16.05.2018

پاکستانئ گڈین سرئ وزیر نواز شریف چُنت روچ دیما بہ وتی یک انٹر ویو تھا گون میڈیا ای ھبرا اعتراف کرتنت کہ پاکستان تھا دھشت گردین تنظیمات بہ برزین کچانہ موشکول انت۔ آوان بہ وتی ھبران شہ ممبئ ھلگرانی سرغنہ حافظ سعیدی تنظیم جماعت الدعوہ و یا مولانا مسعود اظھر کہ آی تنظیم نام جیش محمد انت یات نہ کرتنت۔ آوان بہ وتی بیانا گشتنت کہ ای دھشت گردانا ما گیر سرکارین عناصر گشتگ کننت۔ آوان سوج کرتنت کہ ما باید پہ ای گیر سرکارین عناصران اجازت دینت کہ شہ سیمسرا تیر بنت و بہ ممبئ تھا گیش شہ ۱۵۰ مردمانا کشنت؟ آیا ما پہ ای کارا گجام جوازئ دارنت؟ آوان ھمی وڑا سوج کرتنت کہ بہ ای بھرا ما پہ چہ عدالتین کاروائی نہ کننت؟ واجہ نواز شریفی ای بیان نہ تھانکا آوانا بلکہ پاکستانئ پورہ ئن اسٹیبلیشمنٹ آ گون مزنئن سَکیان دیم پہ دیم کرتگیت۔ “پنامہ گیٹ” دروگین معاملہ پھدا رندا شہ ایشی کہ سرئ محکمہ نواز شریفا نا اھل گشتگیت نواز شریف وت پہ وتی بقا بہ سیاستئ تھا جنگئ را لڑگا انت۔ ھور گون ایشی عدالتئ اعظمی ھم آی را شہ آی جیندئ سیاسین گل کہ بہ پاکستان مسلم لیگ “نواز” ناما انت ھم یک نیمگ کرت۔ ای ھبر یات کنگئ وڑ انت کہ آوانی گل نون بہ پاکستانئ تھا حکومت کنت و بہ آیوکین دو ماھ تھا گون گیچئن کاریان دیم پہ دیم انت۔
 
ای ھبرئ سرا ایچ گجام شک نہ انت کہ نواز شریفی مُچین ھبر راست انت۔ شہ ای ھبرا مُچی سی انت کہ بہ ۲۰۰۸ سالئ نومبرئ ماھ بیست و ششمی روچا شہ پاکستانئ حکومتئ نیمہ داریا دھشت گرد بہ ممبئ سرا ھلگر کرتنت کہ بہ ھما ھلگرئ تھا گیش شہ ۱۶۵ بی گناھین ھندوستانی و گیر مُلکین شھروند وتی زندا شہ دست داتنت۔ ای ھلگران رندا، ھما وھدہ پاکستانئ جمھورین سدر تجویز کرتنت کہ پہ شریکین پٹ و پولئ تسر کنگا آئی اس آئی سربراہ شہ ھند دورہ کننت، کہ ھمی تجویزا ھما وھدہ پوجئ سربراہ مسترد کرت و نہ منت۔ 
 
ممبئ ھلگرانی وھدہ، یکئ شہ ھلگرکنوکان کہ آی نام اجمل قصاب ات شہ امنیتین ڈلانی نیمگا دروا و جور بہ حراستا گپتگ بوت، آ ھم ای ھبرئ سرا اعتراف کرت کہ پہ ای ھلگرئ تسر کنگا پاکستانئ ایسٹبلیشمنت آی را تعلیم داتگیت۔ آ ھما پوجین اپسرانی ناما ھم گپت کہ پہ ای ھلگرئ کنگا بہ آی ٹرینینگ تھا شامل اتنت۔، مگہ رندا شہ ایشی کہ آ ھلگرانی دومی سازشی ذکی الرحمن لکھوی بہ حراستا گپتگ بوت، پاکستانئ پوج پورہ ئن وڑئ کوشست کرت کہ آی را شہ کانونین کاروائیان رکینیت۔ ھندوستان بہ دھشت گردانی باروا، و آوانی کوتا بہ ھلگران و ھمی وڑا بہ ھلگرانی سازش و پلانانی باروا چُنتی ٹھیکی و دستاویز پہ پاکستان ھم دیما کرت، مگہ پاکستان ھر وھدہ ای ھبرا گشت کہ ای ثبوت ناکافی انت۔ رندا شہ چُنتی سالانی عزت داتنا پہ لکھوی و سعید پاکستانئ پوج نون رندا شہ نواز شریفی اعترافا گون خفت آ دیم پہ دیم انت۔ نون ای ھبر ھم یات کنگئ وڑ انت کہ بہ نواز شریف حکومت وھدہ سرئ وزیر واجہ نریندر مودی لاھور تاریخین دورہ تسر کرتنت و چُنت روچ رندا شہ ای دورہ دھشت گرد بہ پٹھان کوٹ فضائین اڈئ سرا ھلگر کرتنت۔ 
 
دیم شہ ایشی بہ نواز شریفی اقتدارئ دورہ تھا ھم کارگل دپ دیگ بہ ۱۹۹۹ سالا دیما آت۔ ھندوستان و بین الاکوامین براسداری شہ ای ھبرا سی اتنت کہ پاکستان بہ دھشت گردانی حلاپا سَکین کاروائی نہ کنت۔ واجہ نواز شریف ای ھبرا ھم ثابت کرتنت کہ آوانی مُلک شہ دھشت گردیا چو یک ڈنئ کارانی پالسی کٹ گیت۔ پاکستانئ گیچئن کاری نون نزیک و نزیک تر بنت و گون ایشی سرئ محکمہ بہ بدعنوانی و دیگہ الزامانی پھدا بہ نواز شریف و آی زاگ و جینیک سرا سَک بوتگیت، شہ ھمی وجا ای ھبر ھم بوتگ کنت کہ نواز شریف ای ھبرانا تھانکا پہ مردمانی ھمدردئ حاصل کنگا داتگ بیت۔ نواز شریف ھمی وڑا بہ وتی یک دیوان تھا گشتنت کہ نون آ وھدہ رستگیت کہ پاکستان ای ھبرئ پھدا جنت کہ دھشت گردیئ اصلین زموار کئ استنت و مُلکئ نونین حالاتانی زموار کئ انت؟ آوان ھمی وڑا سوج کرتنت کہ نونین وھدہ کہ پاکستان عالمین وڑئ یک نیمگ بوتگیت و بین الاکوامین براسداری تیار نہ انت کہ ای گجام ھبرئ را گوش دارگا بیت، آی زموار کئ انت و ایشی وج چی انت؟ ای مُچین سوج استنت کہ پاکستانئ ایسٹبلیشمنٹ باید انت کہ پہ آوان شرّین پسوئ دنت۔