10.11.2018

پاکستان اۓ فیڈرل سرکار آ گوشتا کہ آں قومی سلامتی اۓ مسلہ چکا ھِچھ وڑ اۓ زور آ نیاۓ۔اصل آ ہمیں ٹؤک بین الاقوامی مالیاتی ایں فنڈ یعنی آئی ایم ایف اۓ ٹیم اۓ پاکستان آئیغ اۓ تناظر آ گوشتی آ شُزا۔پھرچھے کہ انتہا پسند حلقہ آنی سرکار چکا زور ایں کہ آں ڈن اۓ مُلکی مالی واہریائی گِرغ آپا انتہا پسند آنی حلاف سخت ایں عمل کھنغ آژ گُریز کھنت او دہشت گردی اۓ آسر کھنغ اۓ بہانہ آژ انتہا پسند مزہبی عنصر آنر نشانہ نہ کھنت۔اے ٹؤک زکر اۓ لائیق انت کہ بین الاقوامی ادارہ او عالمی براسی آ پاکستان اۓ مالی واہریائی کھنغ ہمیں سبب آژ بند کھُزا کہ آں دھشت گرد آنی عسکری عمل او آنہاں نی مالی وسیلہ آنی چکا پابندی جھنغ آ ناسوب رہسا ۔امریکہ او عالمی ادارہ اۓ ہمیں فیصلہ اۓ سبب آژ پاکستان آ اے وخت مزن ایں مالیاتی بحران دیما ایں ۔سرکار اۓ کمزور پالیسی آں قومی معیشت آ دی کمزور کھُزا ۔ہمیں مسلہ اۓ دوہمی ٹِک سرکار او پؤج اۓ ھِند دُژمنی ایں ۔آنہی روگا سرکار وتی کمزور معیشت آ پٹی چکا آرغ آپا سخت ایں اقتصادی گام گیج آنی بجاۓ مزن ایں زر دپاع اۓ بجٹ چکا خرچ کھُزؤ آنہی آ قومی سلامتی آگو جوڑغیں ۔ہمیں حالت آ بین الاقوامی مالیاتی فنڈ اۓ ٹلہ اۓ اسلام آباد آئیغ چکا پاکستان اۓ مالیاتی ایں وزیر اسد عمر اۓ اے پیرا معنی خیز ایں کہ سرکار ادارہ آژ بیل آؤٹ پیکیج گِرغ اۓ زور آ قومی سلامتی آگو منغ نامہ نہ کھنت۔سرکار آئی ایم ایف آژ پنچ آژ شش بلین ڈالر اۓ بیل آؤٹ پیکیج گِرغ اۓ کوشش کھنغین ،مگن اِشی آژ سرا عمران خان چین او سعودی عرب آژ مزن ایں مالیاتی واہرائی اۓ باور گِتئی۔پدھر ایں سرکار اے منسؤ نِشتی ایں کہ ہمیں حالت آ آں آئی ایم ایف آژ وتی شرط آنی چکا بیل آؤٹ پیکیج گِرغ آ سوب مند بی رؤ۔آئی ایم ایف اۓ ٹیم پاکستان آ کے ای روش تکا رہی او سرکار او آنہی ادارہ آنژ جتا پالیسی آنی چکا ٹؤک کھنت،مگن ہماں وڑا پاکستانی مالیاتی وزیر آ قومی سلامتی اۓ مسلہ آ عالمی مالیاتی ادارہ آگو ھِچھ وڑ اۓ منغ نامہ نہ کھنغ اۓ ٹؤک گوشتا آنہی آژ پدھر ایں کہ پاکستان دپاع اۓ بجٹ آ ھِچھ کمی نہ کھنغ او دمغ آ قومی سلامتی اۓ بہانہ ناوشی اۓ حالت پیدا کھنغ اۓ پالیسی چکا جُزغیں ۔پاکستان اۓ سرکار اۓ ہمیں پالیسی ہمیں ٹؤک اۓ ثبوت ایں کہ عالمی مالیاتی ادارہ آنر مُچھیں باور دیائینغ اۓ باوجوت پاکستان نہ تہ دھشت گردی آ آسر کھنغ اۓ مسلہ آ او نہ اسلحہ آنر دارغ اۓ مسلہ آ سنجیدہ ایں ۔حالت اِش آں کہ مروشی دی دھشت گرد آنی مالیاتی واہریائی کھنغ آ ھِچھ کمی نیاتکا درگتہ کہ کے ای ممنوعہ تنظیم آنی بینک کھاتہ آنر بند کھُزی آ شُزا۔مروشی دی دھشت گرد آنی ہر وڑ اۓ دست رکھیائی کھُنغ اۓ سلسلہ جُزغین او ہمیں عنصر آنی دست رکھوخ سرکار،پؤج او انتظامیہ آ اوار آں ۔ہمیں حالت آ آئی ایم ایف اۓ ٹیم اۓ پاکستان آئیغ اۓ موقع چکا پاکستان اۓ سرکار اۓ مزکورہ ویچار نہ چھڑوئی آ فکر اۓ ٹؤک انت بلکہ دمغ آ امن اۓ قیام اۓ اُمیت او ھِند آگو دو نیمغی سفارتی سیال داری اۓ وشتری اۓ دگ آ دی خلل نیاہ کھاۓ۔