پاکستان نون ھم نہ لوٹیت وتی حکمت عملی آ بدل کنت۔ 

انچین وھدہ کہ پاکستانئ حکومت دھشت گردین تنظیمانی حلاپا کاروائی کنگئ دعوئ داریت و دعوئ داریت کہ آ جیش محمدئ سربراہ مسعود اظھریی براس و برازاکا ھور چُنتی مردمانا بہ حراستا گپتگیت، پاکستانئ پوجئ یک گوشوکئ بیانئ دیما آتگیت کہ ای مُلکئ تھا جیش محمدئ گجام وجودئ نہ انت۔ نون بہ مارچ ۶ تاریخا، پوجئ گوشوک، میجر جنرل آصف غفور ای بیان حیرانی سبب بوتہ و مُچانا شوکہ کرتگیت۔ راستین ھبر ایش انت کہ ای وڑا پاکستانئ حکومت و خاسین وڑئ پوج وتی غلط و مکروہ بیانئ دیگہ مثال را پیش کرتگنت و بری پکر و حیالا انت کہ نونین وھدہ آ ھم بہ عالمین عائی عامہ چمانی تھا ھاک پاش داتگ کننت۔ پوجئ گوشوکئ ای بیان بہ یک وھدہ دیما آتگیت کہ مُلکئ ڈنئ کارانی وزیر واجہ شاہ محمود قریشی وت بہ یک انٹریو تھا تسلیم بوتگنت کہ جیش محمد و مسعود اظھر دوکین پاکستانئ تھا موجود انت۔ پوجئ گوشوکئ ای مضحکہ خیزین بیان چی وڑئ حیثیتئ داریت وھدہ کہ عالمین براسداری آی ای دعوئ ایچ وڑئ منگا نہ انت۔ یک نیمگا آمریکہ، برطانیہ ھور گون فرانس بہ بین الاکوامین کونسلئ سیکورٹی کونسلئ تھا تیاری گپتگنت کہ بہ مسعود اظھرئ حلاپا معاھدہ دیما کننت و ھمی وھدہ بہ دیگہ نیمگا، پاکستانئ خیرخواہ چین ھم بری سوجئ بھرا کرار و خاموش انت۔ اگہ چین ای معاھدہ ویٹو ھم کنت، باز ھم بین الاکوامین کونسل نیاما پاکستانئ حیثیت معتوب مانیت و ھور گون آی آی اکتسادین و مالین حالاتانی جور بیگ امیت کم مانیت۔

نون بری جاگہ کہ پاکستان چو یک کوم و یک مُلکئ اوشتاتگیت چُنت ھبر غور کنگئ وڑ انت۔ یک ھبرئ ایش انت کہ نون پوج نہ تھانکا ریاست تھا یک ریاستئ حیثیت آ داریت بلکہ مُچین سیاست کارانا ھم چو یک عروسکئ آوانی سرا چاپ کنت۔

دومی ھبر ایش کہ، نونین روچا پاکستان یک رازئ مرحلہ تھا رستگیت کہ پہ وتی گڈین وامانی الاس کنگا نوکین وام کنگئ مجبوری آی سرا کپتگیت و بہ اکتسادین زوانان ایشی را وام و کرزئ جال گشنت۔ نونین صورتحال ایش انت کہ پہ پاکستان نوکین وام و کرزانی کنگئ چانس و احتمالات ھم کم بیگا انت۔

سومی ھبر ایش کہ، مُلکئ سالینہ ئن بجٹ ئ کم شہ کم سہ کوت بہ دو بھران خرچ بیت، نام نھادین دپاع و کرز حذمتانی سرا کرزئ سود و اصلین اشمارئ ادائیگی مزنئن مسئلہ بری مُلکئ تھا جور بوتگنت۔ بری وڑئ صورتحال آ پہ مُلک آ پہ فلاح و پیداورئ کارانی چینکس زرّ مانیت، ایشی کچانہ آسانین وڑئ جتگ بیت۔

ای صورتحال پہ چہ ودی بوتگیت؟ یک جوابئ پہ ایشی است، دشمنی گون ھندوستان۔ ۱۹۶۵ سالا، آ وھدہ ڈنئ کارانی وزیر ذولفغار علی بھٹو گشتت کہ آی مُلک گون ھندوستان یک ھزار سال لڑگا بیت۔ مگہ ای پکر و حیالئ کٹا پوج برت۔ پوجئ معاملاتانی تھا اگہ گجام مردمئ دست مان دنت، آ برداشت کرتگ نہ کنت۔ ۱۹۷۱ سالا، پاکستان دو ٹوکور بیگ آ برداشت کرتگ کرت، مگہ وتی مفاد آ ایچ وھدہ کربان کرتگ نہ کرت۔ یک گیچئن بوتگین سرئ وزیر آ دار جنگئ حکمئ دیگئ تھا ھم گجام پس و پیشئ نہ کرت۔

مُلکئ تھا تھانکا پہ گشنتا یک جمھورین نظامئ انت، مگہ ما ایشی را بہ جمھوریت آ تعبیر کرتگ کننت؟ پاکستانئ اعلئ ئن پوجئ اپسر و خصوصین مفاد دارین سیاست کار ای آچئ را کہ جتگنت ایشی تھا ھما مُلکئ عوام دیدئ سوچنت۔

بری وھدان، و خاسین وڑئ رندا شہ گڈین ھپتگانی دپ دیگان ای ھبر پورہ ئن وڑئ ثابت بوتگیت کہ اگرچہ پوجئ ذمہ شہ مُلکا دپاع کنگ انت مگہ پاکستانئ تھا پوج یک سوپر اسٹیٹ جور بوتگیت و بری وھدہ آ گجام بدلینگئ نہ لوٹیت کہ بیاریت۔ دیگہ نیمگا، آ وتی برترین حیثیت آ ساتتنئ وجا گون ھندوستان دشمنی آ الاس کنگا تیار نہ انت بلکہ آ بری پکر و حیالا انت کہ دھشت گردیی آی مُلکئ ڈنئ کارانی یک پالسئ کوتئ انت۔ تہ نون گجام سیاست کارئ دیما نیاتگیت کہ پوجئ من مانیانا اوشتارینگا بیت و مُلک آ دیم بہ فلاحیت و دیمرئیا بارت۔ مگہ ادنا ای ھبر یات کنگئ وڑ انت کہ بہ ۱۹۷۰ تہ ۸۰ سالان پاکستان یک عامین ترقی پذیرین مُلکئ ات کہ آی فی کس آمدنی شہ ھندوستان دیما ات مگہ نونین روچا تہ یک کچانہ پھدا منتگیت کہ اگہ آمریکائین ڈالر ۲۰۰۵ سالا ۵۸ پاکستانی روپی برابیر آ ات نونین روچا آمریکائین ڈالر بہ ۱۴۷ پاکستانی روپئ برابیر آ انت۔