09.03.2019

پاکستان اۓ مالیاتی سیکریتری عارف احمد خان آ وتی سرکار آ پدھر ایں لپظ آنی اندرا تھنبہ کھُزا کہ اگر پاکستان آ مالیاتی نظام آ دھشت گردی آژ پاک ایر کھنغ او منی لانڈرنگ اۓ مانیترنگ کھنغ والا بین الاقوامی تنظیم فنائینشل ایکشن ٹاسک فورس اۓ تجویز آنژ چھم چھرینتھغاں او آنہی چکا عمل نہ کھُزئی تہ مُلک آ سَک معاشی پابندی دیما کھنغی بیس بی آں ۔ہمیں پابندی آنژ بھچغی بی ہمائی آ ممنوعہ تنظیم آنی حلاف کاروائی آ تیز کھنغ اوار ایں۔ایف اے ٹی ایف اۓ انترنیشنل کوآپریشن ریوو گروپ (آئی سی آر جی)اۓ پیرس آ گوستی ایں روش آں بیٹھک بیسا۔بیٹھک آ ایف اے ٹی ایف آ جنوری ۲۰۱۹ آپا طۓ کھُزی ایں نشانہ آنی بارو آ پاکستان اۓ عمل آنژ بے اطمینانی او ہماں ہشت باز خطر ناک تنظیم آنی حلاپ کاروائی کھنغ آپا گوشتی آ شُزغۓ سا آنہانر پاکستانی اسٹیبلشمنٹ اۓ وتاژ کھمیں خطرناک پوہ بی اغ چکا پکر آ پدھر کھُزا۔ایف اے ٹی ایف آ پاکستان آ ایکشن پلان چکا عمل کھنغ وا استریتجک کمی آنر دیر کھنغ آپا مئی ۲۰۱۹ تک اۓ وخت داسا ہمائی آ ناسوبی اۓ صورت آ جون ۲۰۱۹ آ آنہی حلاپ کاروائی کھنغ بیس بی۔اے ٹؤک زکر اۓ لائیق انت کہ ایف اے ٹی ایف آ پاکستان آ گوستی ایں سال گرے لسٹ آ اوار کھُزؤ،آنہی آژ منی لانڈرنگ ،دھشت گردی آپا مالی وسیلہ آنی دۓ اغ آ دارغ آپا گوشتغۓ سا مگن پاکستان ہمیں گام گیج کھنغ آ ناسوب رہسا۔گوستی ایں پنچ شمبھے آ آسر بی اغ والا چھیارروشہ جائیزہ اجلاس اۓ نیمگا ھِند آ پاکستان آ کالعدم تنظیم آنی بی اغ اۓ مسلہ زُڑتھا او پلوامہ ھِلگر اۓ حوالہ داسؤ پاکستان آ بلیک لسٹ کھنغ اۓ مطالبہ کھُزئی۔اجلاس آ پھدا جاری وتی پیرا آ ایف اے ٹی ایف آ گوشتا کہ پاکستان آ اے ثابت کھنغی بی کہ آں منی لانڈرنگ او دھشت گردی آپا مالی وسیلہ آنی دۓ اغ آ دارغ آپا پابندی جھنغ،زر آنی غیر قانونی ترسیل اۓ بارو آ معلوم کھنغ آپا حاکم آنی نیمگا بستگی آ وشتری،او دیگر گام گیج کھنغیں۔زانتکار آنی گُشغ ایں کہ اگر پاکستان ہمیں ایکشن پلان چکا مقرر کھُزی ایں وخت چکا عمل کھنغ آ ناسوب رہسا تہ ایف اے ٹی ایف آژ،بلیک لسٹ،بیس بی ہمائی نتیجہ آ پاکستان آ اقتصادی پابندی او بین الاقوامی مالیاتی نظام تکا پُجھغ مشکل بی۔پاکستان آ کم چہ کم نی ہمیں ٹؤک آ پوہ بی اغ لوٹھی کہ آں دھوکہ او فریب اۓ لیو گیش عرصہ تکا جاری ایر کھُز نہ کھنت۔آخیر اے کھسے آژ دی لکسی آ نعیں کہ ممبئی ھِلگر اۓ ڈوہی نی دی آزات تھرغیں۔اِشی آژ کَل بی کہ پاکستان آ سیاسی سروک او پؤج او خفیہ ایجنسی آنی پھجی پھجی آ ہموزا اۓ عدالت دی دھشت گرد آنی چکا مہروان آں۔پاکستان اۓ عمران خان سرکار آر لوتھی کہ آنہی مالیاتی سیکریتری آ ہماں ردیں حالت آنی احساس کھنائینتھا آنہی چکا تِکھائی آ ویچار کھنت ورنہ آنہی نوخیں پاکستان کہنیں پاکستان آژ دی بدتر بی۔