سرگال:بین الاقوامی مالیاتی فنڈ اۓ وٹاژ پاکستان آ قرض دۓ اغ اۓ منظوری

کے ای ماہ آنی گپتران آ پھدا آخیر بین الاقوامی مالیاتی فنڈ آ پاکستان آر قرض دۓ اغ اۓ فیصلہ کھُزا۔ہمیں بارو آ سر وزیر اۓ معاشی کار آنی مشیر واجہ حفیظ آ گوشتا کہ اسلام آباد آ بین الاقوامی مالیاتی فنڈ اۓ ٹیم اۓ پھجی آ پاکستان اۓ آخیری ایں دؤر اۓ گپتران آ پھدا ہمیں مالی مدد آ منظوری مِلسا۔منغ نامہ اۓ روگا آئی ایم ایف پاکستان آر آؤخیں سۓ سال آنی نیمگا شش ارب ڈالر دا،تاکہ آں وتی معاشی بحران آژ درا بیس بی ۔اے وخت پاکستان باز مقروض بیسا او قرض گڑدینغ او معیشت آ پٹی چکا آرغ آپا آنہی آ ۱۸ ارب ڈالر اۓ ضرورت ایں۔ہشت ماہ سرا ہماں وخت عمران خان مُلک اۓ سروزیر بیسغۓ سا ،تہ آنہی آ جار جھزغۓ سا کہ اگر بین الااقوامی مالیاتی فنڈ آ سخت شرط ایر کھُزا تہ آں آنہی آژ مالی مدد نہ گِری۔ہماں وخت آنہی آ چین ،سعودی عرب او متحدہ عرب امارات ڈؤل اۓ سنگت مُلک آنی چکا گیش باور اسا ،مگن آئی ایم ایف آ وتی شرط نرم نہ کھُزا بلکہ آنہی آ گیش سخت کھُزئی او عمران خان آ نزیخ آنہی ہر شرط منغی بیسا ۔ہمیں شرط آنی اندرا آمدنی گیش کھنغ آپا ٹیکس آنی شرح آ گیشتری،اصلاح او سبسڈی آ کٹوتی اوار آں۔سروزیر عمران خان آ کے ای دھکا اے ٹؤک گوشتغۓ سا کہ آں نہ تہ ٹیکس آنی شرح آ گیش کھنت او نہ ہی بجلی او گیس اۓ بھاء گیش کھنت،پھرچھے کہ آنہی آژ عامین مڑدم باز پریشان بی آں۔آنہی اۓ گوشغ اسا کہ اینگے گام گیج آنژ نہ چھڑوئی آ آمدنی کھمیں بی بلکہ افراط زر آ دی گیشتری بی۔مُلک آ ضروری شۓ آنی بھاء سرا آژ باز گِران بیسغاں او اینگا کھنغ آژ عوام اۓ پریشانی گیش بی آں ۔آئی ایم ایف اۓ شرط آنر منغ آپا فائینینشل ٹاسک اۓ زور آ دی وتی عمل کھُزا،پھرچھے کہ پاکستان آنہی گِرے لِسٹ آ سرا ہی اوار ایں او اگر ضروری بیسا تہ آنہی آ بلیک لِسٹ آ اوار کھُزی آ رؤ۔پاکستان اۓ سروزیر اۓ وٹاژ مالیاتی وزیر اسد عمر او اسٹیٹ بینک آف پاکستان ا[ گورنر طارق باجوا آ آنہاں نی عہدہ آنژ ہٹائینغ او آنہاں نی جاگاہ بین الاقوامی مالیاتی فنڈ اۓ پیسر اۓ عہدیدار آنر مقرر کھنغ ہمیں ٹؤک اۓ وٹا اشارہ کھنت کہ مُلک اۓ معیشت باز ردین حالت آ این ۔کھُل لوغی ایں پیداوار اۓ شرح آ باز کمی آتکا او اے بُنا بیسؤ نوہ پیصد تکا پُجھسا ،ہموزا تکا افراط زر اۓ تعلق ایں تہ آں گیش بیسؤ نوہ اعشاریہ چھیار پیصد تکا پُجھسا۔زر مبادلہ اۓ ڈمبار آ دی کمی بیسا او آں بُنا بیسؤ چھڑوئی آ نوہ ارب ڈالر رہسا۔اینگے حالت آ عمران خان اۓ دیما ھِچھ دیگر دگ نیا کہ آں آئی ایم ایف اۓ مُچھیں شرط آنر منی۔شرط آنر منغ آ پھدا نی پاکستان آر باز معاشی ڈسپلن اۓ ضرورت بی۔پاکستان آر نی دھشت گردی چکا قابو کھنغی بی،تاکہ امن اۓ ماحول آ ترقی اۓ پروجیکٹ آنی آپا فنڈ جوڑ کھنغ بیس بی۔پاکستان آ دھشت گرد تنظیم آنی مالی واہریائی آژ بین الاقوامی براسی آ باز پِکر ایں ۔ہمیں سبب ایں کہ پاکستان آ دیگر مُلک آنژ قرض مِلغ آ باز مشکل بیسا۔نی ایں روش صوبہ بلوچستان اۓ شہر گوادر آ دھشت گرد آں یک ہوٹل چکا ھِلگر کھُزا،ہمائی زمہ واری بلوچستان لبریشن آرمی آ گِتا،پنچ مڑدم کُشتی آ شُزغۓ ساں۔بلوچستان اۓ عوام چین ۔پاکستان اقتصادی راہداری اۓ دی حلاپ آں ہمائی اۓ گیشتر بہر صوبہ بلوچستان آژ بیسؤ گوزی ،آنہاں نی گُشغ ایں کہ آنہانر ہمیں راہداری آژ ھِچھ نپ او کھٹ نوی غیں۔صوبہ اۓ ہوٹل چکا ہماں کہ ھِلگر بیسا آں ثابت کھنت کہ ایزا اۓ مڑدم چین اۓ راہداری پروجیکٹ اۓ سَک حلاپ آں۔زکر اۓ لائیق انت کہ وتی سؤداگری دؤرہ اۓ نیمگا بازی آ تر چین اۓ مڑدم ہمیں ہوٹل آ بی آں۔بہر حال بین الاقوامی مالیاتی فنڈ آژ پاکستان  معاشی پریشانی آژ وختی ڈؤل چکا چھُٹی ،مگن دائیمی چھُٹغ آپا آنہی آ باز گام گیج کھنغی بی آں۔