سرگال : پاکستان آ ہزارا شیعہ آنی دڑد 

پاکستان آ دھشت گردی اۓ کے ای رنگ او کے ای دیم آں ۔پاکستانی پؤج او ایجنسی آں چھی اے خاصیں حالت آنی اندرا ہمسائیگ مُلک افغانستان او ھِند اۓ حلاپ دھشت گرد ٹلہ آنی واہریائی کھُزا مگن اے سلسلہ چھڑوئی آ ہمسائیگ مُلک آنی اندرا کھنغ والا مُہم جوئی تکا محدود نہ رہسا۔ہماں مزن ایں پھیمانہ چکا عسکریت پسندی اۓ وٹا پاکستان اۓ یک مزن ایں حلقہ آ چھِکسی آ شُزا او ہماں وڑا مزہبی انتہا پسندی اۓ سغر چکا زُوار بیسؤ مسلکی نفرت گیش بی غیں ،آنہی آ آخیر یک اینگے درشک اۓ دیم گِتا ہمائی پاڑ آر گُڈغ پاکستان اۓ دست اۓ ٹؤک مان نیاۓ۔دہشت گردی اۓ یک دیم مسلکی نفرت اۓ بنِشت چکا بی اغ والا حون ریزی دی ایں۔سپاہ صحابہ او لشکر جھنگوی ڈؤل اۓ تنظیم پاکستان آ سرا آژ ہی ودھغاں ۔اے شیعہ فرقہ اۓ مسلمان آنر غیر مسلمان ایزا تکا کہ کافر دی منی۔پاکستان آ مسلکی بنشت چکا کھاۓ روش حون ریزی او بم گواری اۓ حبر کھاۓ۔یک رحجان اینگے دی گِندغ آ آختا کہ عین جمعہ اۓ روش ہماں وخت نماز آنی مُچھی بی،مسیت آنی چکا ھِلگر بی تاکہ گیش آژ گیش مڑدم مِراں۔مسلکی بنشت چکا ہماں کہ تنظیم پاکستان اندرا کار کھنغیں،آنہی آ چھی اے آنر ممنوعہ منسی آ شُزا مگن آں نام مٹینتھؤ دیگر نام آنژ عمل کھنغاں۔باز جماعت آں تہ نوخیں نام آنگو گوستی ایں گچین کاری آ بہر دی گِتا۔ہماں ہانر گچین کاری کمیشن آژ ھِچھ سبب آژ اجازت نہ مِلسا آنہاں دی آزات اُمیت وار آنی وڑا جاگاہ پیدا کھُزا۔اے ہمیں ٹؤک اۓ ثبوت ایں کہ ریاست اۓ ہمیں ادارہ یا تہ آنہاں نی چکا نیاہ ایر نہ کھناں یا آں نہ لوٹھاں کہ آنہاںر قابو آ کھُزی آ برؤ۔بہر حال صوبہ بلوچستان اۓ کوئیٹہ شہر او آنہی آسو پاسو اۓ ہزارا شیعہ آنی چھی اے بستی آں ہماں کہ ہر وخت دھشت گرد آنی نشانہ چکا بی۔چوش کہ نسلی ڈؤل آژ آں عامین آباتی آژ چھی اے جتا نیاہ کھاۓ ہمیں خاطرہ آنہانر آسانی آگو پھجھارتھی آ رؤ او آں تشدد اۓ نشانہ بی آں۔چند سال سرا ہزارا آباتی اۓ جاگاہ آ باز ھِلگر کھُزی آ شُز ہماں کہ تنِک بند نویسغاں چند روش پیشا کوئیٹہ شہر اۓ نزیخ ہزار گنجی فروٹ او سوزی اۓ منڈی آ آئی ایس یعنی داعش اۓ مزن ایں ھِلگر بیسا،ہمائی آ ۲۱ مڑدم مڑتھغاں او ۶۰ دیگر ٹھپی بیسغاں ۔مِرغ والا بازی آ ہزارا فرقہ اۓ اساں ۔پاکستان اۓ حاکم بروبر اۓ گوشاناں پھیزاغاں کہ پاکستان اندرا آئی ایس اۓ ھِچھ وجود نعیں ۔مگن چھے اصلیت آژ انکاری بیسؤ آں ہمیں ٹؤک آژ چھم چھرینتھ کھناں کہ کھاۓ روش ہزارا مڑدم آنر نشانہ کھُزی آ رؤغیں؟اگر آئی ایس نعیں تہ گُڈا دیگر ٹلہ تہ بی ہماں کہ آنہی زمہ وار بی۔