08.12.2018

پاکستان اۓ سروزیر عمران خان آ ھِند اۓ پھجی آ گپتران اۓ عمل پدوارغ بنِا کھنغ اۓ ٹؤک کے ای دھکا کھُزا۔آنہی ویچار ایں کہ ہمیں ایکا دگ ایں ہمائی آگو دوایں مُلک آنی نیمگا مُچھیں ناوشی آ دیر کھنغ بیس بی ۔کرتار پور راھداری اۓ بُنشت ایر کھنغ اۓ تقریب اۓ نیمگا دی آنہی آ گپتران پدوارغ بنِا کھنغ اۓ ھِند آژ اپیل کھُزا۔آنہی آ ایزا تکا گوشتا کہ آنہی سرکار او پارٹی او پاکستانی پؤج ھِند اۓ پھجی آ سیال داری وشتر کھنغ آپا باڑہ ایں۔آنہی آ گوشتا کہ دھشت گرد آنر وتی عمل آنی آپا پاکستان اۓ سرڈغار آ استعمال کھنغ اۓ اجازت دۓ اغ مُلک اۓ مفاد آ نعیں او آں دھشت گرد آنر اینگا کھنغ اۓ اجازت نہ دا۔یک پوہ ایں مڑدم اے ٹؤک آ شَر ایں وڑا زانی کہ دو نیمغی وشتر سیال داری دوایں مُلک آنی عوام اۓ مفاد آ بی۔ہمیں ویچار آژ تہ عمران خان اۓ لپظ دانشمند ضرور آں ،مگن ڈغار اۓ اصلیت ھِچھ دوہمی ایں۔عمران خان آ ہماں وخت پاکستان اۓ سروزیر اۓ ڈؤل آگو عہدہ سنبھالتھا تہ سجوں آنژ سرا آنہی آ حافظ سعید اۓ سروکی والا تنظیم آنر دھشت گرد ٹلہ آنی لِسٹ آژ ہٹائینتھا۔اے تنظیم آں فلاح انسانیت فاؤنڈیشن او جماعت الدعوی ہماں ہانر حافظ سعید لشکر طیبہ اۓ جاگاہ استعمال کھنغین ۔زکر اۓ لائیق انت کہ حافظ سعید آ ہماں کہ ممبئی ھِلگر آنی ماستر مائینڈ ایں ،اقوام متحدہ آ عالمی دھشت گرد منسؤ ایر کھُزا او آنہی سغر چکا دھ ملین ڈالر اۓ انعام دی ایں ۔مگن آنہی باوجوت آں پاکستان آ آزاتی آگو تھرغیں ۔نہ چھڑوئی آ اے کہ آں پاکستان آ آزات ایں بلکہ آنہی پارٹی ملی مسلم لیگ آ گچین کاری مِڑغ اۓ اجازت داسؤ آنہی آ اصل ایں دھارہ آ آرغ اۓ کوشش کھُزی آ رؤغیں۔وتی سرکار اۓ سد روش پورا بی اغ آژ سرا ہی عمران خان آ ہمیں چند شکی ایں مدرسہ آنی چکا نگرانی ہٹائینتھا ہماں ہاں نی چکا اِشی آژ سری ایں سرکار اۓ وٹاژ نگرانی ایر کھُزی آ شُزغۓ سا۔آنہی ویچار ایں کہ مدرسہ آنر دھشت گردی آگو جوڑغ نہ لوٹھی۔چوش کہ آں شَر ایں وڑا آگو زانی کہ ہمیں ڈؤل اۓ چُنتی مدرسہ آنر مشکوک تنظیم آنی وٹاژ مالی واہریائی مِلغین او ہماں ہاں نی چکا مُچھیں جہان اۓ نیاہ مان ایں ۔اینگے ہی چُنتی مدرسہ آ چُکھ او ورنا آنر انتہا پسند کھنغ آپا آنہاں نی برین واشنگ کھُزی آ رؤ۔چوش کہ کرتار پور راھداری اۓ تقریب مزہبی اسا،مگن عمران خان آ کشمیر اۓ مسلہ آ کھڑو کھُزؤ آنہی آ سیاسی دیم دۓ اغ اۓ کوشش کھُزا۔آنہی اۓ ڈن اۓ وزیر شاہ محمود قریشی آ اے گوشتؤ تقریب اۓ اہمیت چکا سوال کھڑو کھُزا کہ راھراری بوژتھؤ عمران خان آ ھِند اۓ وٹا یک گگلی چھغل داسا او ھِند آنہی چکا آؤٹ بیسا۔نوخیں دلی آ آنہی یک دم تردید کھُزا۔پاکستان آ پوہ بی اغ لوٹھی کہ دھشت گردی ھِند آپا سجوں آنژ خاصیں ٹِک ایں ہماں روش پاکستان آژ دھشت گردی آسر بی ،ہماں روش گپتران اۓ عمل پدوارغ بنِا کھنغ آپا ھِند آمادہ بی۔