13.06.2018


نون بری روچا کہ پاکستانئ گیچئن کاریانی تاریخ نزیک تر بیت ھما راز ھر روچ نوکین ھال بہ مئ گوشان رسنت کہ شہ آوان ای ھبرئ کچانہ جتگ بیت کہ پاکستانئ تھا راز رازین آئینی دپترانی انصافئ پیمانہ ھم جیتا جیتا انت۔ خاسین وڑئ آ مُلکئ عدالت عظمی یعنی کہ سپریم کورٹئ فیصلہ آنی تضاد تہ کچانہ درا انت کہ نون ای ھبر ھم درا بیت کہ آوان پہ سیاستمداران و خاسین وڑئ بہ واکدارین و بہ واکئ چوئ سرئ گلانی سیاستمدارانی بھرا دیگہ وڑئ عدالتئ پیمانہ دارنت وھدہ کہ آی عدالتئ پیمانہ پہ پوجین جنرالان پورہ ئن وڑئ مخالپ انت و باز توپیر داریت۔ مثالئ وڑا ما بہ گڈین سرئ وزیرئ باروا گپ جتگ کننت، گڈین سرئ وزیر واجہ نواز شریف شہ عدالتئ نیمگا شہ ای وجا نااھل بوت کہ آ امین و صادق ثابت نہ بوت شہ ھمی وجا نہ تھانکا آ سرئ وزیرئ بوتگ نہ کنت بلکہ گجام کومین اسمبلئ باسک ھم بوتگ نہ کنت۔ تھانکا ایش نہ انت، بہ دیگہ فیصلہ آنی سیائگا آ پورہ ان وتی زندا بہ سیاست تھا کوت گپتگ نہ کننت و ھمی وڑا شہ سرکارین گجام چوکئ و ملازمتئ گپتنا ھم نااھل بوتگنت۔
 
نوکیترین ھال ایش انت کہ احتساب بیورو پھد بہ پھدین وڑئ بہ گیسویین کارانی وزارتئ سرا فشار پرینیت کہ نواز شریفی جینیک مریم، و آی زاگ حسن و حسین و آی داماد رئٹائرڈ کپیٹں محمد صدر نامانا بہ ایگزٹ کنٹرل لیسٹ تھا شامل کننت۔ احتساب بیورو ھمی وڑا لوٹوک بوتگیت کہ گڈین خزانہ وزیر اسحاق ڈار ناما ھم بہ ای لیسٹ تھا شامل کننت کہ آوان ھور گون نواز شریفی زاگانا شہ اینٹرپول راھ پاکستان برگردینتگ کننت۔ گیسویین کارانی وزارت گشتگیت تہ وھدہ کہ عدالتئ محکمہ پہ آی گجام حکمئ پہ ای نامانی شامل کنگا بہ ایگزٹ کنٹرل لیسٹ تھا مہ دنت آ ای گاما زورتگ نہ کنت۔
 
بہر حال ای ھبر بہ سیاستمدار و آوانی خاندانئ باروا انت۔ ای تصویرئ دیگہ نیمگ ایش انت کہ پاکستانئ گڈین ڈیکٹیٹر جنرل پریوز مشرف کہ بہ ۲۰۰۷ سالا ھائ کورٹ بہ ایمرجنسی نافذ کنگئ وجا نااھل کرت و  آ گامئ کہ شہ آی نیمگا زورتگ بوتت بہ غددارئ راھ ات، مگہ باز ھم سرئ محکمہ مشروطین وڑئ پہ آی اجازت دات کہ بہ گیچئن کاریانی تھا کوت گیت و پہ آی وکیلا باور و یقین دات کہ اگہ پھدا برگردیت آی را بہ حراستا نہ گرنت۔ ای ھبر ھم یات کنگئ وڑ انت کہ پشاورئ سرئ محکمہ ھم آی را پہ پورہ ئن زندا شہ گیچئن کاریانی تھا کوت گرگا منع کرتگیت۔ بہ جنرل پرویز مشرف سرا چُنتی دیگہ مقدمات قائم انت کہ بہ برزین کچانہ سَک ھم انت۔ سرئ آی بہ ۲۰۱۶ سالا بہ میڈیکال گراونڈ تھا پہ آی اجازت داتگ بوت کہ شہ پاکستانا ڈنا در بیت و نون راھ پہ آی برگشتنا و بہ گیچئن کاریانی تھا کوت گپتنا ھم ساپ و راست نظر کائیت۔
 
بہ دیگہ نوکین فیصلہ تھا ھم سپریم کورٹ شہ یک متعلقہ سرکارین محکمہ لوٹوک بوتگیت کہ آ شہ جنر پرویز مشرف آی ڈی کارڈ، پاسپورٹ و دیگہ کاگدانی سرا پابندی آ یک نیمگ کننت۔ ای ھبر ھم یات کنگئ وڑ انت کہ بہ ۲۰۱۴ سالا عدالت جنرل پرویز مشرف آ مجرم توار کرتت پہ چہ کہ بہ ۲۰۰۷ سالئ ایمرجنسی نافذ کنگئ وھدہ آ چُنتی قاضیانا بہ آوانی گیسانی تھا نظربند کرتت۔
 
شہ پاکستانئ عدلیہ ای وڑئ فیصلہ آن ای ھبر روکین وڑئ درا انت کہ سپریم کورٹئ ای فصلہ آنا دیانتدارنہ گشتگ نہ کننت و بعض سیاستمدارانی ای الزام دروگ یا غلط معلوم نہ بیت کہ پوج و عدلیہ یکجا بوتگنت و حکومت و پارلیمنٹا گوازی جور کرتگنت۔