13-08-017 

پاکستان آ روش پروش حالت ردین بی غیں ۔ہمسائیگ مُلک آنر اے اُمیت اسا کہ پاکستان آ جمہوری مضبوطی اۓ حالت آ مُچھیں دمغ آ امن و سلامتی قائیم بی ،مگن ہموزا یک طبقہ اینگے ایں ہماں کہ جمہوریت آ نہ لوٹھاں ۔پیسر اۓ سر وزیر نواز شریف آ سروکی آژ ہٹائینغ آنہی نی ایں مثال ایں ۔آنگا تہ پاکستان اۓ تاریخ ہمینگے دپ آنژ پھُر ایں ہماں وخت پؤج آ جمہوری ڈؤل آگو گچین بیسغیں سرکار آ سروکی آژ بے دخل کھُزؤ آنہی چکا قوضہ کھُزا۔نی ایں دپ آژ آں چھی اے جِتا نیاہ پھیزاغیں او مسلہ گیش ردین بیسا۔سر وزیر نواز شریف اۓ بے دخلی آ پدھر ایں ڈؤل آگو پؤج اۓ دست نیاہ نیاۓ ،مگن اصلیت اِش انت کہ پؤج او عدالت آ مِلسؤ ہمیں کار کھُزا۔پاکستان آ سیاسی زانتکار ،حوال کار مڑدم آنی ہمیں ویچار ایں ۔پاکستان آ جمہوریت ،حکمرانی او سرکاری پالیسی آنی چکا دھیان دۓ اغ والا یک آزاد سوچ والا ایں یک ادارہ پاکستان انسٹی ٹیوٹ آف لیجس لیٹو ڈیولپمنٹ اینڈ ٹرانسپرینسی پلڈیٹ یعنی (پی آئی ایل ڈی اے ٹی) آ وتی رپورٹ آ دعوی کھُزا کہ پاکستان اۓ سویلین او پؤجی حاکم آنی نیاما ہر شۓ راست نعیں ۔چھیار شمبھے اۓ روش جاری بی اغ والا ہمیں رپورٹ آ پنامہ پیپرز مسلہ آ پیسر اۓ سر وزیر نواز شریف آ نا اہل منغ چکا دھیان داسی آ شُزا او اے پیش گوئی کھُزی آ شُزا کہ آئیغ والا ایں روش آنی اندرا سویلین او پؤجی حاکم آنی نیاما سیال داری ردین بی ۔رپورٹ آ گوشتی آ شُزا کہ بین الاقوامی حوال کار آں دی ہمیں تاثر رہسا کہ نواز شریف اۓ خلاف کاروائی اۓ اصل ایں سبب بد عنوانی نیا۔آنہی آ  ھِند او افغانستان آپا مصالحانہ سلوخ اپنائینتھا او مبینہ ڈؤل چکا اے مُطالبہ کھُزغۓ سا کہ پاکستان اۓ خفیہ ایجنسی آئی ایس آئی مڑوک ایں گروہ آنر ہمسائیگ ملک آنی خلاف آلہ کار اۓ ڈؤل چکا استعمال کھنغ بند کھنت ۔ہمیں وجہ ایں کہ آنہی آ سروکی آژ ہٹائینتھی آ شُزا ۔ہمینگے کے ای موقع آختغاں ہماں وخت باز حلقہ آں اے محسوس کھُزا کہ ھِند پھجی آ دیگر ہمسائیگ مُلک آنی پھجی آ پاکستان اۓ سیال داری وشتر بی غیں ،مگن ہماں وخت ھِچھ نہ ھِچھ مزن ایں دپ بیسا۔ھِند آ اُڑی او پٹھان کوٹ آ بیسغیں ھِلگر آنہی ثبوت ایں ۔ھِند اۓ سر وزیر نریندر مودی آ دی دوایں مُلک آنی نیاما سیال داری آ وشتر کھنغ اۓ باز کوشش کھُزا۔آنہی آ وتی حلف گِرغ اۓ تقریب آ نواز شریف آ دعوت داسا او پاکستان اۓ دؤرہ دی کھُزئی ۔ہمیں وڑ اۓ مِزمان نوازی او میزبانی آ پھدا تی دُژمن دی دوست بی رؤ مگن ھِچھ شۓ تہ اینگے ضرور ایں ہماں کہ ھِند اۓ پھجی آ وشتر سیال داری آ دارغیں ۔پاکستان اۓ ڈن اۓ پالیسی آ سویلین سرکار اۓ ھِچھ کردار نیاہ نیاۓ ۔ہموزا اۓ پؤج پالیسی ٹھائینی او آنہی چکا سرکار آ عمل کھنغی بی ۔نی پؤج سروکی چکا سدھائی آ قوضہ کھنغ اۓ بجاۓ بالواسطہ ڈؤل چکا مُلک چکا حکومت کھنغ لوٹھغیں ۔نواز شریف اۓ سروکی آژ ہٹغ پاکستان آ نوخیں ڈؤل اۓ سرکار اۓ بُنگیج ایں ہماں کہ باور آگو پاکستان ،ہمیں دمغ او مُچھیں جہان آپا فِکر اۓ باعث ایں۔