سرگال:سنکیانگ اۓ اویغور مسلمان آنی ردین حالت

رمضان مُچھیں جہان اۓ مسلمان آنی آپا یک وڑ اۓ اہمیت ایر کھنت۔مسلمان ہر سال رمضان اۓ ماہ آ روزہ ایر کھناں او تلاوت او عبادت کھناں۔روزہ مڑدم آنی اندرا ضبر ،وتی چکا قابو کھنغ او اللہ اۓ داسی ایں نعمت آ غریو او پھدا بیسغیں مڑدم آنر شریک کھنغ اۓ جزبہ پیدا کھنت،مگن چین اۓ صوبی شن جیانگ اۓ مسلمان آنی آپا اے ماہ مشکل او پریشانی آنگو پھُر ایں۔چین اۓ سرکار آ ہمیں صوبہ اۓ مسلمان آنی چکا وڑ وڑ اۓ پابندی جھزؤ ایر کھُزغاں،آنہانر قرآن اۓ تلاوت او عبادت کھنغ آژ داشتی آ رؤغیں،او اینگا نہ کھنغ اۓ صورت آ آنہانر وڑ وڑ اۓ سزا داسی آ رواں ۔اے ٹؤک ویچار کھنغ اۓ لائیق انت کہ ہمیں نوخیں دؤر آ چین جہان اۓ ایکا اینگے مُلک ایں ،ہموزا ھِچھ خاصین مزہب او نسلی اقلیت آنر وتی مزہب ،ثقافت،او رسم آنی روگا زِند گوازینغ آژ داشتی آ رؤغیں۔چین آ شن جیانگ اۓ ایویغور مسلمان آنر مرکزی دھارہ آ اوار کھنغ اۓ نام چکا دستیگیری کیمپ آنی اندرا قید کھُزی آ شُزا۔آنہاں نی چکا ظلم و جبر کھُزی آ رؤغیں۔عالمی براسی او مڑدمی حق نی تنظیم چین اۓ ہمیں عمل آنی حلاپ آواز کھُڑو کھُزا۔مگن چین آ آنہی آژ چھم چھَرینتھغاں۔اصل آ چین آ ہمیں وڑ اۓ دپ آنی یک تاریخ رہسا ۔مڑدمی حق آنی محاذ چکا آنہی ریکارڈ باز ردین رہسا۔چین آ اپریل ۱۹۸۹ آ تیاننمین چوک چکا جمہوریت اۓ منغ والا آنر مزن ایں بے دڑدی آگو کُشتغۓ سا۔ہمیں کاروائی آ غیر سرکاری اٹکل اۓ روگا ہزارا احتجاجی کُشتی آ شُزغۓ ساں ہمائی آ بازی آ تر شاگرد زاگی اساں ،شن جیانگ آ جولائی ۲۰۰۹ آ پیش آئیغ والا ایں ہمیں وڑ اۓ یک دپ آ ۱۴۰ مڑدم آنر کُشتی آ شُزغۓ سا۔اصل آ چین اۓ وتی خاصیں پالیسی ایں آں آنہی حلاپ ھِچھ وڑ اۓ دی عمل آنر نہ چھڑوئی آ ناپسند کھنت بلکہ آنہی آ پاڑ آژ گُڈغ اۓ کوشش کھنت۔چین تبت اۓ ڈؤل آگو شن جیانگ آر دی ود مختار جاگاہ منی ،مگن ایزا ہماں وڑ اۓ حالت آں آں ھِچھ نوخیں آبادیاتی نظام آژ جتا نیاں،ہموزا ہر وڑ اۓ ظلم او جبر کھُزی آ رؤ۔چین شاید اے محسوس کھنت کہ ہمیں وڑ اۓ پالیسی آنی چکا عمل کھُزؤ آں وتی ویچار آنر راست ثابت کھنغ آ سوب مند بی رؤ۔چین جہان اۓ دوہمی سجوں آنژ مزن ایں معیشت ایں او آں سجوں آنژ بُڑزا بی اغ آپا ہر وڑ اۓ کوشش آ مان ایں او آنہی کوشش آ امریکہ اۓ پھجی آ آنہی سؤداگری ناوشی تیز بیسا۔چین اۓ وتی ہمسائیگ مُلک آنی پھجی آ دی ناوشی جُزغیں۔ہمیں مُلک آں تائیوان،فلپائین،ملیشیا،انڈونیشیا،مگن حیرانی اۓ ٹؤک انت کہ چین اۓ ہمیں عمل آنی باوجوت پاکستان آگو آنہی سنگتی گیش بی غیں،اینگا مان کھاۓ کہ پاکستان آ چین اۓ ویچار آنر وش آمد کھُزا۔ہمیں مُچھیں حالت آنر دیستؤ اے ٹؤک حیران کھنوخ انت کہ مُچھیں جہان آ مسلمان آنی حق آنی ٹؤک کھنغ والا پاکستان  چین آ اویغور مسلمان آنی ردین حالت آنی چکا چُپی کھُزؤ نشتی ایں۔