19-05-017

ضروری نعیں کہ دو مُلک آنی نیاما سیال داری وشتر ہی بی ،ردین دی بیس بی مگن مُچھیں انصاف پسند مُلک ہمیں ٹؤک اۓ خیال ایر کھناں کہ نیامغی ایں سیال داری آ ناوشی اۓ اثر انصاف اۓ نظام چکا نوی۔اگر کھسے ڈوہی سزا اۓ لائیق ایں تہ آنہی آ سزا داسی آ برؤ مگن ہماں کہ بے ڈوہ ایں آنہی آ ہمیں خاطرہ  سزا دۓ اغ نع لوٹھی کہ آں دژمن مُلک اۓ شہری ایں مگن کلبھوشن جادھو اۓ مسلہ آ پاکستان آ بی اغ والا مُچھیں پؤجی عدالت آنی کاروائی آژ اے اٹکل بی کہ آنہی آ مُلزم نہ،مُجرم پوہ بی سی آ شُزا او آنہی مُناسبت آژ عدالتی کاروائی عمل آ آختا مگن نی ہیگ آ واقع بین الاقوامی عدالت انصاف آ پدھر ایں لفظ آ اے فیصلہ اُش کھنائینتھا کہ پاکستان،عدالت اۓ حتمی فیصلہ اُش کھنائینغ تکا کلبھوشن جادھو آ پھانسی اۓ سزا داس نہ کھنت۔جادھو آ پورا ایں قانونی واہریائی مِلغ لوٹھی ۔ہمیں فیصلہ آژ اے ٹؤک ثابت بی کہ بین الاقوامی عدالت انصاف آ ھِند اۓ ہمیں موقف آ منسا کہ کلبھوشن جادھو آ قانونی مدد دۓ اغ آ بغیر سزا دۓ اغ نویس بی۔عدالت اۓ ہمیں فیصلہ ھِند اۓ سفارتی سوب مندی ایں ۔ھِند بحریہ اۓ پیسر اۓ افسر کلبھوشن جادھو آ پاکستان آ ھِند اۓ جاسوس منسؤ دستگیر کھُزغۓ سا ۔آنہی چکا کے ای اِلزام جھزی آ شُزغۓ ساں ۔آنہی آ پھدا آنہی چکا پاکستان اۓ پؤجی عدالت اۓ وٹاژ مقدمہ جُزینتھی آ شُزا او آنہی آ پھانسی اۓ سزا اآش کھنائینتھی آ شُزا۔اے حیرانی اۓ ٹؤک انت کہ پاکستان میڈیا آ جادھو اۓ دستگیری اۓ خبر آئیغ اۓ ۲۲ روش پھدا ھِند آ ہمیں ٹؤک اۓ خبر داسی آشُزا ۔پاکستان آژ پھول کھنغ لوٹھی کہ ہمیں دیری اۓ چھے سبب ایں ۔پاکستان آ درج کھزی ایں ایف آئی آر آ کلبھوشن جادھو آ ھِند اۓ تہ ڈسسی آ شُزا مگن ھِند ہائی کمیشن اۓ حاکم آنر آنہی آگو مِلغ اۓ اِجازت نہ داسی آ شُزا او نہ ہی آنہی اۓ خلاف ھِچھ ثبوت ھِند آ پھیدھارتھی آ شُزا ۔پاک سرکار آ جہانی ایں براسی آ اے ڈسغ لوٹھی کہ ھِند ہائی کمیشن اۓ حاکم آنر کلبھوشن جادھو آگو مِلغ اۓ اِجازت پھرچھے نہ داسی آ شُزا ۔چھے پاکستان اۓ سرکار تھڑسغۓ سا کہ اگر ھِند ہائی کمیشن اۓ حاکم آنی جادھو آگو بیٹھک کھنائینتھی آ شُزا تہ آں انصاف اۓ نام چکا عدالتی کاروائی اۓ ڈرامہ کھُز نہ کھنت؟ او گُڈا آنہی آ پھانسی اۓ سزا داسؤ آں اے ثابت کھُز نہ کھنت کہ بلوچستان اۓ حالت آنی ردینی اۓ سبب ھِند ایں ،آں وا نہ؟ھِند آ راست ڈؤل چکا گُشتا کہ اگر جادھو آ پھانسی داسی آ شُزا تہ اے جنگی ڈوہ اۓ بروبر منسی آ رؤ ہمیں خاطرہ پاکستان آ وتی اَنا آ اِلغ لوتھی ،ورنہ مراشی تک دھشت گردی اۓ حوالہ آژ پاکستان بدنام رہسا او اگر جادھو اۓ سزا چکا عمل بیسا تہ آں سرا آپا بدنام بی رؤکہ ھِند دژمنی آ آنہی آ کلبھوشن جادھو ڈؤل اۓ بے ڈوہ مڑدُم آ پھانسی داسا۔