سرگال:پاکستان عجیو ایں نمونہ اندرا

پاکستان اے وخت ھند ریاست جموں و کشمیر سرا وتی ویچار آنر گِتؤ عجیو ایں نمونہ آژ گوزغیں ۔ہماں وخت آژ ھِند آ دفعہ سے سد او ہپتاد آ ماتل کھُزؤ ریاست اے خاصیں درجہ آسر کھُزا ،ہماں وخت آژ پاکستان ہمیں مسلہ آر بین الاقوامی دیم دے اغ اے کوشش کھنغیں ۔اسلام آباد تہ مڑائی اے جنون پیدا کھنغ آژ دی پھدا نہ ہٹغیں مگن ہمیں مُچھیں کوشش آنی باوجوت آنہی آ بین الاقوامی واہریائی نہ مِلغیں ۔ایزا تکا کہ رونشت آسیا اے آنہی اے طاغتور سنگت آنژ دی آنہی آ مایوسی دیما ایں ۔اے سری ایں دھکا ایں کہ عالم اسلام کشمیر اے مسلہ چکا چُپ تِشتی ایں او اگر چھی اے ملک آں وتی ویچار پدھر دی کھُزغاں تہ آنہاں ھِند اے ویچار آنی حمایت کھُزا کہ اے ھِند اے اندری ایں مسلہ ایں ۔پاکستان کشمیر اے مسلہ چکا پِٹکو کھنغیں او اگر کھسے ملک آ آنہی پِٹکو اے نوٹس گِتا تہ آں ترکی او ملیشیا آں مگن آنہاں کشمیر اے
مسلہ چکا تبصرہ کھنغ آژ گریز کھُزا۔ملیشیا آ تہ ھِند اے فرار بیسغیں زاکر نائیک چکا پابندی جھزا ہمائی
آ ملیشیا اے سماج اے حلاپ پیرا داسغے سا ہمائی سبب آژ مڑدم آنی اندرا باز تیش پیدا بیسغے سا۔اقوام متحدہ اے سلامتی کونسل آ دی پاکستان آ ناسوبی دیما کھنغی بیسا ۔چین اے ایما چکا سلامتی کونسل آ یک
غیر رسمی بیٹھک تہ ضرور لوٹھائینتھغے سا مگن آنہی ھچھ نتیجہ درا نویسا۔ہمیں ناسوبی آ پھدا پاکستان
آ وتی عوام آ پھَرامغ آپا پیرا دے اغ بنِا کھُزغاں ۔سروزیر عمران خان آ ہمیں ہپتغ اے بنگیج آ مڑائی کھنغ
اے پاترپت داسا ۔آنہی آ گوشتا پاکستان اے عوام کشمیری آنی گون ایں مگن آنہی آ اے پدھر نہ کھُزا کہ تھاں کشمیر۔عمران خان آ تہ جہاد بنِا کھنغ اے دی پاترپت داسا ۔آنہی کابینہ اے رفیق ریلوے اے وزیر شیخ
راشد آ تہ ایزا تکا گوشتا کہ ھِند او پاکستان اے نیمگا اکتوبر تکا مڑائی بنِا بیس بی ۔آنہی آ گوشتا کہ کشمیر
اے مسلہ سروزیر عمران خان او پؤجی سروک جنرل قمر باجوا اے مُدت آ ہی حل بی رؤ۔ہمیں وڑ اے بے
معنی پیرا آنژ صاف پدھر ایں کہ پاکستان آ طاغتور او اعلی عہدہ آنی چکا مڑدم دی واہو اے جہان آ بیس بی آں ۔ہمیں وڑ اے پیرا پاکستان اے دماغ اے حالت آنر دی ڈسساں ۔نوزدہ چھِل او ہپت آ جموں و کشمیر اے ھِند آ گو جُڑغ آ پھدا آژ ہی نوخیں دلی آ اے صاف کھُزا کہ اے ریاست ھِند اے مضبوط بہر ایں ۔پاکستان آ تہ ھِند اے سیزد ہزار مربع کلومیٹر اے جاگاہ چکا قوضہ کھُزؤ ایر کھُزا او آنہی اے چھی اے بہر تہ آنہی آ چین آر داسا ہمیں خاطرہ پاکستان آ غیر قانونی ڈؤل چکا قوضہ کھُزی ایں جاگاہ آر ھِند آر گڑدینغی بی ۔نی اسلام آباد آژ اگر ھِچھ ٹؤک بیسا تہ آں چھڑوئی آ پاکستان اے قوضہ والا جاگاہ چکا بی
اے ٹؤک پاکستان چکا دی صاف کھُزی آ شُزا۔دپاعی ایں وزیر راج ناتھ سنگھ آ گوشتا کہ پاکستان اے پھجی
آ مقبوضہ کشمیر اے علاوہ دیگر ھِچھ مسلہ چکا ٹؤک نوی۔اگر ھچھ ٹؤک بی غی ایں تہ سجوں آنژ سرا اسلام آباد آر دھشت گرد آنی واہریائی کھنغ بند کھنغی بی۔