سرگال:ہبدہ می لوک سبھا گچین کاری

آزات ھِند اۓ نوخیں آئین اۓ لاگو بی اغ آ پھدا اولی ایں عامین گچین کاری ۱۹۵۱۔۵۲ آ بیسغۓ سا۔گچین کاری قومی پارلیمان یعنی لوک سبھا آپا دی بیسا او ریاستی اسمبلی آنی آپا دی۔مگن مۓ ہمیں گپتران چھڑوئی آ لوک سبھا گچین کاری آپا محدود بی۔اے گچین کاری ہر پنچ سال آنی پھدا بیسا ۔اگر ہمیں وڑا دیستی آ برؤ تؤ اے وخت یعنی ۲۰۱۹ آ چھیاردہ می لوک سبھا بیس مگن اے گچین کاری ہبدہ می لوک سبھا آپا بی غیں۔اینگا ہمیں خاطرہ بیسا کہ کے ای دھکا پارلیمان سیاسی اُتھل پُتھل اۓ سبب آژ وخت آژ سرا تحلیل بیسا۔یعنی پنچ سال آنی مُدت کار پھیلو نویسا۔بہر حال سیاسی اُتھل پُتھل تہ کھاۓ او رؤ مگن ھِند آ جمہوریت اۓ دگ ہماں کہ اولی ایں روش آژ گِتا آنہی آژ کھدیں دی نہ ہٹسا۔یک دھکا اینگا ضرور بیسا کہ جمہوریت اۓ حوالہ آژ حالت چھی اے بے باوری اۓ بیسغۓ سا او آنہی آؤخین روش آنی چکا چھی اے سوال کھُڑو بیسغۓ ساں۔مگن ہماں حالت مشکل آژ ۱۸ ماہ تکا رہسا۔۱۹۷۷ آ ہماں وخت لوک سبھا اۓ گچین کاری بیسغۓ سا تہ ھِند اۓ عوام آ وتی ووٹ اۓ استعمال کھُزؤ مُچھیں جہان آ اے پھیغام داسا کہ ہمیں مُلک اۓ عوام چھڑوئی آ جمہوری نظام آ پسند کھنت او اے کہ آں وتی ویچار آنی آزاتی اۓ سؤدا ھِچھ دی بھاء چکا نہ کھُز کھنت۔۱۹۷۷ آ پھدا آژ نی تکا ھِچھ اینگے دپ نویسا ہمائی آژ جمہوریت اۓ آؤخین روش آنی حوالہ آژ گُمان پیدا بی۔ہماں سال ہمیں ٹؤک اۓ جار اسا کہ جمہوریت ھِند عوام اۓ حون آ مان ایں۔ہمیں نیمگا کے ای وڑ اۓ سیاسی تجربہ بیسغاں مرکز آژ گِتؤ ریاست آنی تکا کے ای وڑ اۓ سرکار آتکا ۔مخلوط سرکار آ کھدیں پنچ سال آنی مُدت پھیلو کھُزا او کھدیں اُتھل پُتھل اۓ شکار بیسؤ نیمگا پھُرشتا۔مگن ہمیں ہر شۓ آئین اۓ اندرا بیسا۔مۓ آئینی ادارہ مُچھیں دیانت داری آگو وتی آئینی فرض پھیلو کھنت۔اصل آ جمہوریت اینگے حالت آ مضبوط بی ہماں وخت ریاست اۓ ادارہ دیانتدار بی آں ۔آنہی دوہمی دیم اے دی بی کہ آئین او آئینی ادارہ آنی احترام او پاسداری دی کھُزی آ برؤ۔ہمیں ڈؤل آگو اگر دیستی آ رؤ تہ ھِند،جمہوریت اۓ سوب مند تجربہ گاہ ایں ہموزا آئین او قانون اۓ احترام دی بی او پاسداری دی۔ھِند ہماں وخت آزات بیسغۓ سا او جمہوریت آ لاگو کھنغ اۓ ٹؤک بی غۓ ساں تہ رونشت مُلک آنی باز زانتکار آنر اے باور نیا کہ جمہوریت سوب مند بی۔بازیں مُلک آں تہ چَگھ کھُزغۓ سا مگن مروشی ہماں مُلک آنی آپا ھِند اۓ جمہوریت مثال بیسا۔بہر حال ہبدہ می لوک سبھا اۓ گچین کاری ہپت مرحلہ آ پھیلو بی ہمائی آ پنچ مرحلہ پھیلو بیسغاں ۔نی چھڑوئی آ دو مرحلہ باقی آں ۔اُمیت انت کہ گچین کاری اۓ نتیجہ آنی جار تکا مُچھیں مرحلہ شَر ایں وڑا پھیلو بی آں برواں ۔ہماں سوب مند بی آں آں سرکار ٹھائیناں او ہماں کہ ناسوب بی آں آں وقار آگو عوام اۓ فیصلہ آر مناں ۔