سرگال:پومپیو ۔لیوروو بیٹھک ۔امن اۓ دیم روی

ہماں وخت امریکہ اۓ ڈن اۓ وزیر مائیک پومپیو آ روس اۓ دؤرہ کھُزا او وتی ہم منصب سرگئی لیوروو او صدر پوتن آگو بیٹھک کھُزئی تی اے بیٹھک ہمیں ٹؤک اۓ اشارہ اسا کہ روس آژ جھیڑو آسر کھنغ آپا روس او امریکہ اۓ نیمگا کسن ایں پھیمانہ اۓ نوخین مڑائی بِنا بیسا تہ بین الاقوامی براسی آ آنہی نوٹس گِتا۔امریکہ آ ڈن اۓ پالیسی اۓ تجزیہ کھنغ والا حلقہ اۓ بزیں مڑدم آنہی آ کسن ایں پھیمانہ اۓ ساڑتھیں مڑائی آگو تعبیر کھنغ نہ لوٹھاں،پھرچھے کہ آں روس آ ہمیختر طاغتور مُلک نہ مناں بلکہ سوویت یونین اۓ یک کسن ایں بہر پوہ بی آں۔اصلیت تہ اِش انت کہ ساڑتھیں مڑائی اۓ زمانہ آ دی امریکہ اۓ یک پوہ ایں طبقہ امریکہ او روس اۓ نیوکلائی براوری آ یک اصلیت اۓ وڑا منغۓ سا ،ہماں وخت دی باز امریکہ اۓ سرکار اۓ مڑدم روس آ
 امریکہ اۓ براوری کھنغ آپا پھدا منغۓ ساں ۔دو خیمہ آ ونڈسی ایں سروکی اۓ خاکہ امریکہ اۓ وٹا اسا پھرچھے کہ آنہی آ اقتصادی سطح چکا استحکام او تیکنالوجی اۓ کار آ آں اگا اسا۔مروشی دی امریکہ آ مشکل آگو کھسے ہمیں اصلیت آ منی کہ روس یک نوخین توانائی آگو گڑتھؤ آتکا۔کھسے دی آنہی آ اینگے طاغتور مُلک نہ منی ہماں کہ وتی نیوکلائی او میزائیل اۓ زور چکا امریکہ آ نُقصان پُجھینتھ کھنت،مگن آنہی باوجوت بین الاقوامی براسی پیسر اۓ سُپر پاور (روس)او نی ایں سُپر پاور امریکہ اۓ نیمگا جُزغ والا کسن ایں پھیمانہ اۓ ساڑتھیں مڑائی اۓ اصلیت آژ پوہ ایں۔ایران اۓ نیوکلائی منغ نامہ اۓ روس حمایت کھنت۔آں شامی سرکار اۓ دی واہریائی کھنغیں او وینزویلا اۓ مادُرو سرکار اۓ دی آنہی آ نی ایں روش آں حمایت کھُزا۔ہمیں اصلیت آنر اگر دیما ایر کھُزی آ برؤ تہ اے ٹؤک آسانی آگو پوہ آ کھاۓ کہ ٹرمپ سرکار آپا ہمیں مُلک آنی سرکار آ بدلاؤ آرغ اگر ناممکن نعیں تہ مشکل ضرور ایں۔اِشی آژ سرا حالت اے اسا کہ ہماں وخت روس آ بُرز اوسیتیا،جارجیا او رودرات یوکرین آ وتی پؤجی طاغت پھیدھارتھا او ایزا تکا کہ آنہی آژ اگا ودھسؤ کریمیا آ وتی آگو ملائینتھا تہ امریکہ ہماں وخت  چھڑوئی آتماشا گِندغۓ سا۔آنہی آ چھی اے پابندی تہ جھزغاں،مگن روس آ دارغ یا آنہی کار آنر بے اثر کھنغ آ ناسوب رہسا۔وتی پیش رو واجہ براک اوبامہ اۓ وڑا صدر ٹرمپ آ دی ہمیں ٹؤک اۓ کوشش کھُزا کہ روس آگو نوخیں سرا آژ سیال داری قائیم کھنت،مگن امریکہ اۓ وتی اندری ایں سیاست آ آنہی آ الادمیر پوتن آپا وتی سلوخ آ سخت کھنغ چکا لاچار کھُزا،ہمائی آ کے دھکا آںہی آ
 یک طاغتور لیڈر اۓ ڈؤل چکا دی منسا۔واجہ پومپیو لاویرو بیٹھک آژ اے ٹؤک پدھر بی کہ روس او امریکہ اۓ سیال داری آ وشتر کھنغ اۓ کوشش کھُزی آ رؤغیں۔بہر حال امریکہ او روس اۓ نیمگا اگر سیال داری وشتر بیسا او ہورین تعاون گیش بیسا تہ اے یک شَر ایں ٹؤک بی،آنہی آژ بین الاقوامی پھیمانہ چکا استحکام پیدا بی۔ھِند اۓ حق آ دی ہمیں شَر ایں بی ،پھرچھے کہ امریکہ ۔روس ناوشی اۓ نشانہ ھِند دی بی غیں۔ھِند امریکہ او سوویت یونین اۓ نیمگا ساڑتھیں مڑائی اۓ زمانہ آ کھس یک فریق اۓ بیسؤ نہ رہسغۓ سا او نی امریکہ ۔روس ناوشی آ دی آں ھِچھ یک اۓ حق آ فیصلہ کھُز نہ کھنت۔امریکہ اے لوٹھی کہ ھِند آ ہتھیار آنی شوشکغ آ گیش کھُنت،مگن روس آژ ہتھیار گِرغ چکا پابندی جھنغ نہ لوٹھی۔امریکہ اگر پابندی جھنتھ او اے شرط ایر کھنت کہ ھِند روس آژ ایس۔۴۰۰ میزائیل نہ گِری تہ آنہی آژ ھِند۔امریکہ سیال داری خطر آ کھاۓ برؤ،اگر روس او امریکہ اۓ سیال داری وشتر بیسا تہ اے ھِند آپا شَر ایں ٹؤک بی۔