رمضان المبارک

24-05-018
رمضان المبارک اۓ روزہ پروردگار عالم اۓ وٹاژ مسلمان اُمت آپا یک اینگے بے مٹ سوکھڑی ایں ہمائی چکا مُچھیں اُمت مِلسؤ روش او شف دی منت وار بیسؤ سجدہ کھنت گُڈا دی ہمیں ھُزائی نعمت اۓ حق ادا کھنغ نویس بی۔ہمٖیں پاکین ماہ آ ھُزا تعالی آ وتی آخیری رسول او تاج دار انبیاء حضرت مصطفیﷺ چکا وتی آخیری کتاو قرآن حکیم فرقان مجید نازل کھُزؤ جہان او اہل ایمان چکا یک اینگے رحمت کھُزغۓ سا ہمائی وجہ آژ نہ چھڑوئی آ نیخٖی کھنغ اۓ موقع گیش بیسغاں بلکہ ھُزا رب العزت اۓ رضا اۓ پروانہ دی عطا بیسا۔ہمیں پاکیں کتاو آ پروردگار عالم آ وتی آخیری تاج دار سرور عالم ﷺ اۓ دل چکا نازل کھُزا ہماں کہ شوۓ زوان آژ مسلام اُمت تکا پُجھسا او ہدایت او راہنمائی اۓ سبب بیسا۔اے قرآن حکیم اۓ اعجاز ایں کہ آنہی آ مُچھیں جہان آ توحید اۓ انقلاب پیدا کھُزا۔قرآن حکیم اۓ عظمت اۓ اٹکل ہمیں ٹؤک آژ جھنغ بیس بی کہ ھُزا رب العزت آ ہمیں برکت والا ماہ آ اہل ایمان آ روزہ ایر کھنغ اۓ حکم داسا ،رمضان کریم آ ہمیں حکم داسؤ ہمیں ماہ اۓ عظمت دی پدھر کھُزئی او اہل ایمان آ اے ڈسسئی کہ اے جشن نزول قرآن اۓ ماہ ایں ،ہمیں خاطرہ اہل ایمان آ پاک بی اغ آپا او آنہی آ ہمیں ماہ آ روزہ ایر کھنگ اۓ حکم داسئی ۔
ارشاد بانی ایں :’ ایمان والا ! شوۓ چکا روزہ فرض کھُزی آ شُزغاں ہمینگا کہ شوۓ آژ سرا مڑدم آنی چکا فرض کھُزی آ شُزغۓ ساں ،تاکہ شوا پرہیز گار بیس بی اے۔
تقوی چھے انت؟ تقوی ہر ہماں شَر ایں او نیخیں کار انت ہماں کہ مڑدُمیت اۓ جوانائی آپا دی شَر ایں بی او ہمائی آژ عامین مڑدم آنی جوانائی بی ،آنہانر راہنمائی مِلی او آنہاں نی آپا وشتر او پاکیں زِند گوازینگ آسان بی ۔تقوی اۓ ھِچھ حد نعیں او نہ اینگے ھِچھ ٹؤک ایں کہ متقی بی اغ مشکل بی۔ہر مڑدم متقی بیس بی تقوی گِت کھت۔چھڑوئی آ شرط اِش انت کہ آں ہر اعلی او کمتر کار آ دی شریعت چکا عمل کھنت او شرعی اصول آنی پاس داری کھنت،آنہی احترام کھنت۔ ہر کار ہمیں طریقہ آگو کھنت ہمائی آژ ھُزا او ھُزا اۓ رسولﷺ آ حکم داسا ۔ہمیں شریعت ایں ۔رمضان المبارک اۓ مُچھین ماہ آ روزہ ایر کھنگ اۓ حکم داسی آ شُزا او پھجی آ ہی اے حکم داسی آ شُزا کہ اگر سفر کھنغۓ تہ دیگر روش آ روزہ ایر کھنت اگر ناجوڑ بی گُدا دی آنہی چکا روزہ اۓ معافی نعیں دیگر روش آ آنہی آ ایر کھنگی بی۔او گُڈا اے دی ارشاد کھُزئی کہ اِشی اندرا شوۓ جُوانائی ایں ۔ایزا ھُزاتعالی آ چھیختر شَر ایں ٹؤک گوشتا کہ ہمائی آژ یک وٹا تہ روزہ اۓ اہمیت اۓ اٹکل بی غیں تہ دوہمی وٹا اے دی معلوم کھوغین کہ آنہی آژ ھُزا اۓ رضا مِلی ۔یعنی روزہ ایر کھُزؤ مڑدم آنر دو ڈؤل اۓ فائیدگ بیس بی ۔یک وٹا تہ آں وتی ھُزا آر وش کھنت او دوہمی وٹا آخرت آ مزن این انعام داری ۔اے راست ایں کہ مُچھیں مزہبی احترام آگو ایر کھُزی ایں روزہ ھُزا ھُزا اۓ بارگاہ آ قبول بی او ھُزا آ وش کھنت اگر کھسے مڑدم روزہ اینگا نہ کھنت او روزہ ایر نہ کھنت تہ آں وتی نُقصان کھنت۔رمضان المبارک چوش کہ قُرآن اۓ نازل بی اغ اۓ ماہ این ہمیں خاطرہ رب العزت آ اے دی حکم داسا کہ رمضان آ وتی شف آنر قرآن اۓ تلاوت او قُرآن پڑھغ آگو سونڑھا کھنے۔الحمد اللہ اہل ایمان وتی ہمیں سعادت اۓ شف آ تراویح آنی دیم آ قرآن حکیم اۓ تلاوت کھناں ۔روزہ چھڑوئی آ مقرر کھُزی ایں وخت آ ہی بی روش کھوغ آژ پیشا ما جواایں ڈؤل آگو وروں آنہی آ پھدا چھڑوئی آ روش ڈُبغ تکا ہی ھِچھ واڑتھ نہ کھنوں ۔آنہی آ پھدا ہماں وخت روزہ بوژوں تہ گُڈا ہر شۓ ورگ اۓ اجازت بی او ہر ہماں کار کھُز کھنوں ہمائی آ کہ روزہ اۓ حالت آ کھنغ آژ منع ایں ۔روزہ اۓ حالت آ مڑدم آنر چھڑوئی آ شَر ایں او نیخیں کار کھنغ لوٹھاں ۔نماز اۓ پابندی کھنغ لوٹھی۔قرآن حکیم اۓ تلاوت دی کھنت او سماعت دی۔روست گُشے دروغ آژ دیر بھچے ۔مزن آنی حترام کھنگ لوٹھی ھُزا او آنہی رسولﷺ اۓ حکم آنی پابندی کھنغ لوٹھی او وضہار مُچھیں سال متقی کھنگ اۓ تربیت گرغ لوٹھی۔دُعا انت کہ ھُزا رب العزت مارا اے رمضان وتی طاغت و فرمان برداری آ گوازینگ اۓ توفیق دا۔
آمین ۔