12-10-17

امریکہ اے ہمیں شکایت پاکستان آژ یک مزن ایں عرصہ آژ رہسا کہ آں حقانی نیٹ ورک او طالبان اۓ خلاف کاروائی نہ کھنغیں ۔ٹرمپ آژ پیسر اۓ امریکہ اۓ سرکار آ دی مُچھیں کوشش کھُزا کہ پاکستان اۓ وٹاژ اینگے گام زیرغ لوٹھاں کہ ہمائی روگا ہمیں دھشت گرد ٹلہ آنی عمل آنر دارغ بیس بی۔پاکستان آ وعدہ دی کھُزا مگن ھِچھ دی وعدہ پھیلو نہ کھُزئی ۔امریکہ آ وتی ڈؤل چکا مُچھیں زانتکاری جوڑ کھُزؤ اوسامہ بِن لادِن اۓ خلاف ایبٹ آباد آ کاروائی کھُزغۓ سا ،ہماں کہ ہمیں ٹؤک اۓ ثبوت اسا کہ پاکستان آ دھشت گردی اۓ حوالہ آژ وتی باور گار کھُزغۓ سا۔ہمیں ٹلہ آنی عمل آنی سبب آژ نہ چھڑوئی آ افغانستان اۓ شہری او ہموزا اۓ سیکیورتی پؤجی آنر نشانہ کھُزی آ رؤغۓ سا بلکہ افغانستان آ تعینات امریکہ اۓ سروکی والا پؤجی خاص ڈؤل آگو آنہاں نی ذد آ پھیزاغۓ ساں ۔پدھر ایں آنہی آژ نہ چھڑوئی آ امریکہ ناوش اسا بلکہ فرسٹریشن اۓ شکار دی بیسغۓ سا ۔پاکستان ہمیں مڑائی آ بہر حال امریکہ اۓ سنگت اسا ہمیں خاطرہ آں راست ایں ڈؤل آگو پاکستان آژ واہریائی اۓ اُمیت کھنغۓ سا ۔مگن آنہی آ بروبر دھوکہ داسی آ شُزا ۔امریکہ اۓ پیسر اۓ واگ پھگ جوائینٹ چیف آف اسٹاف ایڈمرل مائیک ملن آ ۲۰۱۱ آ ہی یک سماعت اۓ نیاما امریکی قانون ساز آنر ڈسسغۓ سا کہ حقانی نیٹ ورک اصل آ پاکستان اۓ خفیہ ایجنسی آئی ایس آئی اۓ دست رکھیائی آگو کار کھنغیں ۔ نی اگر پاکستان اۓ جائیزہ گِتی آ برؤ تہ یک ٹؤک بلکل پدھر ایں کہ حقانی نیٹ ورک او طالبان اۓ ،پاکستان اۓ پؤج او آئی ایس آئی آگو مضبوط سیال داری ایں آنہی آژ سویلین سرکار اۓ ھِچھ گرغی دۓ غی نعیں ۔پھرچھے کہ راولپنڈی آ واقع پاکستانی پؤج اۓ ھیڈ کوارٹر وتی ڈن اۓ پالیسی وا ٹھائینی ۔آنہی آ اسلام آباد اۓ سویلین سرکار اۓ پالیسی آگو ھِچھ مطلو نعیں ۔اے ہماں بُنیاتی ایں وجہ ایں ہمائی سبب آژ پاکستان اۓ سرکار امریکہ آژ کھُزی ایں عودہ کھدیں دی پھیلو کھُز نہ کھنت۔ڈونلڈ ٹرمپ اۓ صدر بی اغ آ پھدا پاکستان اۓ تعلق آژ امریکہ آ چھی اے سخت پالیسی اپنائینتھا او آں لوٹھی کہ ہر حالت آ پاکستان آ لاچار کھُزی آ برؤ کہ آں افغانستان آ تباہی کھنغ والا ٹلہ آنر قابو کھنت۔مگن امریکہ اے دی محسوس کھنت کہ اے سویلین سرکار اۓ دست آژ درا ایں ہمیں خاطرہ آنہی آپا سدھائی آ پؤج او ایجنسی آنر لاچار کھنغی بی ۔زانتکار آنی ویچار ایں کہ امریکہ نی پاکستان آژ ہماں کہ مُطالبہ کھنغ والا ایں آں مُطالبہ ہموزا اۓ سرکار آژ نہ بلکہ آئی ایس آئی آژ بی۔آں اے لوٹھی کہ آئی ایس آئی حقانی نیٹ ورک او طالبان اۓ بارو آ ضروری زانتکاری دا مثال آ آنہاں نی عمل آنی تفصیل ڈسی اسلحہ او فنڈ مِلغ اۓ آنہاں نی زریع چھے آں او آنہاں نی خاصیں اڈہ تھان ہندا آں ۔نی گِندغی اِش انت کہ وا وتی سرکار آ عمل آ نہ آرغ والا پاکستانی پؤج او آنہی ایجنسی ،امریکہ اۓ ٹؤک منی یا نہ او دھشت گرد آنگو وتی سیال داری بھورینی یا نہ ؟ او اگر نہ تہ گُڈا آنہی نتیجہ چھے بی ۔ہمیں پُرس اۓ سوج افغانستان او ہمیں مُچھیں دمغ اۓ محافظت آگو جُڑسی ایں ۔