10.03.2019

پلوامہ دپ آ پھدا ھِند او پاکستان اۓ نیمگا نی اں روش آں ہماں کہ عسکری جھیڑو بیسا آنہی آژ اے اصلیت دیما آختا کہ ھِند اۓ جمہوری طاغت اۓ وڑا آنہی پؤجی طاغت او سفارتی استعداد آر دی مُچھیں جہان آ عزت و احترام اۓ نیاہ آژ دیستی آ رؤغیں۔اسلامی مُلک آنی تنظیم آرگنئیزیشن آف اسلامک کو آپریشن یعنی او آئی سی آ پاکستان اۓ بروبر احتجاج اۓ باوجوت ھِند اۓ خاصیں مزمان اۓ وڑا لوٹھائینغ ،چین،سعودی عرب او روس اۓ وڑ اۓ سنگت مُلک آنی وٹاژ پاکستان آ ھِند اۓ حلاپ ھِچھ وڑ اۓ واہریائی نہ مِلغ او جہانی براسی اۓ ھِند اۓ ہماں دعوی آنی سُچائی چکا باور کھنغ کہ پاکستان مروشی دی عالمی و جاگاہی دھشت گرد تنظیم آنی واہریا بی سی ایں اینگے علامت آں ہمائی آژ پاکستان اۓ ایکا کھوغ اۓ تصدیق بیسا۔ھِند پؤجی حکمران یا ڈکٹیٹر آنی انگل آنی چھاپ جھنغ والا مملکت نعیں بلکہ جہان اۓ یک عظیم جمہوری طاغت ایں۔ھِند اۓ پؤج پاکستان اۓ برعکس وتی مُلک اۓ جمہوری نظام اۓ مالک و مختار نعیں بلکہ محافظ ایں۔ھِند آ جمہوریت پؤج اۓ کمان آ کار نہ کھنت۔آنہی پؤج اۓ کمان عوام او آنہی گچین کھُزی ایں نمائیندگ آنی دست آ بی او ھِچھ وڑ اۓ سیاسی مصلحت آژ بے نیاز بیسؤ آں قومی سرکار او عوام اۓ ضرورت او لوٹھغ آنی روگا کار کھنت۔پاکستان اۓ بد بختی اِش انت کہ مُلک اۓ قیام اۓ بُنگیجی چند سال آنر اِلسؤ نی تک اۓ شست سال آنی اندرا آنہی پؤج بروبر عوام اۓ سغر چکا زوار ایں۔گُشغ آپا مُلک آ کے ای دھکا گچین کاری بیسا،جمہوری سرکار دی گچین بیسا،مگن سرکار اۓ مُچھیں واگ سرا آژ اعلی پؤجی آنی دست آ رہسا۔اے ثبوت ایں ہمیں ٹؤک اۓ کہ پاکستان آ پؤج سماج اۓ محافظ نعیں بلکہ وتی اندرا وا یک سماج ایں۔پاکستان بنیاتی ایں ڈؤل چکا دو ہی سماج آنی مُلک ایں۔یک عوامی یا شہری سماج او دوہمی پؤجی سماج۔یک دوہمی مزن ایں فرق دوایں مُلک او آنہاں نی پؤج آ اِش انت کہ ھِند پؤج ہر حد تکا مڑدمی حق آنی لحاظ کھنت۔پاکستان اۓ پؤجی اپسر آنی بارو آ ہمیں وڑ اۓ تادینی سلوخ اۓ ویچار کھنغ دی محال ایں۔