11.03.2019

پاکستان آژ مِلغ والا ایں حبر آنژ چھی اے اینگے اشارہ مِلغاں کہ لشکر طیبہ او جیش محمد ڈؤل اۓ چُنتی اینگے دہشت گرد تنظیم آنی حلاپ سخت کاروائی کھنغ اۓ تیاری بنِا بیسغاں ہماں ہانر اقوام متحدہ اۓ سیکیورتی کونسل اۓ وتاژ خطرناک ٹلہ منسی آ شُزا۔ھِند آ ہمیں بارو آ پاکستان اۓ نیت چکا گُمان ضرور پدھر کھُزا ہماں کہ بے وجہ نعیں پھرچھے کہ اِشی آژ سرا دی چُنتی ٹلہ آنی حلاپ کاروائی کھنغ اۓ فیصلہ بیسا مگن ہر دھکا آں مُچھیں ٹؤک چھڑوئی آ پھیدھارغ اۓ ثابت بیسگاں۔پھرچھے کہ پاکستان آ خلوص او سنجیدگی آگو ھِچھ نہ کھُزغۓ سا مگن نی ایں دپ آنی پس منظر آ ہماں کہ نوخیں حبر اُش کھنغ آ پھیزاغاں آنہی آژ اے اٹکل بی سا کہ ودھسغیں عالمی زور او وا پاکستان اۓ سنگت مُلک آنی پاکستان آپا بدل بیسغیں ویچار آ پاکستان آ چھی اے گام زیرغ آپا لاچار کھُزا۔اگر ہمیں حبر آنی اندرا سچائی ایں تہ ھِند باور آگو پاکستان اۓ وٹاژ کھنغ والا گام آنی وشادگی کھنت۔پاکستان اۓ بارو آ سجوں آنژ مزن ایں شکایت اے رہسا کہ آں ہمیں دھشت گرد آنی حلاپ ھِچھ مزن ایں کاروئی نہ کھنت ہماں کہ ہمسائیگ مُلک آنر غیر مستحکم کھنغ آپا پاکستان آژ منصوبہ ٹھائیناں او آنہانر اینگا کھنغ اۓ مُچھیں آزاتی مِلسی ایں۔پاکستان آژ ہماں کہ حبر پھیزاغاں آنہی آژ اے اٹکل بی سا کہ وا پاکستان اۓ باز اعلی اپسر او سفارتکار ہماں کہ عالمی براوری او عالمی ادارہ آنی پاکستان آپا بدل بیسغیں سلوخ گِندغیں آں پاکستان اۓ سرکار آ اے مشورہ دۓ غاں کہ اگر پاکستان آ نی دی ھِچھ گام نہ زُڑتھا تہ نہ چھڑوئی آ عالمی براسی آ آں بالکل ایکا بی بلکہ آنہی معاشی حالت ہمیختر ردین بی رؤ کہ آنہی درا بی اغ مشکل بی ۔عالمی مالیاتی ادارہ آنژ آنہی آ قرض مِلغ بند بی رؤ۔چھڑوئی آ چند سنگت مُلک آنی اوٹ آنہی معیشت مستحکم کھُز نہ کھنت۔پاکستان اۓ اخبار دان اۓ یک رپورٹ اۓ روگا سرکار اۓ معتبر زریعہ آں نام پدھر نہ کھنغ اۓ شرط چکا اے ڈسسا کہ سرکار باز سنجیدگی آگو داعش،القاعدہ،جماعتالدعوہ،فلاحانسانیتفاؤنڈیشن،لشکرطیبہ،جیش محمد،حقانی نیٹورک او طالبان آگو جُڑسی این چُنتی مڑدم آنی حلاپ کاروائی کھنت۔آنہی پھدا پنیاتی ایں سبب اِش انت کہ ۱۸ تا ۲۰ فروری تکا پیرس آ فائینینشل ایکشن ٹاسک فورس اۓ ہماں کہ بیٹھک بیسا آنہی آ ہمیں ٹؤک چکا باز چرچہ رہسا کہ پاکستان آ ممنوعہ تنظیم آنی ھلاپ نی تکا ہماں کہ کاروائی کھُزا آں ناکافی اسا ۔ہمیں خاطرہ ایف اے ٹی اے ،اۓ سخت ایں سلوخ آر دیستؤ سرکاری حلقہ آنی نیمگا اُتھل پُتھل پیدا بیسا او پاکستان اۓ مالیاتی سیکریتری اۓ سروکی آ کے ای بیٹھک بیسگاں ہمائی آ اے فیصلہ کھُزی آ شُزا کہ ریاست اۓ مُچھیں متعلقہ ادارہ او ایجنسی ممنوعہ ٹلہ آنی مالی لین دین ،فنڈ او اکاؤنت اۓ پٹ او پھول کھنت ۔ہمیں حبر آنژ اے اٹکل بی کہ چھی اے سنجیدہ عمل آنی اشارہ مِلغاں۔