17.05.2018

دوشنبہ روچا بہ اسرائیل تاریخین شھرئ تھا، چُنتی پوسٹر، سائن بورڈ و بینرس بہ شھرئ ایشک و آشکا چما اتنت  کہ مُچین پہ آمریکائین سفارتئ جاگہ بدل بیگا شہ تل ابیب بہ یرشلمئ وشھالی دود گرگا بہ دیوالان چسپینتگ بوتتنت۔ یک نیمگا بہ اسرائیل تھا آمریکائین سفارتئ جاگہ بدل بیگئ وشھالیانیا دود گپتنت و دیگہ نیمگا بہ نوار غزہ تھا فلسطینین مردم گون سَکین تشددئ دیم پہ دیم اتنت۔ ای نیمگا بہ یرشلم تھا مردم وتی وشھالیا درا کرتنت و آ نیمگا بہ غزہ تھا، فلسطینین شھروند پہ احتجاج کنگا بہ آمریکائین سفارتئ جاگہ بدل کنگئ یک نیمگین فیصلہ حلاپا نوار غزہ تھا یکجا بوتتنت۔ بہ احتجاجئ وھدہ، اسرائیلین پوجی بہ احتجاج کنوکانی سرا تیر کرتنت کہ شہ آی وجا کم شہ کم ۶۰ فلسطینی وتی زندا شہ دست داتنت و گیش شہ ۲۴۰۰ مردم ٹپی بوتگنت۔ ۱۹۴۸ سالا فلسطینیانی مزنئن اشمارئ مجبور بوتنت کہ وتی مُلکا ویل کننت و یا آوانا پہ زور شہ آوانی مُلکا در کرتنت۔ ای فلسطینی ھمی وڑا پہ ای دپ دیگئ ھپتادمی سالئ دود گرگا ھم یکجا بوتتنت۔ ای ھپتئ تسر بوتگین دپ دیگئ وج تھانکا آمریکائین سفارتئ جاگہ بدل بیگ شہ تل ابیب بہ یرشلم نہ بوتہ بلکہ دیم شہ ایشی ھم شہ مارچ ماھ فلسطینین مردم ای ھبرئ سرا مظاھرہ کننت کہ آوان حک دارنت کہ بہ وتی آبائِین مُلکا پھدا برگردنت۔ 
دیم شہ ایشی بہ ۲۰۱۷ سالئ دسمبر ماھ جمھورین سدر واجہ ڈونالڈ ٹرامپ جار جتنت کہ آوان آمریکہ سفارتخانہ شہ تل ابیب بہ یرشلم کارنت و باقاعدہ گئوستگین دوشنبہ روچا ای کارا الاس ھم کرت۔ اسرائیلئ سرئ وزیر واجہ بنجامن نتن یاھو و پہ اسرائیلین استمانا ای یک تاریخین دپ دیگئ ات۔ آمریکہ جمھورین سدر واجہ ڈونالڈ ٹرامپ شہ یک ویدیوئین پیگامئ راھ پہ اسرائیلئ سرئ وزیرا مبارکی داتنت و گشتنت کہ ای گام باید انت کہ دیمترا زورتگ بوتن۔ بین الاکوامین کونسلئ گیشترکین باسک بہ آمریکہ ای فیصلہ حلاپا اتنت۔ بہ یک معاھدہ تھا ۱۲۷ مُلک بہ آمریکہ ای فیصلہ دیما اوشتاتنت و ۹ مُلک آی را منیتنت و ۳۹ مُلک بہ ووٹینگ تھا ایچ کوت نہ گپتنت۔ بہ اسرائیل و فلسطین نیاما بہ یرشلم دروستی بھرا شہ دیرین وھدہ تنازع رادگ انت و بین الاکوامین براسداری لوٹوک انت کہ ای سَکی بہ دوکین مُلکانی نیاما گون گپ و ترانا و شہ پر امنئن راھئ حل بیت۔
 
عربین مُلک ھم بہ آمریکہ ای فیصلہ حلاپا انت۔ بہ لبنان تھا ھم پہ ای فیصلہ حلاپ کنگا سَکین احتجاج تسر بوتنت کہ بہ آ مُلکا مزنئن اشمارئ شہ فلسطینیانی بہ پناھ لوٹوکانی حیثیتا وتی زندا دیما برتنت۔ خلیجین تعاون باسکین مُلک ھم بہ فلسطینیانی کشگئ بھرا وتی سَکین ناوشنودیا درا کرتگنت و عرب لیگ ھم پہ ای سَکئ پٹ و پول کنگا یک ایمرجنسین دیوانئ تسر بیگئ لوٹوک بوتگیت۔ 
بین الاکوامین کونسلئ سکرٹر جنرل انٹونیو گٹریس ھم بہ ای سَکین تشددئ بھرا وتی تشویشا درا کرتنت۔ کویت بین الاکوامین کونسلئ باسکانی یک ایمرجنسین دیوانئ تسر بیگئ لوٹوک بوتت و بہ ھما دیوان تھا یک معاھدہ دیما بوت و بہ آی تھا ای ھبرئ سرا تپاک بوت کہ بہ غزہ ای دپ دیگئ بھرا بہ زوترین وھدہ تفتیش و پٹ و پول بیت۔ بہ ھمی معاھدہ تھا ھم آمریکہ شہ وتی تنسیخ حکا کٹ گپت و ای معاھدہ بی کار کرتگیت۔ بہ معاھدہ تھا لیکتگ بوتت کہ ای احتجاج پر امن بوتگنت مگہ اسرائیلئ سرئ وزیر گشتنت کہ اسرائیلین پوجی بہ وتی دپاع شہ وتی توپکان گٹ گپتگنت کہ شہ آی وجا مردم کشتگ بوتگنت۔ آوان بہ حماس سرا تشددئ جور کنگئ الزاما جتگنت۔ ای ھبر ھم یات کنگئ وڑ انت کہ آمریکہ گشتگیت کہ حماس یک دھشت گردین ڈلئ انت۔ 
 
جرمنی و متحدین اروپا شہ اسرائیل لوٹوک بوتگنت کہ آ بہ پر امنئن احتجاجئ تسر کنگئ حکا احترام کننت۔ روسیہ بہ ای پکر و حیالا انت کہ یرشلمئ سَکی یک نیمگین وڑئ حل و شہ نیاما زورتگ نہ بیت۔ ٹرکیہ فیصلہ کرتگیت کہ وتی سفیرانا شہ آمریکہ و اسرائیل پھدا بہ وتی مُلکا دیم دنت۔ آ ھمی وڑا گشتگیت کہ بہ ھما کچانہ کہ اسرائیل پہ ای کشگان زموار انت بہ ھما کچانہ آمریکہ ھم زموار انت۔ فلسطینئ اتھارٹی ھم شہ وتی سفیرا بہ آمریکہ لوٹوک بوتگیت کہ بہ وتی مُلکا برگردیت۔ ھند ھر وھدہ بہ ای پکر و حیالا بوتہ کہ اسرائیل و فلسطین دوکین جیتائین، آزاتین و خود مختارین مُلک بنت و یرشلمئ سَکیا دوکین مُلک شہ گپ و ترانئ راھ وتی نیاما حل کننت۔