پہ پشتون تحفظ موومنٹ آ پاکستانئ پوج اخطار داتگیت۔

 پاکستانئ پوجئ نشانئ چیرا گجام نہ گجام صوبہ یا سیمانی مردم ھر وھدہ بوتگنت۔ پوجین حکومتانی ھمی حکمت عملی سیائگا گڈین روچ دراتئ پاکستان مجبور ات کہ ھر وھدہ استحصال و جمھوریت کُشین کاروائیانی عذاب آ گیندیت، و ای سلسلہ تہ وھدہ رادگ منت کہ پاکستانئ ھما کوت شہ پاکستان جیتا بوت و یک آزاتین مُلکئ بہ بنگلہ دیش ناما بوت۔ پاکستانئ تھا پوج گون وتی پوجین بغاوتان نہ تھانکا واکئ سرا قبضہ کرت بلکہ مُچین کانونین دپترانا کم واک کرت و وت شہ مُچان گیشتر واکدار بوت۔ نون پاکستانئ تقریبا گیشترکین دپتر بہ ایشی اشارہ آن کار کننت و بری دپترانی تھا عدلیہ ھم حتی مستثنی نہ انت۔ بہ ۱۹۷۰ سالئ تھا رندا شہ عامین گیچئن کاریان پاکستانئ روچ دراتئ سیمانی عوامی لیگ پارٹی بہ کویم اسمبلئ تھا گون گیشترکین ووٹان سوبین بوت مگہ پاکستانئ حکمرانانا ای ھبر وش نہ ات کہ آ مُلکئ تھا جمھوریت دیمرئی ودی کنت، شہ ھمی وجا سرئ زبردستین سوب آ آوان روچ دراتئ سیمانی سربراہ شہ واکا دور ساتتنت۔ کہ آی نتیجہ بہ ۱۹۷۱ بنگلہ دیش قیام رازا دیما ات۔ پاکستانئ منتگین جمھوریت پسندین حلقہ آنی تھا ای پکر و حیال ودی بوت کہ شاید رندا شہ انچین تباہ کُن ئن مھم جوئی پاکستان رندا جرات نہ کنت کہ دیگہ مھم جوئی کنت کہ شہ آی وجا پاکستان ٹوکور ٹوکور بیت یا پہ جمھوریت آ گجام ٹپئ برسیت۔ مگہ آ مُلکئ جمھوریت پسندین حلقہ آنی ای پکر و حیال ھم خام ثابت بوت۔
نہ پوجین بغاوتانی سلسلہ دیم گپتگ بوت و نہ گیر جمھورین گام گرگ اوشتارینتگ بوتنت۔ اگرچہ بہ آ مُلکئ تھا شہ گڈین یازدہ سالان پوج راستامین وڑئ مداخلت نہ کنت و ھر پنچ سالا رندا گیچئن کاری بری مُلکئ تھا تسر بنت، و اقتدار ھم ھر وار پر امنئن وڑئ منتقل بیت مگہ واکئ اصلین و راستین سرچمگ بہ راولپنڈی پوجین مرکزین دپترئ تھا انت۔ بلوچستان معاملہ ھبر بیت یا قبائلین سیمانی، ھر جگہ بنیادین وڑئ درپردہ پوج شہ وتی مختلف ئن ایجنسیانی راہ سیمانی تھا مردمانی لوٹگانا و جمھورین حکانا بہ پوجئ پھادئ چیرا کنت۔ بلوچستانئ صوبہ تھا مردمانی جبرین زیان بیگ، و مخالپانی زبان بند کنگئ سلسلہ جاری ات کہ نون قبائلی پشتونئ شھروندانی سرا ایش وتی ظلمئ کنگا بناہ کرتگیت۔ چُنت وھدہ دیمترا وھدہ کہ آپریشن ضرب عضب ناما دھشت گردیئ حلاپا پوج مھم را بناہ کرت آ ای دعوئ کرت کہ آ دھشت گردیئ سرینا پروشتگیت حالانکہ گیشترکین مقامین شھروند ای الزاما جننت کہ دھشت گردانی کشتنئ نامئ سیائگا عامین پشتون ئن ورنا گیشتر نشان گپتگ بنت۔ پوجین کاروائی وھدہ، مقامی آباتئ یک مزنئن کوتئ پاکستانئ دیگہ شھرانی تھا پناہ گپتنت۔ چُنت حقلہ ای الزاما ھم جتگنت کہ دھشت گردانی حلاپا گجام خاسین کاروائی نہ بوتگیت البتہ ای مردم باید انت کہ گیشترین صعوبتانا تحمل کننت کہ بہ پوجئ طریقہ کارئ سرا اعتراض کننت۔
چُنت وھدہ دیمترا ھم بہ کراچئ تھا، یک پشتونئن ورنائ را ایجنسی بہ دھشت گردئ ناما کشتنت مگہ آ یک عامین پشتونئن کسانین ورنائ ات کہ کوشست داشت وتی کار و بارا جور کنت بیدئ ای ورنائا چُنتی مردمئ دیگہ آ ھم بہ دھشت گردیئ ناما کشتگنت۔ شہ ایشی وجا، پشتونئن ورنا پہ وتی حکانی حفاظتا بہ پشتون تحفظ ناما یک موومنٹ را بناہ کرتنت۔ شہ آ وھدہ تہ نون ای تحریک  خاسین وڑئ پوجئ نشانئ چیرا انت و ھمی راز کہ پاکستانئ عادت انت ھر مردمئ کہ شہ پاکستانئ پوجین ٹولہ وتی حکئ لوٹوک بیت آی را پاکستانئ پوج بدنام کنت و پاکستانئ دشمنئ ناما دنت و گشیت کہ آ ھند یا گجام دیگہ مُلکئ ایجنٹ انت، ھمی راز پی ٹی ایم باروا ھم ھمی دروگین پروپیگنڈا بیت۔ تہ ای حد کہ پوجئ گوشوک، انٹرسروسز پبلک ریلیشنز ڈائرکٹر جنرل پہ پی ٹی ایم درا و عامین وڑئ ای اخطار آ داتگیت کہ پوج آی حلاپا سَکین کاروائی کنگا انت۔ پہ وتی ای کاروائی جائز نشان دیگا آئی ایس پی آر ڈائرکٹر جنرل آصف غفور مزنئن الزام ھم بہ آی سرا جتگیت و گشتگیت کہ پہ آی شہ اوگانستان و ھندوستانئ خفیہ ایجنسیان فنڈ دیم داتگ بیت۔ پہ جمھوریتئ تحریکئ پادموش کنگا ای پاکستانئ ایجنسیانی آزمودہ ئن سلیح انت۔ پاکستان پیپلز پارٹئ سربراہ بلاول بھٹو ای بیانئ سرا سَکین وڑئ اعتراض کرت، و ای سوج آ دیما کرتگیت کہ پہ پوج ای وڑئ بیانئ دیگئ اجازت آ کئ داتگیت؟ بلاول بھٹوئ سوج وتی جاگہ مگہ پاکستانئ حکیکت ایش انت کہ پوج ھما کارا کنت کہ آی دل بیت سیاسین قیادت و یا سیاسین گل بہ آدنا ایچ وڑئ حیثیتئ نہ دارنت۔