سرگال:آسیہ بی بی عدالت آژ بری مگن آزاتی مِلسا وطن آ اِلسؤ

آسیہ بی بی پاکستان اۓ صوبہ پنجاب اۓ یک گاؤں آ رہغ والا عیسائی زائیف ایں ہماں کہ چھیار چھُکھ آنی ماس ایں ۔ھِچھ ٹؤک چکا مسلمان ہمسائیگ آنگو آنہی ناوشی بیسا ہمائی آ پھدا ہمسائیگ آں آنہی آر دین اۓ حلاف گُشغ اۓ ڈوہی منسا درگتہ کہ بُنگیج آژ ہی آنہی گُشغ اسا کہ آنہی آ ھِچھ اینگے ٹؤک نہ کھُزا ہمائی آر کہ اسلام اۓ حلاپ منسی آ برؤ ۔پاکستان آ اہانت دین قانون آ ہمیختر سخت کھُزی آ شُزا کہ آنہی سزا پھاہو دی بیس بی۔آنگا تہ ہمیں ڈوہ اۓ زد آ کھسے دی آتک بی مگن اقلیت آنہی خاصیں نشانہ بی آں اے قانون سرا آژ ہی متنازعہ رہسا او پاکستان اۓ سول سوسائیٹی او مڑدمی حق آنی قانون آنہی حلاپ احتجاج او قانون آ مناسو بدلاؤ اۓ مطالبہ کھنغیں۔آنہی اۓ سجوں آنژ مزن ایں احتجاج ہمین ٹؤک آپا ایں کہ ہمیں قانون اۓ ردین استعمال بی غیں او زاتی دُژمنی اۓ بُنشت چکا دی مڑدم یک دوہمی آر بجھیناں۔دوہمی وٹا انتہا پسند حلقہ آں ہمیں قانون اۓ بارو آ ماحول آ ہمیختر جزباتی کھُزا کہ چھڑوئی آ الزام اۓ بُنشت چکا مڑدم ڈوہی اۓ حون ورغ لوٹھاں او چُنتی دپ اینگے بی آن ہمائی آ اے دیستی آ شُزا کہ تیش آ آتکغیں مڑدم ڈوہی آر کُشاں بِلاں۔چھڑوئی آ الزام اۓ بُنشت چکا لوغ آ آس دۓ اغ او زیندغ شوشینغ اۓ دپ بی آں او اینگے ہی ماحول آ آسیہ بی بی چکا مقدمہ قائیم بیسا۔یک بُنی ایں عدالت آ آنہی آ پھاہو اۓ سزا اُش کھنائینتھا ۔صوبہ پنجاب اۓ یک گورنر سلمان تاثیر آ دی اہانت دین قانون آ مناسو بدلاؤ کھنغ لوٹھسا ۔آنہی آ آسیہ بی بی اۓ پھاہو اۓ سزا معاف کھنائینغ اۓ دی کوشش کھُزغۓ سا ہمائی نتیجہ آ آنہی آ آنہی اۓ یک سیکیورتی گارڈ آ تیر جھزؤ کُشتغۓ سا ۔تحریک لبیک پاکستان ،ہمائی آ گوستی ایں عامین گچین کاری آ بہر دی گِتغۓ سا آں سلمان تاثیر اۓ حونی اۓ ویچار آنی نمائیندگی کھنت۔بہر حال آسیہ بی بی اۓ مقدمہ ہماں وخت مزن ایں عدالت آ پُجھسا تہ آنہی آ آسیہ بی بی آ الزام آژ بری کھُزا۔آنہی چکا تحریک لبیک آ مُچھیں پاکستان آ احتجاج کھُزا او ہر وٹا اُتھل پُتھل بیسا۔آزاتی آپا آسیہ بی بی آ وطن اِلغی بیسا ۔چھڑوئی آ آسیہ بی بی ہی نہ بلکہ ہماں مُچھیں مڑدم ہماں کہ انتہا پسند حلقہ یا پؤج او آنہی ایجنسی آنر پسند نیاں،آنہانر پاکستان آ اِلغی بی۔