سرگال:پاکستان اۓ بدل بیسغیں سیاسی منظر نامہ

پاکستان تحریک انصاف اۓ سروک عمران خان آ سر وزیر بیسؤ تنِک یک سال دی نویسا مگن ہمیں مُدت آ آنہی مشہوری ہماں تیزی آگو بُنا بیسا کہ حیرانی بی۔شاید آنہی بنیاتی ایں وجہ اِش انت کہ آنہی سیاست کھنغ اۓ طریقہ آ منفی ٹِک آنی کارفرمائی گیش رہسا۔اپوزیشن لیڈر اۓ ڈؤل آژ آنہی آ غیر زمہ واری اۓ طریقہ اپنائینتھا او ہمیں ٹؤک آر شمُشتھئی کہ سیاست زانتکار چاہے حکمراں جماعت اۓ بی یا اپوزیشن اۓ آنہی جمہوری قدر آنی پاسداری کھنغ لوٹھی۔سرکار آگو مِڑغ او بدگوشی کھنغ اۓ دی ھِچھ دائیرہ بی ۔بہر حال نی آں سروزیر ایں او سروزیر اۓ ڈؤل آژ آں پاکستان اۓ نی ایں اقتصادی بحران او ہموزا اۓ سیاسی اُتھل پُتھل آژ پوہ بی۔آنہی آ پاکستان اۓ اُمت آر نوخیں پاکستان اۓ واہو پھیدھارتھغۓ سا او اے وعدہ کھُزغۓ سا کہ آں یک آئیڈیل ریاست اۓ قیام اۓ کوشش کھنت۔اے ویچار دی عامین ایں کہ آنہی آ سروکی آ آرغ آ پاکستان اۓ پؤج آ مزن ایں عمل کھُزغۓ سا ۔آنگا دی آنہی پارٹی آر ہمیختر سیٹ نہ مِلسغاں کہ آں وتی سرکار وڑ اۓ اطمینان دؤخ اکثریت اۓ دعوی کھُز کھنت۔پاکستان اۓ سجوں آنژ مزن ایں صوبہ پنجاب آ دی آنہی اۓ پارٹی اۓ سروکی ایں مگن چھڑوئی آ چند سیٹ آنگو آنہی پارٹی اگا ایں۔یعنی نہ تہ مرکز آ آنہی سرکار آ مستحکم گُشغ بیس بی نہ تہ صوبہ پنجاب آ ۔آنہی آ نوخیں پاکستان اۓ ٹؤک کھُزؤ ورنہ آنی مزن ایں تعداد آ وتی وٹا چھِکسا مگن نی ہمیں طبقہ آنہی آژ باز مایوس او ناوش نیاہ کھاۓ۔آنہی خاصیں وجہ اِش ایں کہ آں پاکستان اۓ باز بنیاتی او جزوی ڈؤل اۓ مسلہ آنر حل کھنغ آپا ناسوب بیسا۔پاکستان اۓ سیاسی حالت اِش انت کہ پاکستان مسلم لیگ (نواز)اۓ حیثیت باز کمزور بیسا۔آنہی سروک او پیسر اۓ سروزیر نواز شریف نہ چھڑوئی آ نادُرا ایں بلکہ جیل آ بند ایں۔آنہی جِنکھ مریم نواز دی کے ای ڈؤل اۓ مقدمہ دیما کھنغیں۔چوش کہ آں اے وخت نواز مسلم لیگ اۓ یک خاصیں عہدیدار ایں مگن موک خوری اۓ الزام آ کی اے وڑ اۓ مقدمہ آ بجھسی ایں ہمیں خاطرہ آنہی سیاسی عمل باز کھمین بیسغاں۔اینگین آ اپوزیشن آ مزن ایں حلا پیدا بیغۓ سا۔مگن پاکستان پیپلز پارٹی اۓ نوجوان واگ داروخ بلاول بھٹو زرداری اندرا پاکستان اۓ سیاسی حلقہ آنی نیمگا باز اُمیت نیاہ پھیزاغیں۔پاکستان پیپلز پارٹی کھدیں پاکستان اۓ سجوں آنژ مزن ایں سیاسی پارٹی اسا او مُچھیں صوبہ آ مقبول اسا۔مگن نی ایں سال آنی اندرا آنہی مقبولیت کھمیں بیسا او اے صوبہ سندھ تکا محدود رہسا ۔گُڈا دی اے سجوں آنژ مزن ایں قومی پارٹی آنژ یک ایں۔نی ایں روش آں پاکستان اۓ سیاسی حلقہ آنی نیمگا بلاول بھٹو اۓ باز چرچہ ایں پھرچھے کہ عمران خان آ اے مزن ایں مضبوطی آگو چیلنج کھنغ آ مان ایں۔پاکستان اۓ سیاسی زانتکار آنی گُشغ ایں کہ کسنی آ بلاول بھٹو اپوزیشن آ پیدا بی اغ والا ایں حلا آ پھُر کھنغیں۔آں راستیں وڑا او راست ایں وخت چکا قومی مسلہ آنی چکا آواز کھڑو کھنغیں۔او عوام چکا آنہی مثبت اثر بی غیں۔پاکستان اۓ سیاسی زانتکار بلاول بھٹو اۓ عمر او حوصلہ آر دیستؤ اے محسوس کھنغاں کہ پاکستان اۓ سیاسی آزمان چکا نزیخی ایں روش آں یک روژن ستارغ پیدا بی۔