سرگال:امریکہ او چین اۓ نیمگا سؤداگری مِڑائی

امریکہ او چین اۓ نیمگا سؤداگری مڑائی باز تیز بیسا۔جہان اۓ دو مزن ایں معیشت آنی نیمگا ہمیں سؤداگری مڑائی آ جہانی معیشت او عالمی امن او سلامتی آپا دی خطر پیدا کھُزا۔صدر ڈونلڈ ٹرمپ آ سروکی آ آئیغ آ پھدا ہی چین اۓ حلاپ سؤداگری مڑائی بنِا کھُزغۓ سا۔امریکہ آ چین اۓ شۓ آنی چکا اربیں ڈالر آنی گیش محصول لاگو کھُزا۔دوہمی وٹا چین اۓ گُشغ ایں کہ آں امریکہ اۓ گام آنی مناسو او گیش جواب دا۔چین اۓ الزام ایں کہ امریکہ آ تاریخ اۓ سجوں آنژ مزن ایں سؤداگری مڑائی بنِا کھُزا۔ڈونلڈ ٹرمپ آ نی ایں روش آں چین اۓ شۓ آنی چکا دو سد بلین ڈالر اۓ نوخیں درآمدی ٹیکس جھزا۔چین اۓ ڈن اۓ وزارت اۓ روگا اے ٹؤک دُکھ دؤخ انت کہ ،مگن بیجنگ سرکار آر دی نی جوابی کاروائی کھنغی بی ۔اِشی آژ سرا دی چین آ صدر ڈونلڈ ٹرمپ اۓ وٹاژ گیش محصول لاگو کھنغ چکا آنہی جواب آ امریکہ اۓ شۓ آنی چکا یک سد دھ بلین ڈالر اۓ ٹیکس جھزغۓ سا ۔چین آ خاصیں وڑا اینگے امریکہ اۓ شۓ آنر نشانہ کھُزا ہماں کہ ہمیں امریکی ریاست آ تیار بی آں ہموزا ریپبلکن پارٹی اۓ کنترول ایں۔ہمیں ٹؤک اۓ گُمان ایں کہ نوخیں محصول اۓ لاگو کھنغ آژ دوایں مُلک آنی نیمگا جاری سؤداگری مڑائی گیش بی۔امریکہ او چین اۓ نیمگا سؤداگری مڑائی مالیاتی منڈی آ بے باوری پیدا کھنغیں۔بے باوری اۓ ہمیں ماحول آ سرمایہ کار آنر نُقصان دیما کھنغی بی غیں۔نوخیں محصول اۓ لاگو کھنغ او چین اۓ جواب چکا تبصرہ کھُزؤ فرانس اۓ مالیاتی ایں وزیر اۓ گُشغ ایں کہ چین او امریکہ اۓ سؤداگری ناوشی آژ جہانی معاشی پیداوار چکا اثر بیس بی۔ہمیں وڑا کے ای دیگر مُلک او بین الاقوامی اقتصادی ادارہ آں دی وتی وتی پِکر آ پدھر کھُزا۔عالمی مالیاتی ادارہ آنی روگا امریکہ چین اۓ سؤداگری مڑائی عالمی سؤداگری اۓ شرح ترقی چکا اثر ماکھنغیں او چھی اے مُلک ہمیں سؤداگری مڑائی اۓ سبب آژ بالواسطہ ڈؤل چکا متاثر بی غاں۔صدر ڈونلڈ ٹرمپ آ سروکی آ آئیغ آ پھدا چھڑوئی آ چین اۓ پھجی آ ہی سؤداگری مڑائی بنِا نہ کھُزا بلکہ گوستی ایں سال کے ای دیگر مُلک آنی پھجی آ دی اینگے مڑائی بنِا کھُزئی۔صدر ٹرمپ آ امریکہ اۓ سؤداگر آنر امریکہ اۓ شۓ گِرغ چکا لاچار کھنغ آپا میکسیکو ،کینیڈا او یورپی یونین اۓ شۓ آنی چکا اینگے ہی محصول جھزا ہمینگا کہ آنہی آ چین چکا جھزا۔میکسیکو،یورپی یونین،او کینیڈا آ دی جوابی کاروائی کھُزؤ امریکہ اۓ شۓ آنی چکا اینگے شرح آژ محصول جھزا ہمینگا کہ امریکہ آ کھُزا۔ایران اۓ پھجی آ تہ صدر ٹرمپ آ ھُزائی ناوشی ایں ۔عالمی طاغت او ایران اۓ جوہری منغ نامہ آژ صدر ٹرمپ اۓ سروکی آ امریکہ اۓ یک وٹی ایں جتائی آ پھدا ایران اۓ حلاپ امریکہ اۓ پابندی آنی نتیجہ آ ناوشی گیش بیسا۔حالت ہماں تیزی آگو ردین بی غاں آنہی چھی اے اٹکل صدر روحانی اۓ ہمیں نی ایں پیرا آژ درا کھنغ بیس بی ہمائی آ آنہی آ امریکہ آگو پؤجی جھیڑو آ رد نہ کھُزؤ گوشتا کہ آنہی مُلک اینگے سخت زور آ دیما کھنغیں ہمائی ھِچھ نظیر گوستی ایں روش آں نہ مِلی۔نی ایں حالت آنژ اے اصلیت مُچھیں وڑا پدھر ایں کہ جھیڑو گیش بیسا اواگر نوبت مڑائی تکا پُجھسا تہ مُچھیں عالمی طاغت او جہان اۓ باز مُلک ھِچھ نہ ھِچھ وڑا حالت آنی لوٹھغ اۓ سبب آژ ہمیں مڑائی اۓ بہر بیس بی آں ،ہمائی آژ جہان اۓ مزن ایں پھیمانہ چکا اُتھل پُتھل او او تباہی اۓ شکار بی اغ اۓ مزن ایں خطر ایں۔