06.12.2018

آر آئی سی فورم اۓ باسک مُلک روس،ھِند او چین اۓ سروک آں دوازد سال آنی پھدا بیونس آئیرس آ جی ۔۲۰ سروک آنی کانفرنس آژ ہٹسؤ جِتا بیٹھک کھُزا۔اے بیٹھک روس اۓ صدر ولادمی پوتن اۓ بُنگیج آژ بیسا۔بیٹھک اۓ نیمگا سروزیر نریندر مودی،چین اۓ صدر شی جنگ پنگ او روس اۓ صدر ولادمیر پوتن آ ہماں شعبہ آنی چکا داس گپت کھُزا ہموزا سۓ اوں مُلک یک دوہمی آگو تعاون کھُز کھناں ۔سروزیر نریندر مودی آ ہمیں بیٹھک آ شَر ایں منسؤ ہمیں باور آ پدھر کھُزا کہ ہمیں سۓ اوں مُلک آنی نیمگا نہ چھڑوئی آ سنگتی مضبوط بی بلکہ آنہی آژ امن دی گیش بی،آنہی آ اے دی گوشتا کہ آنہاں نی نیمگا تعاون آگو بین الاقوامی فورم مضبوط بی۔ہمیں سۓ اوں مُلک ہمیں ٹؤک آپا دی ہم صلاح بیسغاں کہ اقوام متحدہ ،عالمی سؤداگری تنظیم او آسیائی ترقی بینک ڈؤل اۓ معاشی ادارہ آنی گون کثیر مُلکی ادارہ آنی اصلاح او آنہانر گیش مضبوط کھنغ اۓ ضرورت ایں ۔سۓ اوں سروک آنی ویچار اسا کہ ہمیں کثیر مُلکی ادارہ آنژ جہان آ باز نپ او کھٹ بیسا۔آنہی آ جہان آ ترقی او وشحالی آپا کثیر مُلکی سؤداگری نظام اۓ نپ او کھٹ او اہمیت چکا روژنائی ماکھُزا۔برکس شنگھائی تعاون تنظیم اۓ زریعہ آگو او رودرات آسیا سمٹ وڑ اۓ تنظیم آنگو جاگاہی او عالمی امن اواستحکام گیش کھنغ او آپسی ایں بستگی آ مضبوط کھنغ آپا سۓ اوں سروک آں بروبر بیٹھک کھنغ آپا ہم صلاحی پھیدھارتھا۔آنہاں نی ویچار اسا کہ ہمیں ادارہ آنژ دھشت گردی او آف او گواس اۓ بدلاؤ ڈؤل اۓ چیلنج آنی مقابلہ کھنغ آ مدد بی۔آنہاں اے دی گوشتا کہ اِشی آژ مُچھیں آپسی ایں ناوشی دی دیر کھنغ بیس بی آں۔ھِند اۓ سروزیر آ ہمیں ٹؤک چکا خاصین پکر آ پدھر کھُزا کہ ترقی کھُزغیں مُلک آنی وٹاژ وتی دعوی پھیلو نہ کھنغ اۓ سبب آژ ترقی اۓ مقصد آنر پھیلو کھنغ آ مشکل پھیزاغاں ۔رونشت مُلک خاص ڈؤل آگو امریکہ او آنہی سنگت آنی گُمان آنر دیر کھنغ آپا سۓ اوں مُلک آنی سروک آں گوشتا کہ آنہاں نی بیٹھک ھِچھ سۓ مُلک اۓ حلاف نعیں بلکہ آنہی مقصد جہان اۓ وشتری آ وتی عمل کھنگ ایں۔آنہاں گوشتا کہ روس ھِند او چین اۓ یک پھجی آ آئیغ یک وش آئیند گام ایں۔سۓ اوں مُلک آنی ویچار ایں کہ آنہاں نی وتی وتی جوانائی آنگو جہان آ استحکام پیدا کھنغ آ مدد مِلی۔آنہاں نی اے دی گُشغ ایں کہ آں عالمی معیشت اۓ ترقی آ دی خاصین عمل کھُز کھناں ہماں کہ بین الاقوامی نطام آپا سود مند ثابت بی۔آر آئی سی فورم اۓ سروک یا سرکارآں ای سبب آنی وجہ آگو بیٹھک نہ کھُزا حالانکہ ہمیں مُلک آنی ڈن اۓ وزیر آنی بیٹھک بروبر بی آنا آختغاں او آخیری ایں بیٹھک تہ ہمیں سال جون آ بیسغۓ سا۔جہان او عالمی معیشت چکا ہماں کہ اے وخت آ بے باوری اۓ حالت دیما ایں ،آنہی آ دیر کھنغ آپا آر آئی سی فورم یک شَر ایں فورم ایں ۔