سرگال:دھشت گردی آگو مِڑغ اۓ طریقہ چھے انت؟

نی ایں سال آنی اندرا عالمی پھیمانہ چکا دھشت گردی آ ہماں وڑا وتی پھاز مضبوط کھُزغاں،خاصیں وڑا جہادی تنظیم آنی نیٹ ورک آ ہماں کہ طاغت مِلسا،آنہی آژ راستیں ڈؤل چکا مُچھیں جہان آ اُتھل پُتھل او بے اطمینانی پیدا بیسا او امن پسند جہان ہمیں پِکر آ مان ایں کہ آخیر ہمیں لعنت آ تھانگا آسر کھُزی آ برؤ؟نی ایں روش آں سری لنکا اۓ چرچ او ہوٹل آنی اندرا دھشت گرد آں ہماں وڑا ھِلگر کھُزا ،آنہی آژ بُرز آسیا آ خاصیں وڑا پِکر گیش بیسا۔نی تک اۓ پٹ او پھول آژ ہمیں اٹکل بیسا کہ مِڈل ایسٹ اۓ بدنام ٹلہ آئی ایس آ یک مقامی انتہا پسند تنظیم اۓ واہریائی آگو ہمیں کار کھُزغۓ سا۔عامین ڈؤل آگو بعض حلقہ آنی ہمیں ویچار ایں کہ اگر گُمراہ بیسغیں ورنہ آنی آپا مناسو تعلیم او روزگار داسی آ برؤ تہ آنہانر ہمیں لعنت آژ دارغ بیس بی ۔اے ٹؤک تہ یک حد تکا راست بیس بی پھرچھے کہ باز دھشت گرد تنظیم بے کار او بے پڑھیا مڑدم آنر وتی تنظیم آ اوار کھُزؤ آنہاں نی برین واش کھناں او آنہاں نی غریو پاس پھِز آنر اقتصادی نپ او کھٹ پُجھینتھؤ وتی کار کھنائیناں مگن ٹؤک ہمیختر آسان دی نعیں پھرچھے کہ عالمی پھیمانہ چکا بی اغ والا باز مزن ایں ھِلگر آ اے دیستی آ شُزا کہ کار کھنغ والا نہ چھڑوئی آ باز پڑھیا لکھیا اسا بلکہ اقتصادی ڈؤل آگو دی باز وشحال اساں۔اگر سری لنکا آ بی اغ والا ھِلگر آنی ٹؤک کھُزی آ برؤ تہ ایزا دی ہمیں دیستی آ شُزا کہ ہماں ود کُش بمبار ہمیں ھِلگر آ اوار اساں آں مُچھیں مڑدم نہ چھڑوئی آ وشحال لوغ آنی اساں بلکہ آنہانژ باز اینگے دی اساں ہماں ہاں وتی مُلک آژ درا اعلی تعلیم گِتغۓ سا۔پاکستان اۓ ممتاز لکھوخ عرفان حسین آ نی ایں روش آں اخبار ڈان آ وتی کالم آ پاکستان اۓ باز خطرناک دھشت گرد آنی زکر کھُزا۔آنہانژ یک عمر سعید شیخ دی ایں ہمائی آ امریکہ اۓ یک حوال کار ڈینیل پرل آ یرغمال کھُزؤ آنہی سغر گُڈسئی ۔آنہی آ وتی ڈوہ آ منسا ۔آنہی آ پھاہو اۓ سزا دی بیسا۔آں اے وخت جیل آ ایں او آنہی اپیل چکا تنِک سنوائی نویسا۔آنہی آ لاہور اۓ یک مزن ایں کالج او لندن اسکول آف ایکونومکس آ پڑھیائی کھُزغۓ سا۔ہمیں وڑا کراچی اۓ سعدعزیز دی اعلی تعلیم گِتی ایں نوجوان ایں ہمائی آ بزنس اۓ اعلی تعلیم گِتا او یک مزن ایں ہوٹل اۓ مالک دی اسا۔آنہی آ یک بس چکا ھِلگر اۓ سروکی کھُزغۓ سا۔ہماں ھِلگر آ ۵۴ اسماعیلی فرقہ اۓ مڑدم مڑتھغۓ ساں ۔آنہی آ یک امریکہ اۓ پروفیسر آ حون کھنغ اۓ کوشش اۓ الزام آ سزا بیسا۔اینگے دھشت گرد ھِلگر آنی سجوں آنژ مزن ایں مثال تہ نوہ۔یازد اۓ دپ اسا ہمائی آ نیویارک آ ورلڈ ٹریڈ سینٹر چکا ھِلگر کھُزی آ شُزغۓ سا او واشنگٹن ڈی سی آ امریکہ اۓ دپاعی ایں وزارت اۓ دپتر چکا دی ھِلگر بیسغۓ سا ۔ہمیں ھِلگر آ کمرشیل جٹ جُزینغ والا دھشت گرد،اعلی تعلیم گِتی ایں او مزن ایں لوغ آنی اساں۔ھِند آ ہمیں ٹؤک چکا خاص ڈؤل آگو زور داسا کہ عالمی پھیمانہ چکا مشترکہ میکانزم اپنائینغ اۓ ضرورت ایں تاکہ دھشت گردی اۓ پاڑ آ گُڈسی آ برؤ ۔اقوام متحدہ آ ہمیں مسلہ چکا ویچار کھنغی بی او آنہی آگو مِڑغ آپا یک جامع طریقہ اپنائینغی بی۔