سرگال:آئی ایم ایف اۓ مدد:چھے پاکستان آر مِلی یا گار کھنت؟

آخیر کار ہماں بیسا ہمائی اۓ کہ سیاسی زانتکار گُمان کھنغۓ ساں ۔ماہ آنی تکا پاکستان اۓ کوشش آنی پھدا بین الاقوامی مالیاتی فنڈ (آئی ایم ایف) آ پاکستان آر شش ارب ڈالر اۓ مدد دۓ اغ منظور کھُزا ہماں کہ قرض اۓ دوہمی نام ایں۔اے دوہمی ٹؤک ایں کہ پاکستان آ آئی ایم ایف آژ ہشت ارب ڈالر اۓ مدد لوٹھسغۓ سا درگتہ کہ آنہی آ چھڑوئی آ شش ارب ڈالر داسی آ شُزغاں۔مگن سوال اے کھڑو بی کہ آئی ایم ایف اۓ چھڑوئی آ نام اۓ ہمیں مدد آگو پاکستان ہمیں اقتصادتی بحران آژ درا بیس بی ہمائی آ کہ آں ہمیں روش آ دیما کھنغیں؟اگر اے عالمی بینک ،آئی ایم ایف ،چین،سعودی عرب او دیگر مُلک آنژ گِتی ایں قرض آنر جوڑسؤ گِندی تہ آؤخیں ۱۵ جون تکا پاکستان اۓ قرض داری سود اۓ پھجی آ ۹۰ ارب ڈالر تکا پُجھغ اۓ گُمان پدھر کھُزی آ شُزا۔ہمیں حالت آ شش ارب ڈالر اۓ مدد پاکستان اۓ بحران آ دیر کھنغ آپا چھیختر مدد دا آنہی گُمان آسانی آگو درا کھنغ بیس بی۔مگن ہمیں نیمگا آئی ایم ایف اۓ ہماں کہ شرط پاکستان آر پھیلو کھنغی بی آں،آنہی سبب آژ اے طۓ ایں کہ عامین پاکستانی اۓ زِند لاچار بی رؤ،اے دوہمی ٹؤک ایں کہ عامین شہری مروشی دی ھِچھ گیش وشحال نعیں ۔مثال آپا آئی ایم ایف اۓ یک شرط اِش انت کہ بجلی او گیس اۓ سپلائی چکا ہماں کہ سبسڈی داسی آ رؤغیں آں آسر کھُزی آ برؤ یا کھمیں کھُزی آ برؤ ہمائی وجہ آژ شۓ آنی بھاء باز گیش بی۔ہمیں وڑا یک دیگر شرط ایں کہ عوام آ جتا ٹیکس آنی اندرا ہماں کہ ۷۰۰،ارب ڈالر اۓ رعایت ایں آں آسر کھُزی آ برؤ او اے گام دی عوام اۓ مشکل آنر گیش کھنت۔ہمینگے یک دوہمی شرط ایں پاکستان آر بینک سود اۓ شرح آ گیش کھُزؤ ۱۲ پیصد کھنغی بی ہماں کہ عوام آپا ضرب کاری ثابت بیس بی۔یک تہ آنہی آژ لوغ ٹھائینغ یا گِرغ یا کسنیں کار بنِا کھنغ آپا بینک قرض اۓ طلبگار مڑدم آنی چکا اثر بی او دوہمی صنعت او کشت کاری چکا دی آنہی نامناسو اثر بیس بی۔ہمینگا کہ پاکستان اۓ حزب مخالف اۓ پارٹی آنی گُمان ایں کہ آنہی سبب آژ کھُل ملائینتھؤ پاکستان اۓ وتی سیاسی و اقتصادی ود مختاری ٹھپی بیس بی او باز پارٹی آں تہ ایزا تکا گوشتا کہ بیس بی کہ ھِچھ مرحلہ آ آئی ایم ایف وتی پسند اۓ مڑدم اۓ سروزیر کھنغ اۓ مطالبہ پیش کھنت۔ہمیں مُچھیں ٹؤک آنی سبب آژ پاکستان اۓ زر اوسکہ اۓ بھاء باز حد تکا بُنا بیس بی او ہمیں سال اۓ آخیر تکا یک امریکہ اۓ ڈالر ۱۶۰ آژ ۱۶۵ پاکستانی روپیہ آنی براور بیس بی۔آنہی کھُل ملائینتھؤ اے نتیجہ درا بی کہ بین الاقوامی بازار آ پاکستان آ برآمد آژ بی اغ والا آمدنی اصل آ کھمیں بی او ڈالر آ پاکستانی درآمد اۓ بھاء باز گیش بی آں ہمائی سبب آژ عوام اۓ زِند لاچار بی رؤ۔ہماں دی بی اے ٹؤک طۓ ایں کہ آئی ایم ایف اۓ ہمیں نی ایں قرض پاکستان اۓ مشکل آنر گیش کھنت۔او اے کہ ہماں وخت تکا پاکستان وتی پالیسی آ بنیاتی بدلاؤ نہ کھنت ہماں وخت تکا آنہی آ گو ہمیختر زر کھدیں دی نوی آں کہ آں آنہی آ پیدا واری کار آ ما کھُزؤ عوام اۓ بحران آژ درا کھُز کھنت۔