17-07-017

سال آنژ پاکستانی پؤج آ ھِند اۓ خلاف در پردہ مِڑائی شروع کھُزؤ ایر کھُزا ۔ھِند آگو باز مڑائی کھنغ او ہماں مڑائی آ ناسوبی آ دیما کھنغ آ پھدا آنہی آ اے انوکھہ ایں طریقہ ایجاد کھُزا کہ دھشت گرد گروہ آنی تربیت کھُزؤ ھِند اۓ خلاف تشدد آپا ھِند اۓ جِتا جاگاہ آ دیم داسی آ برؤ۔آنہی آ پنجاب آ دی ہمیں لیو کھُزا او گوستی ایں ۳۰ سال آنژ کشمیر آ بروبر تخریب کاری او دھشت گردی آ ودھینغیں ۔لائین آف کنٹرول چکا پاکستانی پؤج بروبر تشدد اۓ عمل کھنغیں ہمائی آ آچ بندی اۓ خلاف ورزی آژ گِتؤ مڑوک آنی مان پوت رگ اوار ایں ،ہمیں دھشت گرد آنر پاکستانی پؤج اۓ دست رکھیائی ایں ایزا مارا پاکستان اۓ نام نہ گِتا بلکہ پاکستانی پؤج آ ہمیں مُچھیں ٹؤک آنی زمہ وار منسا پھرچھے کہ اے ٹؤک مُچھیں پاکستان او جہان زانی کہ پاکستان اۓ ڈن اۓ پالیسی ہموزا اۓ عوامی نمائیندغ نہ بلکہ پؤجی جنرل طۓ کھناں او ہماں دھشت گرد آنر وتی آلہ کار اۓ ڈؤل چکا استعمال کھناں ۔پاکستان اۓ دست رکھیائی آگو ہمین دھشت گرد چھڑوئی آ کشمیر آ ہی نہ بلکہ ھِند اۓ جِتا جِتا جاگاہ آ تشدد کھنغ اۓ کوشش کھنگاں ۔او ہمیں مُچھیں عمل آنی اندرا پاکستان اۓ پؤج او آنہی خفیہ ایجینسی آنی واہریائی آنہار مِلسی ایں ۔۲۰۰۸ آ ممبئی چکا ہماں کہ ھِلگر بیسغۓ سا آں دی آنہاں نی عمل اسا۔نی چند سال آنژ پاکستانی پؤج ہمیں لیو افغانستان آ کھنغیں۔ہموزا اۓ گچین بیسغین سرکار آ بھورینغ آپا افغان طالبان او حقانی نیٹ ورک آ استعمال کھنغیں ہماں ہاں نی اڈہ پاکستان اندرا آں ۔اصل آ پاکستانی پؤج او ایجنسی آنی کار ہی ہمسائیگ مُلک آنر نقصان پُجھینغ او ہموزا تخریب کاری ودھینغ ایں ۔مگن دھشت گردی آ ہمیختر گیش ودھینغ اۓ نتیجہ آ نی وا پاکستان دھشت گرد آنی ذد آ آختا او کھاۓ روش ہمازا دھشت گردی اۓ ھِلگر بی آں ۔اے دھشت گرد ہماں آں ہماں ہانر کہ یک روش پاکستان اۓ پؤج او ایجنسی آ تربیت داسغۓ سا ،نی آنہاں نی چکا قابو کھنغ آنہی دست آژ درا بیسا ۔او آنہی آ گھبرائیبتھؤ وتی ناسوبی آ دوہمی مُلک آنی سغر چکا ماکھنغ شروع کھُزا او نی ایں روش آں پاکستان اۓ جوائینٹ چیف آف اسٹاف کمیتی اۓ چئیر مین جنرل زُبیر محمود حیات آ ھِند اۓ خلاف اے الزام جھزا کہ ھِند اۓ ایجنسی پاکستان آ غیر مُستحکم کھنغ آپا دھشت گردی آ ودھینغیں ۔جنرل حیات آ گوشتا کہ را  بلوچستان آ بد امنی ودھینغ آ لوٹھغیں او چین پاکستان اقتصادی ایں دگ ڈؤل اۓ پروجیکٹ آنر نقصان پُجھینغ آ باڑہ ایں ۔ھِند اۓ وٹاژ ہمیں ہی گُشغ بیس بی کہ ہمسائیگ  مُلک آنر مستحکم نہ بلکہ مضبوط  گِندغ آنہی پالیسی اۓ بُنشت ایں او کھسے اۓ اقتصادی ترقی آ نُقصان پُجھینغ آنہی کار کھدیں دی نویس بی۔