11.02.2019

ہ آمریکہ و طالبانی نمایندگانی نیاما بہ دوحہ تھا شش روچگین گپ و تران بہ اوگانستانئ قیام امن باروا تسر بوت و بہ آی باروا چرچہ بہ برزین کچانہ بوت و راز رازئ نظر و پکر و حیال بری بھرا درا بوتنت۔ نون ھم ای راز بہ رازین پکر و حیالانی سلسلہ رادگ انت و تجزیہ کارانی پکر و حیال ھم دیما آتگنت۔ رندا شہ دوحہ گیند و نیندان روسیہ تھا ھم اوگانستانئ اشرف مخالپ خیمہ سیاسین سربراھانی نیاما گپ و تران بوت و اختتام پذیر بوتنت مگہ نون ھم واضحین وڑئ گجام ھبرئ دیما نیاتگیت و بری وھدان اوگانستانئ تھا دھشت گردین ھلگرانی تھا ھم گجام کمی چما نیاتگیت۔ طالب نون ھم گریزان انت کہ گون اوگانستانئ اشرف غنئ سرکارئ گجام نمایندگئ گپ و تران کننت۔ ای ھبر پہ اوگانستانئ سنجیدہ ئن حلقہ آن بہ برزین کچانہ ناگوار انت۔ تہ ای کچانہ کہ جمھورین سدر اشرف غنی سَکین مخالپ ھم ای سیاست دانانی رویہ سَکین وڑئ تنقید کرتگنت ھما کہ گون طالبان بہ روسیہ تھا گپ و تران کرتگنت۔ آوان بری پکر و حیالا انت کہ ای مردم ھما مردم انت کہ بہ وتی سیاسین و ذاتین کٹانی غما انت کہ بہ گیچئن کاریانی تھا پہ آوان ٹکٹ داتگ بیت۔ بہر حال اوگانستانئ استمانئ دیما آوان جواب دیوک نہ انت۔
ھما مردمئ کہ طالبانی ای تجویز آ گوش دارگا بوتگنت و نون ھم کرار انت کہ رندا شہ آمریکہ پوجیانی یک نیمگ بیگا شہ اوگانستانئ اوگانئن پوجئ زرورت ھم بہ مُلکئ تھا الاس بیت۔ اوگانستانئ تھا سنجیدہ ئن حلقہ شہ طالبانی ای تجویز آ بہ برزین کچانہ بدگشی کرتگنت و سوشل میڈیائ تھا چو یک مزنئن جمگئ پھاد بوتگیت۔ بہ لفظین جنگ و قیاس آرا نیاما، طالبانی یک تفصیلین بیانئ ھم دیما آت، کہ شہ آی وجا امن مذاکرات و آی نتائج کنفیوژن دیگہ ھم گیش بوت۔ طالبانی گوشوک، ذبیح اللہ مجاھد بہ وتی بیانا گشتگیت کہ رندا شہ گپ و ترانان گون آمریکہ و سیمین واکان تہ نون گجام واضحین منصوبہ تیار نہ بوتہ کہ شہ آی نتیجہ گپتگ کننت و بہ پارٹیانی نیاما تعلی و شوری کم بیت۔ ذبیح اللہ بہ وتی بیانا گشتگیت ” ما مجبور انت کہ جنگ آ رادگ ساتنت پہ چہ کہ مئ دشمن مئ سرا ھلگر کننت و ما ھم بہ ھمائی پسوئ آ کاروائی کننت۔”
حالانکہ رندا شہ شش روچگین گپ و ترانان کہ بہ دوحہ تھا تسر بوتنت، آمریکہ خاسین نمایندگ بہ اوگانستانئ کاران ذلمئ خلیل زاد گشتنت کہ بہ امن و امانئ گپ و ترانان کہ گون طالبان تسر بوتگنت بہ برزین کچانہ دیمرئی ودی بوتگیت و طالب یک رازئ وعدہ و کئول پہ آمریکہ داتگنت کہ پہ آمریکہ اطمینانئ وڑ انت۔ ای ھبر یات کنگئ وڑ انت کہ بہ سپٹمبر ماہ واجہ خلیل زاد آ بری مشن آ مامور کرتنت کہ آ مصالحتئ ماحول آ جور کننت و پہ ایشی گون مختلفین پارٹیان گپ و تران کننت و شہ آ وھدہ تہ نون آوان گون چُنتی پارٹیان و حلقہ آن گپ و تران کرتگنت۔ بری سلسلہ آوان شہ پاکستان ھم دورہ کرتنت کہ آمریکہ وتی ای مزنتری جنگئ سلسلہ الاس کرتگ کنت کہ بہ آی تھا کم شہ کم دو و نیم ھزار پوجی تہ نون ھلاک بوتگنت۔ بہر حال شہ یک نیمگا آمریکہ ای مزنئن کوشست چما کائینت و دیگہ نیمگا بہ طالبانی رویہ ایچ وڑئ خاسین بدل بیگئ چما نیاتگیت۔ بہ مسکو گپ و ترانانی باروا طالبانی گوشوک ذبیح اللہ مجاھد گشتگیت کہ آدنا ھم گجام شرِّین گپ و ترانئ تسر نہ بوتگیت کہ شہ آی اشارہ گپتگ بیت کہ تعلی و شوری کمتر بوتگ کنت۔
مجاھد ھمی وڑا گشتگیت کہ طالب گپ و ترانا گون آمریکہ شہ وتی نیمگا بناہ کرتگنت۔ طالبانی کمانڈر بہ یک سوجئ پسوئ آ گشتگیت کہ دیم شہ آمریکہ ھلگرا ھم طالبان پہ آمریکہ گشتتنت کہ بہ جائ ایشی کہ جنگ آ بناہ کننت گپ و تران ھم کرتگ کننت۔ 
شہ ذبیح اللہ مجاھدیی بیانئ دیما، ۲۰۱۳ سالا پہ گپ و تران کنگا بہ دوحہ تھا وتی دپترا طالب پاچ کرتنت، مگہ آ وھدہ واشینگتنئ حکمران پہ گپ و تران کنگا تیار نہ اتنت وھدہ کہ آمریکہ پہ گپ و ترانا تیار بوت طالب ھم پہ دیوان کنگا تیار بوتنت۔ ذبیح اللہ بری ھبرئ سرا سَک بوتہ گشتگیت کہ بری بھرا پاکستانئ ایچ وڑئ رول نہ داشتگیت۔ و شہ اول سرا تہ آخر سرا طالبانی کوشست بوتگیت۔ ذبیح اللہ مجاھد ای ھبرئ حوالہ پاکستانئ ڈان نیوز داتگیت۔