سرگال:پاکستان آ زائیف حوال کار آنی حلاپ جھیڑوئی عمل

پاکستان اندرا حوال کار او زانتکار آنی چکا سرا آژ پؤج اۓ یلغار رہسا۔حوال کار آنی زوان بند کھنائینغ آپا وڑ وڑ اۓ ظلم او جبر آنہاں نی چکا کھُزی آ رؤ بلکہ آنہانر وتی زمہ واری آنژ دارغ آپا چُنتی ڈؤل اۓ سیاحیں قانون دی لاگو کھُزی آ رواں مگن یک حوصلہ دؤخ ٹؤک اِش انت کہ پاکستان اۓ حوال کار آں ہر چیلنج اۓ مقابلہ کھُزا۔اے وخت گُشغ آپا پاکستان آ جمہوریت ایں او سرکار اۓ سروک پاکستان تحریک انصاف اۓ عمران خان ایں۔آں ہماں وخت اپوزیشن آ اسا تہ مزن ایں بُلند دعوی کھُزئی کہ آں یک نوخیں پاکستان ٹھائینی۔باز پڑھیا لکھا ورنا آنر آنہی نعرہ آں وتی وٹا چھِکسا او گوستی سال ہماں وخت آں سروکی آ آتکا ہماں وخت دی آنہی آ نوخیں پاکستان اۓ نعرہ داسا۔مگن یک سال آژ کھمیں مُدت آ ہی مڑدم آنر اٹکل بیسؤ شُزا کہ آنہی نعرہ چھڑوئی آ دروغ اساں۔دیگر مسلہ آنر تہ اِلے ،وا حوال کار آنی چکا ہمیختر زور ایں کہ اینگا مان کھاۓ کہ گام گام چکا آنہاں نی آواز آ بند کھنغ اۓ کوشش کھُزی آ رؤغیں۔اینگا مان کھاۓ کہ نی دی پاکستان چکا سدھائی آ پؤج اۓ سروکی ایں۔وتی حوال کار اۓ زمہ واری پھیلو کھنغ اۓ ڈوہ آ حوال کار آنی چکا نہ چھڑوئی آ پابندی جھزی آ رؤ بلکہ آنہاں نی ظلم کھُزی آ رؤ۔حد تہ اِش انت کہ زائیف حوال کار آنی حلاپ آن لائین دی ردین تبصرہ کھُزی آ رؤ او ردین لپظ آنی استعمال کھُزی آ رؤ۔لاہور اۓ یک زائیف حوال کار محمل سرفراز آ وتی یک نی ایں پیرا آ زائیف حوال کار آنی پھجی آ بی اغ والا آن لائین ردین سلوخ آنی زکر کھُزا۔آنہی آ یک حوال کار آسما شیرازی اۓ زکر کھُزؤ لکھسا کہ آنہی آ گوستی ایں سال ۱۳ جولائی آ پیسر اۓ سروزیر نواز شریف اۓ یک انٹرویو کھُزغۓ سا۔اے ہماں وخت اسا ہماں وخت نواز شریف آ سزا اُش کھنائینتھی آ شُزغۓ سا او آں وتی جِنکھ مریم اۓ پھجی آ لندن آژ سزا آپا گڑتھؤ پھیزاغۓ سا ۔انٹرویو تہ حیر سینسر شپ اۓ سبب آژ نشر نویسا۔مگن ٹؤک ہموزا آسر نویسا۔اسٹیبلشمنت اۓ مڑدم آں
آن لائین آسماشیرازی اۓ بدگوشی کھنغ بنِا کھُزا۔ہماں زائیف حوال کار اۓ گُشغ ایں کہ آنہی آ چھی اے روش آنی تکا تہ ٹویٹر گِندغ دی بند کھُزا۔محمل سرفراز اۓ روگا اے دپ ھِچھ اولی ایں دپ نیا ،گوستی ایں ماہ ماروی سرمد پھجی آ کے ای اینگے حوال کار آنر ہماں ہا سرکار اۓ حلاپ تنقید کھُزغۓ سا ،آنہانر ٹویٹر چکا زاں داسی آ شُزغاں۔زائیف حوال کار آنر خاصیں ڈؤل چکا نشانہ کھُزی آ رؤغیں۔محمل سرفراز اۓ گُشغ ایں کہ اے باز بد بختی اۓ ٹؤک انت کہ اے مُچھیں ٹؤک حاکم زاناں۔آں جمہوریت اۓ ٹؤک تہ کھناں مگن تنقید برداشت نہ کھناں۔ہماں وخت کھسے انصاف آپا آواز کھڑو کھنت تہ مُچھیں سسٹم لاچار بی برؤ۔عمران خان آژ پھول کھنغ لوٹھی کہ چھے ہمیں آنہی اۓ نوخیں پاکستان اۓ طرہ امتیاز ایں؟