پہ پاکستانئ حکومت آ پاکستانین حلقہ آنی صلاح۔

رندا شہ پولوامہ ھلگر آ و جیش محمدئ دھشت گردین کیمپانی سرئ ھوائین ھلگران، بین الاکوامین وڑئ، دھشت گردیئ حلاپا موثر کاروائی خاطرا پاکستانئ سرا زبردستین فشارئ کپتگیت شہ ای وجا نون پاکستانئ تھا ھم ای وڑئ توار پھاد بنت گون زور و شور آ کہ نون وھدہ رستگیت کہ پاکستانئ سرکار و ریاست و ھما ذموارین دپتر ای ھبر آ سَکین وڑئ محسوس کننت کہ نون آپ شہ سر آ گئوستگیت و نون ھم اگہ بہ دھشت گردیئ حلاپا اگہ گامئ زورتگ مہ بیت و انتھا پسندی اوشتارینتگ مہ بیت پاکستان وت وتی تباھی آ دعوت دیگا بیت۔ ای صلاح پہ حکومت آ سروکین سیاست کار، سفارتکار، میڈیائ کارکنوک و تجزیہ کار و منصف داتگنت ای راز نہ انت کہ بہ نونین حالتانی پس منظر آ ای وڑئ مشورہ داتگ بوتگیت۔ حکیکت و راستین ھبر ایش انت کہ پاکستانئ تھا، صائب حلقہ بہ دیم بہ دیمرئین عدم رواداری ۔ تعصب و انتھاپسندئ حلاپا وتی توار آ برز کننت و کوشست کرتنت کہ حکومت و سرکارئ توجہ آ بری بھرا جذب کننت کہ دیم شہ ایشی کہ حالات شہ کنٹرل آ ڈنا بنت حکومت و نفاذ کانون دپتر باید انت کہ صورتحال آ سرپھد بنت و شرّین گام بزورنت۔ ای راز ھما وھدہ آ ھم گشتگ بوت بہ ۲۰۰۸ سالا وھدہ کہ لشکر طیبہ دھشت گرد بہ ممبئ سرا ھلگر کرتنت و ھما وھدہ ھم وھدہ کہ آمریکہ اوسامہ بن لاڈن آ ودی کرت و آی را کشت۔ ای ھبر درا انت کہ وھدہ کہ شہ عالمئ ھر سیمئ ای توار برز بیت کہ پاکستان باید انت کہ بہ وتی منفی پالسیانی سرا نظرثانی کنت، گجام نہ گجام وجئ استیت۔ پاکستانئ پوجین انتطامیہ یک ستم ظریفی ایش انت کہ بہ کومین معاملاتان ھما حلقہ کہ باید انت کہ فیصلہ کننت پہ آوان وھدہ داتگ نہ بیت و گیر منتخب و گیر متعلقہ دپتر گون زور وتی ھبر آ منیننت۔ 
بہر حال، ای ھما راستین ھبر انت کہ شہ آی نہ تھانکا پاکستانئ استمان سی انت، بلکہ پورہ ئن عالم شہ ای راز آ سی انت۔ مگہ نونین وھدہ پاکستان یک اکتسادین بحران تھا گیر منتگیت و شہ ایشی وجا پاکستانئ تھا نون مردم پاکستانئ ناقص ئن ڈنئ کارانی پالسی و گیرزرورین مھمات پاکستان آ بہ یک جاگہ رسینتگیت کہ نون پورہ ئن عالم آی را شہ شکئ چما گیندیت۔ ھما چیزئ کہ پاکستان و آی استمان آ گون سَکیان دیم پہ دیم کرتگیت دھشت گردیئ سَکئ انت۔ پورہ ئن عالمئ تھا شہ پاکستان یک رازئ عکسئ جور بوتگیت کہ آ یک رازئ مُلکئ انت کہ پہ دھشت گردان پناہ دنت۔ و امنئن کودوگ دنت۔ بہ ھمی دپ دیگانی پس منظر آ پاکستانئ یک گڈین سفیر برائ آمریکہ واجہ حسین حقانی کہ چُنتی کیتاب ھم لیکتگنت گشتنت کہ شہ پاکستانئ بدکسمتی آ انت کہ نونین وھدہ یک مُلکئ ھم شہ آی نیمہ داری نہ کنت۔
بہ نونین وھدان پاکستانئ تھا، بیان بازی و جارحانہ و کوم پرستین بیانانی سلسلہ رادگ انت و شہ خوف و تروسئ وجا مردم گون احتیاط وتی دپا پاچ کننت، ای وڑئ ماحولئ تھا ھم صائب حلقہ وتی توارا برز کنگئ وھدہ پس و پیش نہ کننت و تروسئ نہ دارنت۔ چُنتی معتبرین ھال بہ وتی اداریہ آنی تھا لیکتگنت و پہ سرکار آ مشورہ و صلاح داتگنت کہ آ ھر وڑئ دھشت گردی و انتھا پسندی آ شہ نیاما زورنت و شرّین وڑئ بہ آی حلاپا کاروائی کننت۔ پہ چہ کہ پاکستانئ امن و بقا و سیکورٹئ بہ آی وابستہ انت۔ بہ پنچ مارچ اداریہ کہ شہ کثیرالاشاعت و موقر ھال ڈان نیمگا شینک بوتہ کہ پاکستان باید انت کہ بہ دھشت گردیی و انتھاپسندئ حلاپا ای جنگا پہ وتی امن و سیکورٹی و بقا دیما بارت۔ بری بھرا ڈان کومین ایکشن پلان مثال آ ھم داتگیت و گشتگیت کہ ای پلان نہ تھانکا گون سیاسین تپاک رائی آ وضع بوتہ بلکہ بین ادارتی تپاک رائی ھم مظھر انت۔ بری ایکشن پلان تھا لیکتگ بوتگیت کہ ھر وڑئ دھشت گردیی آ انتھاپسندئ حلاپا و نفرت آمیز ئن تقریر و تحریر حلاپا موثر و شرّین کاروائی باید انت کہ تسر بیت۔ ای ھبر یات کنگئ وڑ انت کہ کومین ایکشن پلان وھدہ جور بوتت وھدہ کہ پشاور پوجین پبلک اسکولئ سرا دھشت گرد ھلگر کرتنت و کم شہ کم ۱۵۰ مردمانی کشگئ وج بوتنت کہ شہ آوان کم شہ کم ۱۳۰ کسانین زاگ اتنت۔ شہ ڈان ھالانی ھبرانی دیما پاکستان پہ وتی بقا و سیکورٹی ا باید انت کہ دھشت گردیی و انتھا پسندئ حلاپا شرّین و سَکین کاروائی کنت۔