08.11.2018

بہ مذھبین انتھاپسندانی دیما زان جتن پہ ایچ گجام مُلکئ کٹئ وڑ نہ انت۔ ھر مُلکئ وتی کانون و آئینانا داریت۔ پہ آئین و کانونئ نفاذ وجا دپتر و ادارہ موجود انت۔ آوانی ذمہ داری ایش انت کہ بہ مُلکئ تھا ھر وڑئ کانونئ حکمرانی آ قائم کننت۔ و ھما عناصرئ کہ آی راہ سرا اوشتنت یا کانونا پروشنت بہ آوانی حلاپا سَکین کاروائی کنت۔ ھور گون ایشی حکومت ھم ای ذمواری آ داریت کہ ھر شھروندئ زند و مال آ ساتوک بیت و اگہ زرورت بیت گون زور کانونا قائم کنت۔ مگہ پاکستان یک رازئ مُلکئ انت کہ بہ آی تھا عملا ائین و کانون نہ بلکہ مذھبین انتھاپسند و شدنت پسند بالادستی دارنت۔ ای پاکستانئ تاریخئ تھا انت کہ چی سیویلین سرکار بوتہ بنت یا پوجی ھر گجام سرکارئ بہ آوانی دیما زان جتگنت و آوانی جائیز و ناجائیز لوٹگانا مُچانا منتگنت۔ کہ شہ آی وجا بہ پاکستانئ تھا مروچین روچا مذھبین شدت پسندانی جماعت واک باز انت۔ تہ ای حد کہ آوان درائین وڑئ کانونا پادئ چیرا کننت و اگہ گجام مردمئ بہ آوانی شدت پسندین پکر و حیالئ حلاپا بیت آی جانئ دشمن جور بنت۔ ای واکانی دیما سرکار چی وڑا وترا تسلیم کرتگیت ایشی نوکتری مثال ھمی حالات انت کہ رندا شہ بی بی آسیہ آزات بیگا بہ دیما آتگنت۔
سرئ محکمہ شہ ای وجا کہ ٹھیکی و ثبوت کم بوتگنت بہ توھین رسالتئ اتھامانی کئیس تھا لاھورئ محکمہ فیصلہ یک نیمگ کرت و بی بی آسیہ آزات کرت و ھما دم رندا شہ ای محکمہ فیصلہ بہ مُلکئ تھا طوفانئ پھاد بوت۔ بریلوئ مسلکئ نمایندگ، جماعت تحریک لبیک پاکستان و ھور گون آی دیگہ مذھبین جماعت نہ تھانکا گون ای فیصلہ وتی حلاپ کنگا درا کرتنت بلکہ سرئ محکمہ قاضیانا واجب القتل کرتنت۔ آوان ھمی وڑا شہ پوجئ سربراہ جنرل قمر جاوید باجوہ ھم بہ برزین کچانہ بدگشی کرتنت و آوانی سرا ھم ذمہ پرینتنت۔ شہ ای جماعتانی ھنگامہ وجا تہ چُنتی روچ مُلک تھا لاقانونیت و نراج حالات رادگ بوتگنت۔ اول سرا پی ٹی آئ سرکار سَکین رویہ کرتنت۔ تہ ای حد کہ سرئ وزیر عمران خان وت گون سَکین لھجہ گشتنت کہ سرکار ای وڑئ ھنگامہ آنا تحمل نہ کنت و نہ باید انت کہ احتجاج کنوک ای را مجبور کننت کہ گجام سَکین گامئ بزوریت۔ پوج ھم سَکین وڑئ اخطار دات کہ آی صبر و حوصلہ مہ آزماینت مگہ نانگمانا پوجئ لھجہ بدل بوت۔ بہ سَکئ جاگہ نرمی آت و بہ باتورئ جاگہ بزدلی دیما بوت۔ سرکار گون تحریک لبیک پاکستان مفاھمت کرت و آی مُچین مطالباتانا منت۔
 

سرکار منت کہ پہ بی بی آسیہ اجازت مہ دنت کہ شہ مُلکا ڈنا در بیت و ھمی وڑا بہ آی آزاتئ فیصلہ سرا گون پٹیشن آ مخالپت نہ کنت۔ ای راز معلوم بی تکہ بالواسطہ ئن وڑئ آسیہ مرکئ راھ ھموار کرت۔ بی بی آسیہ زند تہ چی کچانہ گون خطرا دیم پہ دیم انت ایشی کچانہ شہ ایشی جتگ بیت کہ آی وکیل سیف الملوک مُلکا ویل کرتہ جیستگیت۔