12-01-2018

پاکستانئ ریکارڈ تھانکا شہ دھشت گردیی و مذھبین انتھاپسندیئ وجا خراب نہ انت بلکہ آدنا مذھبین اقلیتئ استمان گون وڑ وڑئ سَکیان دیم پہ دیم انت کہ بیان کرتگ نہ بنت۔ ھر مردمئ اگہ بیت و ھر گجام مُلکئ باشندہ بیت آیی مذھبین عقیدہ ساتتنئ حک بہ بین الاکوامین پیمانا تسلیم داتگ بوتگیت۔ مگہ پاکستانئ تھا ھر وھدہ گون اقلیتین مذھبانی مردمان بد رویہ بیت۔ بہ آوانی عبادتگاھانی سرا ھلگر بیت۔ ھندوئین بانوک جیئنتگ بنت و جبرین وڑئ آوان مسلمان کننت و بیدئ آوانی رضا آوانی عاروسا گون یک مسلمانئ کننت۔ عامین وڑئ ھما مردمئ کہ آوانا جیئننت گون آوان عاروسی کننت۔ ای وڑئ رپوٹ بری روچان بہ برزین کچانہ پاکستانئ ھالانی تھا اوشکینتگ بنت۔ سرئ اقلیتین تنظیمان پاکستانئ بنیادمین حکانی کمشن ھم ای دپ دیگانای ھالانا گپتگیت و حتئ یک احتجاجئ ھم درج کرتگیت۔ پھدا ھم بہ دین و کانونئ وجانی پھدا اقلیت گیشتر نشان گپتگ بنت۔ اگہ یک مردمئ حلاپا تھانکا افوا بیت ھم و دروگین وڑئ جار جتگ بیت کہ آ بہ مذھبئ دیما گجام گستاخی کرتگیت بیدئ گجام کانونین پٹ و پولئ آ ھجومین تشددئ شکار بیت۔
 
ای وڑئ چُنتی دپ دیگ تسر بوتگنت، ھمی راز بہ یک دپ دیگئ تھا اگہ بہ یک عیسوین فرقہ یک مردمئ سرا گجام الزامئ جتگ بوت گڈان بہ یک عیسوین بستی یا الکانی سرا گندگین وڑئ حملہ بوت۔ زندگین وڑئ آچ جنگئ دپ دیگانی ھال ھم ھر وھدہ اوشکینتگ بنت۔ مختصرین وڑئ اگہ گشتگ بیت پاکستانئ مُچین مذھبین اقلیت ھر وھدہ گون تروس و لرز نفس کَشَنت۔ تھانکا گیرمسلمانین مردم ای دپ دیگانی شکار نہ انت بلکہ بہ مسلمانانی تھا ھم بہ راز رازئ فرقہ آنی نیاما ھر وھدہ جنگ و سَکی انت۔ مثلا گون شیعہ ئن مردمان ھم چو گیر مسلمانانی وڑا رویہ کننت۔ بہ آوانی مسیتان و حرمانی تھا چُنتی وار ھلگر بوتگیت و چُنتی مردم کشتگ بوتگنت۔ ای ھبر ھم دیستگ بوتگیت کہ گیشترکین وھدان بہ جمعہ نمازئ وھدہ ھلگر تسر بنت کہ گیشترین مردمئ کشتگ بنت۔ احمدیہ فرقہ و بدترین ظلمانی نشانہ بیت۔ سرکارین وڑئ احمدیہ فرقہ گیرمسلمان جار جتگ بوتگنت۔ آوان وتی عبادتگاہ مسیت گشتگ نہ کننت۔ و قرآن تلاوت کرتگ نہ کننت و ایچ گجام اسلامین علامت و یا کلمہ وتی گشتگ نہ کننت۔
 
شہ ۱۹۹۸ بین الاکوامین مذھبین آزاتئ ایکٹ دیما، مذھبین آزاد یقینی بوتگیت۔ کہ بہ آی سیائگا ھر جاگہ بہ ھر گجام عقیدہ بنیادا بہ گجام مردمئ سرا ھلگر بیت آ یک قابل تعزیزین جرمئ زانتگ بیت۔ آمریکہ ڈنئ کارانی وزارت بری سالا وتی واچ لیسٹ تھا پاکستانئ مُلکا ھم شامل کرتگیت۔ ھمی ماھئ اولی روچانی تھا آمریکہ بہ وتی لیسٹ تھا پاکستانئ ناما شامل کرتگیت کہ بہ آی تھا آ مُلکانی نام لیکتگ بوتگیت کہ بہ آدنا مذھبین اقلیتانی سرا ھلگر بنت۔
 
بری لیسٹ تھا، میانمار، چین، سعودین عرب، برزئ کوریا، تاجکستان، ترکمنستان، ایران، سوڈان، ازبکستان و دیگہ مُلک ھم شامل انت۔ پاکستان پہ اولی وار و بہ ھمی زوتیان بری لیسٹ  تھا آی نام شامل بوتگیت پہ ھمی وجا بہ پاکستانئ تھا، چُنت فرقہ بری پکر و حیالا انت کہ آمریکہ بہ وتی دھشت گردیئ حلاپئ فشارا کہ پاکستانئ سرا کاریت بہ یک کوتئ ای کاروائیا کرتگیت۔