آزات ھِند اۓ ود او ترقی آ زائیف آنی عمل

آزات ھِند اۓ وداوترقی آ زائیف آنی عمل آنی تاریخ اندرا گاندھی آژ محبوبہ مفتی تکا،پی ٹی اوشا آژ ثانیا مرزا او گیتا پھوگاٹ تکا،عصمت چُغتائی،قرتلعین حیدر آژآشا پورنا دیوی او کرشنا صوبتی تکا ،ٹرین ڈرائیور سریکھا یادو ،فائیر جیٹ پائیلت بھاونا،اونی او موہنا،مائیکرو ویو اینجنئیر راجیشوری چٹرجی ،ہیومن کمپیوتر شکنتلا دیوی تکا،اندرا نوئی آژ اروندھی بھٹاچاریہ تکا ،دیویکا رانی ،نسیم بانو مدھو بالا ،رسولن بائی ،سدھیشوری دیوی ،وندواسنی دیوی او سُبا لکشمی تکا،سشما سوراج ،نرمیلا سیتارمن آژ ۲۰۱۷ اۓ نیتی آیوگ ایوارد گِتی ایں دوازد زائیف آنی لست آ اوار سفینہ حسین بی یا اولی ایں زائیف فائیتر ہرشینی کھانیکر ڈؤل اۓ نام پھُر آں ہماں ہاں مُلک اۓ ود اوترقی آ خاصیں کار کھُزا ۔مڑدمی تاریخ ہمیں ٹؤک اۓ شاہد ایں کہ مُلک او قوم آ ہماں وخت دی ھِچھ مُہم جوئی دیما بیسا تہ زائیف آں نرین آنی کوفگ بہ کوفگ رہسؤ مُلک او قوم اۓ ترقی آپا کار کھُزا۔زائیف وتی ہر دیم آ ھُزا اۓ یک قیمتی سوکھڑی ایں ۔ھِچھ دی معاشرہ اۓ ود او ترقی آ زائیف آنی خاصیں کردار رہسا۔زائیف آنی دیم ماس ،گوار،جِنکھ او لوغی اۓ دیم آ یک عامین سُچائی ایں ۔آزاتی آ پھدا ما ہماں معاشرہ تہا رہوں ایزا زائیف آنر وتی عمل پھیدھارغ اۓ چُنتی موقع آں ۔شوا نہاہ ماکھنے تہ ھِند ہی نہ بلکہ ھِند آژ درا دی مۓ زائیف مُچھیں شعبہ گون سیاست ،ہر پٹ آ اعلی ایں عہدہ آنی چکا رہسؤ وتی زمہ واری پھیلو کھنغاں ۔او مُلک اۓ وشحالی ،ترقی او آنہی آ بُڑزا برغ آپا خاصین عمل کھنغاں ۔اے یک منسی ایں اصلیت ایں کہ زائیف آں ہماں ہماں وخت زِند اۓ دوہمی شعبہ آ کمان سنبھالتھا تہ نوخیں ریکارڈ قائیم کھُزیش او بُلند مثال قائیم کھُزیش۔ھَچھ دی مُلک اۓ ترقی او پھدا بی اغ اۓ ماپ آنہی معیشت اۓ ترقی او بُنا بی اغ آژ کھُزی آ رؤ،او شَر ایں صحت وتعلیم اۓ بُنشت چکا قائیم کھُزی ایں معاشرہ زِند اۓ جتا شعبہ آنی اندرا سوب مند مڑدم پیدا کھنت ہماں کہ ہمیں ترقی اۓ سرین اۓ ھَڈ اۓ وڑا بی ۔گوشتی رؤ کہ ادب سماج اۓ عکس بی اگر ما چھی اے منفی عنصر آنر پھدا ایر کھُزؤ گِندوں تہ مروشی اۓ ھِند بیگم رقیہ سخاوت حسین اۓ ناول سلطانہ اۓ واہو اۓ تعبیر مان کھاۓ۔آنہی آ ۱۹۱۱ آ کلکتہ آ زاگی آنی آپا یک اسکول قائیم کھُزغۓ سا ہماں کہ نی رقیہ سخاوت حسین میمورل گرلز کالج اۓ نام آژ قائیم ایں ۔رقیہ خاتون ہماں کہ سیر آ پھدا بیگم رقیہ سخاوت حسین اۓ نام آژ مشہور بیسا ۱۸۸۱ آ بنگال آ پیدا بیسا او بہار آ آنہی اۓ انگریزی زوان آ لکھسی ایں قِصو سلطانہ ڈریم ۱۹۰۵ آ دیما آختا تہ ہر کھسے حیران بیسا پھرچھے کہ ہمیں قِصو آ ہماں واہو اۓ زکر کھُزی آ شُزغۓ سا آنہی آ اے سائینس فکشن دی گوشائینغ بیس او فینتسی دی۔ہموزا نرین زائیف آنی وڑا پردہ آ نشتینتھی آ شُزغاں او سؤداگری زائیف کھنغاں ،ہموزا زائیف آنی آپا دو یونیورستی آں او زائیف آنی آپا سائینسی تجربہ گاہ آں ،زاگی آنی آپا اسکول چُنتی اسکول آں ،کھمیں عمر آ سیر چکا پابندی ایں ،حیرانی بی کہ ہماں زمانہ آ رقیہ آ قصو آنی اندرا سائینسی فکشن اۓ وڑا آؤخیں روش آنی اندرا بی اغ والا ایجاد آنی زکر کھُزا۔مۓ مُلک اۓ آئین ٹھائینوخ آں ھِند اۓ ود اوترقی اۓ ہماں کہ واہو دیستا آنہی تعبیر زائیف آنی بہر داری آ بغیر ممکن نیااو اے ٹؤک آن شَر ایں ڈؤل آگو زاناں ۔یک نسل آزاتی لوٹھوخ خاص ڈؤل آژ زائیف آنی اُنگل پکڑسؤ بُڑزا بی غۓ سا ۔رانی لکشمی بائی او بیگم حضرت محل اۓ نام زوان چکا کھاۓ تہ آزاتی اۓ عکس دماغ آ پیدا بی ۔اے دوایں دلیر زائیف آزاتی اۓ مڑائی اۓ اولی ایں سرگرم عمل زائیف اساں ۔آنہاں محل آ نشتؤ پالیسی ہی نہ ٹھائینٹھغاں بلکہ مڑائی اۓ پٹ آ وتی دلیری او صلاحیت آنگو آزادی اۓ کوشش آ یک عظیم سروک بیسؤ دیما آختغاں ۔بی اماں علی برادران اۓ ماس ۱۹۱۸ آ ھِند اۓ آزاتی اۓ تحریک آ اوار رہسا۔ہماں وخت آنہی دوایں بچھ جیل آ اساں ۔اینی بیسینت ،میدم بھیکاجی کاما،کستورباگاندھی،زُلیخابیگم،سروجنینائیدو،کملانہرو ،وجے لکشمی پنڈت ،سچیتا کرپلانی،ارونا آصف علی،درگا بائی دیشمکھ،اوشامہتا ساوتری بائی پھولے ،او کے ای خاصین زائیف آں ہماں ہاں نی کردار دی روژن روش اۓ وڑا پدھر ایں آنہاں نی زِند آئیغ والا نسل آنی آپا دگ پھیدھارغ اۓ روژنائی ایں ۔