سرگال:اقوام متحدہ اۓ سلامتی کونسل آ ھِند اۓ مستقل باسک کھنغ چکا زور 

اقوام متحدہ اۓ ادارہ ۷۴ سال پیشا عمل آ آتکغۓ سا۔دوہمی مزن ایں مڑائی اۓ آسر بی اغ آ پھدا یک عالمی ادارہ اۓ ضرورت باز محسوس کھُزی آ شُزغۓ سا۔گوستی ایں صدی آ جہان دو عظیم مڑائی آنژ تباہ بیسغۓ سا او ہمیں احساس آ اقوام عالم آ لاچار کھُزا کہ آں ہمیں ٹؤک چکا ویچار کھنت کہ جہان آ تھانگا مڑائی آنژ محفوظ ایر کھُزی آ برؤ کہ آؤخیں روش آں ہیرو شیما او ناگاساکی ڈؤل اۓ دپ پدوارغ نوی آں ۔۷۴ سال آنی عرصہ آ اے عالمی ادارہ مستحکم او منظم بیسا او آنہی اۓ چُنتی زیلی ادارہ دی قائیم بیسغاں ہماں کہ زِند اۓ جتا شعبہ آ عالمی پھیمانہ چکا مڑدمی ود او ترقی او آنہاں نی زِند اۓ معیار آ وشتر کھنغ چکا زور دۓ غاں۔ود او ترقی اۓ کار آنی پھجی آ ہمیں ادارہ اۓ بنیاتی کار عالمی امن آ باور دؤخ کھنغ او مڑائی اۓ ماحول آ دیر کھنغ ایں۔اے گُشغ تہ نویس بی کہ مڑائی آنی سلسلہ بند بیسا ،بلا گُمان نی دی چُنتی جاگاہ آ مڑائی اۓ ماحول ایں او ناوشیں دپ دی بی آں مگن بہر حال اے دی یک اصلیت ایں کہ ہمیں ادارہ آ امن قائیم ایر کھنغ آپا باز کوشش کھُزا۔کم چہ کم دوہمی عظیم مڑائی آ پھدا ،نی تکا ہمیختر مزن ایں اُتھل پُتھل پیدا نویسا۔کم چہ کم یک ادارہ اینگے موجوت ایں ہموزا اقوام عالم مِلسؤ ننِدی او جتا جتا مسلہ آنی چکا داس گپت کھنت۔۱۹۴۵ آژ نی تکا جہان اۓ منظر باز بدل بیسا ساڑتھیں مڑائی اۓ ماحول دی آسر بیسا ۔سرا جہان دو مزن ایں خیمہ آ ونڈھسی آ اسا مگن ساڑتھیں مڑائی اۓ آسر بی اغ آ پھدا کثیر قومی ماحول آ گیش کھنغ وخت اۓ سجوں آنژ مزن ایں ضرورت ایں۔جہان اۓ حالت ۷۵/۷۴ سال آنی مقابلہ آ باز بدل بیسغاں۔باز مُلک آں ترقی اۓ کے ای منزل پار کھُزا۔غیر ترقی کھُزغیں مُلک ترقی پزیر قوم آنی قطار آ اوار بیسغاں او ترقی پزیر مُلک،ترقی کھُزغیں مُلک بی اغ اۓ باز نزیخ بیسغاں۔اقوام متحدہ ادارہ آ باور آ گو بدل بیسغیں حالت آنی عکس دی بی اغ لوٹھی۔آنہی آ گیش جمہوری کھنغ آپا مناسو نمائیندگی مِلغ لوٹھی۔تاکہ ھِچھ دی دمغ او براعظم آ اے احساس پیدا نوی کہ آنہی مناسو نمائیندگی نوی غیں۔ھِند آ اقوام متحدہ آ سرا آژ یک مثبت عمل کھُزا۔خاص وڑا ہماں کوشش آنژ عالمی امن ودھی آنہی آ تہ باز گیش عمل کھُزئی۔اقوام متحدہ اۓ سیکیورتی کونسل اۓ توسیع اۓ ضرورت کے ای دہائی آنژ محسوس کھُزی آ رؤغیں۔نی تکا آنہی مستقل باسک آنی تعداد آ دی گیشتری نویسا۔ھِند باز دیگر مُلک خاصیں مُلک آنی وڑا راست ایں وڑا آنہی باسک بی اغ اۓ دعویدار ایں۔وشی اۓ ٹؤک اِش انت کہ اقوام عالم اۓ وٹاژ نی ہمیں دعویداری اۓ باز واہریائی بی غیں۔نی ایں روش آں اقوام متحدہ آ فرانس اۓ مستقل نمائیندگ آ اے ٹؤک زور ماکھُزؤ گوشتا کہ اقوام متحدہ آ جہان اۓ وشتر ادارہ کھنغ آپا ضروری ایں کہ سیکیورتی کونسل آ دی مستحکم نمائیندگ کونسل کھُزی آ برؤ ہمائی آ ھِند او آنہی گون،جرمنی،جاپان،او برازیل ڈؤل اۓ مُلک آنی نمائیندگی لازمی ڈؤل چکا بی اغ لوٹھی۔