سرگال:کشمیر چکا پاکستان اے بوکھلائینغ 

پاکستان اے سروزیر عمران خان آ گوستی ایں روش آں قوم آگو گشتانگ کھزؤ کشمیر اے مسلہ چکا ٹؤ کھُزئی ۔اگر ما آنہی گشتانگ اے جائیزہ گِروں تہ آں تضاد آنی ڈمبار مان کھاے ۔آنہی آ ہموزا یک وٹا اے دعوی کھُزا آنہی آ کشمیر اے مسلہ آ بین الاقوامی دیم داسا ہموزا آنہی آ شکایت دی کھُزا کہ جہان خاص ڈؤل چکا مسلمان ملک کشمیری آنی سنگتی نہ کھنغاں ۔آنہی آ کشمیر اے مسلہ چکا اقوام متحدہ اے سلامتی کونسل اے بند کمرہ اے اجلاس آ وتی مزن ایں سپارتی سوب مندی منسا ہموزا اے دی گوشتئی کہ عالمی ادارہ عامین ڈؤل چکا طاغتور اے گون بی آں ۔آنہی آ اے گیر کھنائینتھؤ کہ سوا ارب مسلمان اقوام متحدہ اے وٹا گندغاں،گوشتئی کہ مزلوم کشمیری آنی مدد کھنغ اے زمہ واری آنہی چکا بی ۔آنہی آ ہموزا اے ڈسغ اے کوشش کھُزا کہ آنہی سفارتی کوشش آنژ جہان اے ملک آں کشمیر اے خاصیں آئینی حیثیت آسر کھنغ اے ھِند اے گام اے بدگوشی کھُزا ہموزا اے دی گوشتئی کہ چھے مسلمان او دیگر ملک چھڑوئی آ
وتی اقتصادی نپ او کھٹ آر ہی گِنداں۔آنہی گشتانگ آژ اینگے مان آغے سا کہ آں بلکل حیران ایں ۔آں اے
پوہ نوی غیں کہ آنہی آر چھے گُشغ لوٹھی او چھے نہ ۔چوش کہ کشمیر اے مسلہ اے بارو آ وتی عوام آ تیش آ ایر کھنغ آپا آنہی آ وتی گشتانگ آ کشمیر چکا گیش دھیان دیائینتھا۔آنہی پھجی آ ہی آنہی آ جہان آر اے ڈسغ اے کوشش کھُزا ھِندوستان او پاکستان ہڑ دوایں ملک نیوکلائی طاغت ایر کھناں او نیوکلائی مڑائی آ کھسے اے دی کھٹغ نویس بی ۔پاکستان تہ ایٹم بم ایر کھنغ اے پاترپت دا مگن آنہی نقصان آژ چھم
چھَرینی ۔سروزیر عمران خان آ کشمیر اے بارو آ گرےاغ اے گون وضہار کشمیر اے امبیسڈر دی ڈسسئی۔یعنی نی کشمیر اے بارو آ ٹؤک کھنغ اے حق چھڑوئی آ نی آنہی آ ایں او اے کہ کشمیر اے بارو آ
آں ہماں دی ٹؤک کھنت جہان آ آنہی آر منغ لوٹھی۔چوش کہ آنہی کوشش آنژ چین آ سلامتی کونسل اے باسک آ کشمیر چکا غیر رسمی اجلاس لوٹھائینغ چکا راضی کھُزا مگن آں اجلاس تھانگے اسا ہر کھسے
زانی۔جہان اے نیاہ اندرا ہمیں وڑ اے بیٹھک آنی ھچھ اہمیت نعیں۔باز ملک ھِند اے ہمیں ویچار آر مناں کہ
اے مسلہ جہانی نعیں بلکہ ہڑ دوکین ملک آنی آپسی ایں دو نیمغی مسلہ ایں ،آنہی آ ہڑ دوایں ملک گپتران
آگو حل کھناں۔آنہی ھِچھ سے ملک اے نیمگا آئیغ یا ثالثی کھنغ اے ھچھ حق نعیں۔ھند اے ڈن اے وزارت
اے نمائینگ رویش کمار آ راست گوشتا کہ پاکستان آر لوٹھی کہ آں یک عامین ہمسائیگ اے بھیرا سلوخ کھنت۔ہماں وڑا یک عامین ہمسائیگ وتی ہمسائیگ آگو گپتران کھزؤ مسلہ آنی حل درا کھنت ہماں وڑا پاکستان آر دی کھنغ لوٹھی۔آنہی آ وتی ہمسائیگ ملک آنی اندرا دھشت گرد دیم دے اغ بند کھنغ لوٹھاں او آنہی آر لوٹھی کہ مسلہ کشمیر آ عالمی دیم دے اغ آ اِلسؤ ھِند اے گون گپتران کھنت۔او آنہی پھجی آ گپتران ہماں وخت ممکن ایں ہماں وخت آں دھشت گردی بند کھنت ۔چھے پاکستان آنہی آپا تیار ایں؟