سرگال:امریکہ اۓ ایران نیوکلائی منغ نامہ آژ یک وٹاژ درا بی اغ یک غیر دانشمند فیصلہ 

ایران چکا امریکہ اۓ یک وٹاژ اقتصادی پابندی آں یک وار دیگر عالمی براسی اۓ دیما مسلہ کھڑو کھُزغاں ۔یورپی یونین،چین ،روس،ھِند پھجی آ مُچھیں خاصیں مُلک ہمیں بارو آ امریکہ اۓ ہمیں گام آ دارغ اۓ کوشش ناسوب بیسغاں۔سجوں آنژ گیش خاصیں ٹؤک اِش انت کہ عالمی براسی اۓ دیما اے مسلہ ایں کہ آں وتی او امریکہ اۓ مفاد اۓ نیمگا کھسے آر گچین کھنت او امریکہ اۓ پابندی آنی روژنائی آ ایران آگو وتی سفارتی سیال داری آ تھانگا وش ایں وڑا قائیم ایر کھنت۔امریکہ اۓ ٹرمپ سرکار اۓ اولی ایں روش آژ ہی ہمیں زور رہسا کہ ایران یورینیم آ گیش کھُزؤ ہمیں بارو آ کھُزی ایں منغ نامہ اۓ حلاپ رؤغیں ۔ہمیں الزام اۓ ھِچھ ثبوت نوی اغ او جہانی براسی اۓ سمجھائینغ اۓ باوجوت امریکہ آ وضہار ایران اۓ پھجی آ کھُزی ایں۶ مُلک آنی نیوکلائی منغ نامہ آژ جتا کھُزئی۔مسلہ اے نعیں کہ امریکہ ایران آگو وتی سیال داری تھانگا ایر کھنغ آ باڑہ ایں۔پدھر ایں اے امریکہ اۓ وتی جِند اۓ مسلہ ایں ،مگن مشکل اِش انت کہ امریکہ آ ہماں وڑا ایران چکا اقتصادی پابندی جھزا آنہی منفی اثر سنگت مُلک آنی چکا دی کھوغیں۔ہمیں پابندی آں عالمی بازار آ تیل اۓ بھاء آ گیشتری کھُزا۔ہمیں خاطرہ کہ ایران اۓ پابندی آنی زور آ ہماں مُلک ایران آ اِلسؤ دیگر مُلک آنژ تیل گِرغاں آنہی اۓ بھاء گیش ایں۔ہمیں پابندی آنژ امریکہ اۓ وتی معیشت آر دی نُقصان بی اغ اۓ گُمان ایں ،مگن بہر حال آنہی آپا ٹرمپ عالمی براسی آژ گیش وضی مُلک آپا جوابدہ ایں ۔البت ہموزا تکا باقی جہان چکا آنہی پابندی آنی سبب آژ کھوغ والا زور اۓ تعلق ایں تہ آنہی آپا امریکہ آ عالمی براسی اۓ دیما جواب دۓ اغ لوٹھی آخیر مُچھیں جہان پھرچھے امریکہ اۓ پابندی آنر منسؤ وتی وتی قومی مفاد آ قربان کھنت۔ھِند امریکہ اۓ یک نزیخی ایں سنگت ایں مگن سوال اش انت کہ چھے مارا امریکہ اۓ سنگتی اۓ دیما قومی مفاد آنژ چھم چھرینغ لوٹھی؟ہموزا تکا ایران اۓ تعلق ایں تہ اے ٹؤک دی زکر اۓ لائیق انت کہ ایران ھِند اۓ باور اۓ لائیق ہمسائیگ ایں او دوایں مُلک آنی دو نیمغی سیال داری اۓ شَر این تاریخ ایں۔دوایں مُلک کے ای اینگے مشترکہ پروجیکٹ آنی چکا کار کھنغاں ہمائی سبب آژ ھِند معیشت مضبوط بی۔ہمیں حالت آ امریکہ اۓ زور اۓ دیما ایران آژ تیل اۓ گِرغ کھمیں کھنغ آژ نہ چھڑوئی آ مارا معاشی او اقتصادی نُقصان بی اغ اۓ گُمان ایں بلکہ آنہی نتیجہ آ ما وتی یک شَر ایں سنگت آگو دی سیال داری آ ناوشی پیدا کھنوں۔ٹرمپ اۓ نی ایں گام آژ ہماں مُلک دی ناوش آں ہماں کہ ۲۰۱۵ اۓ جوہری منغ نامہ آ اوار اساں ۔چین او روس آ تہ ہمیں مسلہ آ امریکہ چکا اُنگل کھڑو کھُزا۔اصل آ امریکہ اۓ اقتصادی پابندی جھنغ آژ ایران آ دی وتی ویچار آنر سخت کھُزؤ جوہری منغ نامہ اۓ باقی پنچ باسک آنر نمدی لکھسؤ پاترپت داسا کہ اگر آنہاں منغ نامہ چکا عمل نہ کھُزا تہ ایران دی وضہار جوہری منغ نامہ آژ جتا کھنت۔آنہی نتیجہ آ کے ای جھیڑو پیدا بی اغ اۓ گُمان ایں۔ہموزا تکا ھِند اۓ تعلق ایں تہ اے وخت امریکہ آگو ھِند اۓ سیال داری باز وشتر ایں او کے ای خاصیں مسلہ آنی چکا امریکہ اۓ واہریائی دی ھِند آر مِلسا،مگن اِشی آ دی گُمان نعیں کہ ایران چکا امریکہ اۓ پابندی آنی لازمی اثر مۓ معیشت چکا دی بی۔دوہمی وٹا ایران آگو سفارتی سیال داری چکا دی آنہی اثر بی۔ہمیں حالت آ شَر ایں دگ ہمِش ایں کہ ما امریکہ یا ایران اۓ پھجی آ سنگتی اۓ سیال داری آگو وتی قومی مفاد آ سجوں آنژ بُڑزا ایر کھُزؤ ھِچھ فیصلہ کھنوں۔