12.03.2019

سعودی عرب اۓ ولی عہد محمد بن سلمان اۓ ھِند اۓ دؤرہ اۓ یک دم پھدا ہماں مُلک اۓ ڈن اۓ وزیر عادل الجبیر اۓ دؤرہ دوایں مُلک آنی نیمگا سیال داری آپا باز شَر ایں۔ھِند اۓ ڈن اۓ وزارت اۓ روگا سعودی وزیر آ ہماں مسلہ آنی دیم روی چکا جائیزہ آپا نوخیں دلی اۓ دؤرہ کھُزغۓ سا ہمائی چکا گوستی روش آں ولی عہد شہزادہ اۓ دؤرہ آ ویچار بیسغۓ سا۔وتی دؤرہ آ الجبیر آ سروزیر نریندر مودی آگو بیٹھک کھُزا او وتی ھِند ہم منصب سشما سوراج اۓ پھجی آ دی گپتران کھُزئی۔دلچسپ ایں ٹؤک اِش انت کہ وزیر آ ابو ظہبی آ او آئی سی اۓ ڈن اۓ وزیر آنی کاؤنسل اۓ آسر بی اغ والا ایں اجلاس اۓ موقع چکا وتی ھِند ہم منصب آگو بیٹھک کھُزغۓ سا۔ویچار کھنغ اۓ لائیق انت کہ ہمیں اجلاس آ ھِند آ خاصیں مزمان اۓ وڑا کانڈھ داسی آ شُزغۓ سا۔ھِند او سعودی عرب اۓ سروک آنی نیمگا گپتران اۓ سلسلہ ہمیں وٹا اشارہ کھنت کہ ہڑ دوایں مُلک دو وٹی ایں سیال داری آ ودھینغ آپا باڑہ آں۔ھِند او سعودی عرب اۓ نیمگا معاشی سیال داری باز مضبوط ایں او دو ہزار ہپدھ۔ہژدھ اۓ مالی سال اۓ نیمگا دوایں مُلک آنی نیمگا سؤداگری ۲۷ اعشاریہ پنچ ارب ڈالر اۓ اسا۔دوایں مُلک آنہی آ گیش ودھینغ آپا باڑہ آں۔سعودی عرب ہماں پنچ مزنیں مُلک آنژ یک ایں ہماں ہاں گو ھِند اۓ سؤداگری سجوں آنژ گیش ایں۔ایزا اے ٹؤک دی ویچار کھنغ اۓ لائیق انت کہ گوستی ایں پنچ سال آنی اندرا ھِند بازار آ سرمایہ کاری کھنغ والا مزن ایں مُلک آ اوار بیسا۔سعودی ولی عہد محمد بن سلمان اۓ نوخیں دلی اۓ نی ایں دؤرہ اۓ نیمگا سعودی عرب آ اشارہ داسغۓ سا کہ آں ھِند آ سرمایہ کاری گیش کھنغ آ باڑہ ایں او آؤخیں چند سال آنی اندرا ھِند معیشت اۓ جتا شعبہ آ سد ارب ڈالر اۓ سرمایہ کاری کھنغ بیس بی۔دؤرہ اۓ نیمگا نیشنل انویستمنت اینڈ انفرااسترکچر فنڈ آ دی سعودی سرمایہ کاری اۓ گُمان آنی جائیزہ گِتی آ شُزا۔دھشت گردی اۓ مقابلہ کھنغ آپا دی سعودی عرب ھِند اۓ سنگتی کھنغیں۔نومبر ۲۰۰۸ آ ممبئی ھِلگر اۓ زمہ وار مڑدم آنژ یک فصیح محمد سعودی عرب پھَداسؤ شُزغۓ سا ۔ہماں وخت نوخیں دلی آ ریاض آ آنہی اۓ ممبئی ھِلگر آ اوار بی اغ اۓ شواھد پیش کھُزا او آنہی آ ھِند اۓ حوالہ کھنغ آپا گوشتئی تہ ریاض آ اینگا کھنغ آ ھِچھ دیری نہ کھُزا۔نی ایں سال آ دوایں مُلک آنی نیمگا دپاع او سلامتی اۓ شعبہ آ دی سیال داری باز وشتر بیسا۔دوایں مُلک آں مشترکہ پؤجی مشق کھنغ آپا دی ہم صلاحی پھیدھارتھا۔ھِند یک جاگاہی او اسلامی طاغت اۓ ڈؤل چکا سعودی عرب اۓ کردار اۓ وشادگی کھنت۔ھِند او سعودی عرب آ بلا فرق مُچھیں دھشت گرد آنی حلاپ مِلسؤ کاروائی کھنغ اۓ فیصلہ کھُزا۔