09.11.2018

سری لنکا آ ۱۴ نومبر آ پارلیمان اۓ اجلاس طلب کھُزی آ شُزا۔ہر کھسے اۓ نیاہ ہمیں اجلاس چکا مان ایں بھرچھے کہ ہمیں روش اے طۓ بی برؤ کہ سر وزیر اۓ عہدہ اۓ دو دعویدار آنژ کھۓ عہدہ اۓ حقدار بی۔اُمیت انت کہ آنہی آ پھدا مُلک آ ۲۶ اکتوبر آژ جُزغ والا ایں آئینی بحران آسر بی رؤ ۔زکر اۓ لائیق انت کہ ہماں روش صدر میتری پالا سری سینا آ رانل وکرما سنگھے آ برطرف کھُزؤ پیسر اۓ صدر مہندا راجا پکسے آ نوخینسروزیر مقرر کھُزغۓ سا ہمائی آ پھدا مُلک آ سیاسی بحران پیدا بیسغۓ سا۔پدھر ایں ڈؤل آگو راج پکشے او وکرما سنگھے اۓ نیمگا باز ٹکر ایں او ووٹنگ اۓ وخت فیصلہ کھسے اۓ حق دی بیس بی ۔اے وخت ہماں کہ حالت ایں آنہی روگا وکرما سنگھے آ ۲۲۵ باسک آنی پارلیمان آ ۱۰۲ باسک آنی حمایت مِلسی ایں درگتہ کہ ۱۰۱ باسک راج پکشے اۓ حمایت کھنگاں ۔اِشی آژ پدھر بی کہ دوایں آنی نیمگا باز مقابلہ این او آخیر آ اگر چند باسک دی جتا بی آں تہ حالت بدل بی رؤ۔ہمیں پنچ باسک آنژ چھیار آ سرا ہی وزیر آنی عہدا داسی آ شُزا ہماں کہ وکرما سنگھے آ اِلسؤ راج پکشے اۓ وٹا بیسگاں ۔اے حبر دی پھیزاغین کہ پارلیمان اۓ باسک آنر وتی وٹا کھنگ آپا زر آنی پیشکش دی کھُزی آ رؤغیں ۔راج پکشے آ اے اُمیت دی ایں کہ سرکار اۓ کار آنژ ناوش بیسؤ حکمراں اتحاد اۓ چھی اے باسک آنہی پھجی آ بی آں رواں ۔او نی دیگر کھسے دی آنہی آر نعے لی۔باقی ۲۲ باسک آنژ ۶ آ ہماں ہاں نی تعلق سنہالا قومی پارٹی آگو ایں ،جار جھزا کہ آں دوایں اُمیت وار آنژ کھسے آر دی ووٹ نہ دیاں ،پھرچھے کہ دوایں نا نی نیمغا ھِچھ گیش فرق نعیں او دوایں یک بھیرا آں ۔نی آنہی آ پھدا تمل نیشنل الائینس بھچی ہمائی اۓ ۱۶ باسک آں ۔نی ہمیں باسک طۓ کھناں کہ سروزیر کھۓ بی ۔مگن ایزا دی مسلہ آسان نیاہ نیاۓ ۔تمل نیشنل الائینس ہماں کہ ۲۰۱۵ اۓ گچین کاری آ پھدا آژ سری سینا ۔وکرما سنگھے مخلوط سرکار آ اوار رہسا ،نی مزن ایں پارٹی نہ رہسا پھرچھے کہ نی ایں روش آں آنہاں نی نیمگا ناوشی پیدا بیسغۓ سا او جال صوبہ اۓ اعلی ایں وزیر سی وی وگنیشورن آ پارٹی آژ جتا بیسؤ وتی نوخین پارٹی ٹھائینتھا۔نی گِندغی اِش انت کہ ۱۴ نومبر آ ووٹنگ اۓ وخت چھے دوایں وٹا براوری بی ۔اِشی اۓ پھجی آ صدر سری سینا او پارلیمان اۓ اسپیکر کاوجے سوریا اۓ نیمگا ہماں کہ ناوشی ایں آنہی چکا دی نیاہ ماکھنغ اۓ ضرورت ایں او گِندغی اِش انت کہ پارلیمان اۓ کاروائی اۓ نیمغا آنہاں نی چھے سلوخ بی۔چوش کہ صدر سری سینا آ راج پکشے آ سروزیر اۓ ڈؤل آگو حلف دیائینتھا گُڈا دی کاروجے سوریا آ آنہی آ سروزیر منغ آژ انکار کھُزا۔نی گِندغی اِش انت کہ آؤخیں چھیار شمبھے اۓ روش ہماں وخت پارلیمان اۓ اجلاس بنِا بیسا تہ اسپیکر جے سوریا سروزیر راج پکشے اۓ پھجی آ چھے سلوخ کھنت۔سری لنکا آ نی ایں حالت آنی بارو آ باز مشاہد آنی ویچار ایں کہ ہمیں آئینی بحران آ پیدا کھنغ والا آں وا ایں ہماں کہ باز دُکھ اۓ ٹؤک انت ۔اے ہمیں خاطرہ دی دُکھ اۓ ٹؤک انت کہ بُرز آسیائی جاگاہ اۓ ہمیں مُلک آ جمہوریت اۓ یک مزن ایں تاریخ رہسا۔ہمسائیگ مُلک مالدیپ آ نی ایں روش آں جمہوری عمل آنی زریعہ آگو سیاسی بحران آ حل کھُزی آ شُزا۔سری لنکا اۓ آئینی بحران آ حل کھنغ آپا دی ضروری ایں جمہوری عمل آنژ گوزغ ۔ہمیں خاطرہ اُمیت ایں کہ ۱۴ نومبر آ پارلیمان آ بی اغ والا ووٹنگ آنژ نی ایں آئینی بحران آسر بی رؤ۔