درشک واجھا ایں ہمائی آ وتی مخلوق آر یَدرساڑتھیں سا داسا ،آنہی ہمیں دروغی ایں جہان آژ روغ آگو آنہی مخلوق چھورو بیسؤ شُزا ،ہر واجھا یک اۓ چھت درٹغ آگو ہموزا نِندوخ ہؤر،گرم ایں لُوار رزغ اندرا کھایاں رواں اصل ہمیں واجھا آنہی مخلوق اۓ سغر آژ ہمیں چھت اۓ پھُل جی اغ آگو آں دی چھورو بیسغاں ،اینگے عظیم مڑدُم صدی آنی نیاما یہ دھک آ پیدا بی آں او ہمیں جہان اندرا آتکؤ دوہمی آنی آپا بھَلائی اۓ کار کھناں رواں ۔