بہ بین الاکوامین کونسلئ صلاح پہ مسعود اظھرئ عالمین دھشت گردئ نامئ دیگئ بھرا چینئ ویٹو

پاکستانئ تھئ دھشت گردین تنظیم جیش محمدئ سربراہ مسعود اظھر آ عالمین دھشت گردئ نام دیگئ صلاح کہ بہ بین الاکوامین کونسلئ سیکورٹئ کونسل تھا دیما بوتہ چین یک وارئ دیگہ شہ ویٹو آ کٹ گپتگیت و یک وارئ دیگہ آی را رکینتگیت۔ ایش ششمی وار انت کہ ای راز بوتگیت۔ ای ھبر یات کنگئ وڑ انت کہ جیش محمد تنظیم پولوامہ تھا تسر بوتگین دھشت گردین ھلگرئ ذموار انت کہ بہ آی تھا کم شہ کم ۴۰ سی آر پی اف جوان کشتگ بوتنت کہ شہ آی وجا بہ ھندوستان و پاکستان نیاما سَکی گیش بوتنت۔ پہ اظھر عالمین دھشت گردئ نام دیگئ صلاح آمریکہ، برطانیہ و فرانس دیما کرتنت۔ ھندوستان وتی افسوس آ بری بھرا درا کرتگیت کہ بری صلاح سرا چین شہ وتی حق تنسیخ آ کٹ گپتگیت۔
 
حکیکت ایش انت کہ چین پاکستانئ نزیکین سنگٹئ انت۔ شہ پاکستان پہ چین بہ برزین کچانہ مدد بیت۔ تجزیہ کار بری پکر و حیالا انت کہ چین بری بھرا بہ تشویش انت کہ اگہ بہ اظھرئ مسئلہ بھرا آ گون بین الاکوامین براسداری آ یکئ بیت بہ چین – پاکستان اکتسادین راھدارئ دیما سَکی ودی بنت آ ھمی وڑا ای ھبرئ تروس آ ھم داریت کہ اگہ آ ای راز کنت جیش محمد بہ آی شورش جتگین مسلمانانی شن جیانگ صوبہ عسکریت پسندی آ دیمرئی دیگئ بھرا گام زورتگ کنت۔
 
تہ جائ کہ پاکستانئ ھبر انت جیش محمدئ تنظیمئ بھرا شہ دو روئی آ کار گرنت۔ بری مسئلہ بھرا مُلکئ شھرین انتظامیہ یک چیزئ گشیت و پوجی اسٹبلیشمنٹ دیگہ چیزئ گشیت۔ رندا شہ پولوامہ ھلگرا ھندوستانئ ھوائین پوج بہ بالاکوٹ سرا گیرپوجین کاروائی کرت و رندا شہ آ کاروائی آ دوکین متضاد ئن بیان دارنت۔ پاکستانئ ڈنئ کارانی وزیر واجہ شاہ محمود قریشی اولی وار اعتراف کرتنت کہ مسعود اظھر بہ پاکستانئ تھا انت و حکومت بہ آی رابطہ انت۔ آوان گشتنت کہ آ بہ برزین کچانہ علیل انت و شہ گئسا ڈنا در بوتگ نہ کننت۔ مگہ پوجئ گوشوک میجر جنرل آصف غفور انکار کرتگنت کہ جیش محمد بہ پاکستانئ تھا موجود انت۔ ھما دم رندا شہ پولوامہ ھلگر آ سرئ وزیر واجہ عمران خان گشتنت کہ اگہ نوکین دھلی شرّین و سَکین کاروائی ثبوت فراھم کنت آ پٹ و پول کرتگ کننت کہ بہ آ ھلگرا جیش محمد کوت داشتگیت یا نہ۔ عامین مردمانا گمراہ کنگئ وجا عمران خان ای ھبرا یک وار نہ بلکہ چُنتی وار گشتنت۔ مگہ جیش محمد ھلگرئ ذمواری آ وت کبول کرتگیت سرئ ایشی اسلام آباد بہ آی حلاپا گجام کاروائی نہ کرت۔
 
جیش محمد در حکیکت پہ پاکستان یک اثاثہ انت۔ بہ ھمی وھدان پاکستانئ گڈین سدر جنرل پرویز مشرف گشتنت کہ دھشت گردین تنظیم بہ پاکستانئ تھا موجود انت کہ شہ آوان بہ ھندوستانئ حلاپا ھلگر کنگا کٹ گپتگ بیت۔ آوان ای دعوئ داشتنت کہ دھشت گردین تنظیم دو وار بہ آوانی سرا ھم ھلگر کرتنت مگہ آ رکینتگ کرتنت وترا۔ پاکستانئ حکومتئ ای دعوا کہ آ وتی وعدہ آنا کہ بہ فائنانشیل ایکشن ٹاسک فورس آ داتگیت پورہ کنت و بہ کومین ایکشن پلان سیائگا بہ دھشت گردانی حلاپا کاروائی کنت  تھانکا یک ڈھوکسلا انت و دیگہ چیزئ نہ انت۔
 
ای یک حکیکتئ انت کہ بہ دھشت گرد و دھشت گردین ڈلانی حلاپئ کاروائی ا پاکستانئ ایچ وھدہ سنجیدہ معلوم نہ بوتہ۔ رندا شہ ۲۶ نومبرئ ھلگران کہ بہ ۲۰۰۸ سالا بہ ممبئ تھا تسر بوتنت اسلام آباد حتئ انکار کرت کہ اجمعل قصاب پاکستانئ انت۔ قصاب آ بہ ھلگرانی وھدہ گرفتار کرتنت وھدہ کہ دیگہ ھلگرکنوک کشتگ بوتنت۔ رندا شہ ایشی کہ بہ قصاب حلاپا مقدمہ تسر بوت آی دار جنگئ حکم داتگ بوت  و بالاخرہ آ دار جتگ بوت۔ مگہ رندا شہ ایشی کہ عالمین میڈیا ای ھبرا ثابت کرت کہ اجمل قصاب شہ پاکستان ات رندا اسلام آباد تسلیم بوت بہ حکیکت آ۔
 
ھندوستان بہ بین الاکوامین کونسلئ تھا سیمین دھشت گردئ مسئلہ چُنتی وار دیما کرتگنت، مگہ تہ وھدہ کہ مزنئن مُلک پہ پاکستان سَکین پیگامئ مہ دینت پاکستان گجام کاروائی نہ کنت۔ چین سیکورٹئ کونسلئ یک ذموارین مستقلین باسکئ انت۔ آ باید انت بہ دھشت گردئ لعنت گار کنگئ بھرا ذموارانہ ئن وڑئ گام زوریت