آمریکہ-طالبانی نیامئ امن و امانئ معاھدہ و اوگانستانئ سرکارئ تشویش۔

بہ اوگانستانئ آیوکین وھدہ بھرا مروچین روچان آمریکہ و طالبانی نیامئ رادگین امن و امانئ گپ و ترانئ چرچہ بہ برزین کچانہ انت۔ ای گپ و ترانئ سلسلہ بلہ گئوستگین سالئ آخر سرا بناہ بوت و شہ آخری مرحلہ آن گئوستگیت و نون ای ھبر بہ گوشان رسیت کہ امنئ معاھدہ تفصیلات طئ بوتگنت۔ ھمی گپ و ترانئ کہ بہ آمریکائیان و طالبانی نیاما رادگ ات بری ایشی بھرا یک ھبرئ شہ اول سرا تہ آخر سرا گیشترکین حلقہ آنا بہ پکرا پرینت کہ اوگانستانئ گیچئن بوتگین حکومت بری آخر سرا چی وڑئ رول و کوتئ داریت؟ طالب شہ ھما اولی روچا ای مواقف آ اختیار کرتنت کہ آ گون اشرف غنی حکومت و آی نمایندگان ھیچ وڑئ و بہ گیچ کچانہ گپ و تران کنگئ لوٹوک نہ انت۔

ایشی دلیل ایش گشتگ بوتت کہ ای حکومت آمریکہ پھٹو یا دستئ چیرئ حکومت انت۔ مگہ گون آمریکہ حکومت آ گپ و تران کنگا طالب ھیچ مسئلہ نہ داشتنت۔ اول سرا آمریکہ ھم امیشی لوٹوک ات کہ طالب گون بہ آمریکہ جاگہ گون اوگانستانئ حکومت آ گپ و تران کننت و بہ اوگانستانئ آیوکئ باروا گجام فیصلہ کننت، و آمریکہ رندا بری گپ و ترانان کوت گپتگ کنت۔ مگہ رندا نانگمان بہ جمھورین سدر ٹرامپ پالسی آ بدلینگئ ات۔ بہ آوانی پکر و حیالا پہ اوگانستانئ آوان جالی ایشیائ نوکین پالسی جارا جتنت، کہ بہ آی سیائگا بہ ھما کَسانی حلاپا کہ شہ طالب و دشت گردان نیمہ داری کرتنت و پہ آوان مدد کرتنت سَکین رویہ اختیار بوت۔ بری سلسلہ یک بدلینگئ دیگہ ھم ات وھدہ کہ پہ پاکستان کہ شہ طالب و پوجیان نیمہ داری کنت وتی پوجین مددانا اوشتارینت۔ رندا آوانی نوکین فیصلہ ایش ات کہ آ لوٹوک انت کہ شہ اوگانستان وتی پوجیانا بہ زوترین وھدہ ڈنا در کننت و گشتنت شہ ھمی وجا گپ و تران گون طالبان زروری انت۔

پہ گپ و ترانان گون طالبان آمریکہ وتی خاسین نمایندگ کہ اوگانستانئ نژادئ – آمریکائی انت و آی نام زلمئ خلیل زاد انت آ گیچئن و ملازم کرت۔آمریکہ و  طالبانی نیامئ گپ و ترانئ سلسلہ بہ قطرئ مُلکئ دوحہ شھرئ تھا بناہ بوت۔ مگہ شہ ھما اول سرا تہ آخر سرا ای گپ و ترانانی تھا اوگانستانئ حکومت یا نمایندگ ھیچ وڑئ رول و کوتئ نہ داشتنت و ای ھبر نون بی پسوئ انت کہ اگہ آمریکہ و طالبانی نیاما معاھدہ تسر و ختم بیت  رندا اوگانستانئ آیوکین وھدہ سیاسین نقشہ چی وڑا بیت۔ دومی اھم و تشویشئ وڑئ ھبر پہ اوگانستان آ ایش بوتہ کہ بری گپ و ترانانی وھدہ اوگانستانئ تھا دھشت گردین ھلگرانی اشمار کم نہ بوت بلکہ ای ھبر محسوس بوت ھمی وڑا کہ کرار کرات گپ و تران دیمرئی کرتنت ھما راز دھشت گردین ھلگرانی اشما رھم گشیتر بوتہ شوت۔

ای کنفیوژن ماحول تھا اوگانستانئ تھا یک مزنئن حلقہ شہ استمانا بہ برزین کچانہ تروستگ چما کائیت خاسین وڑئ اوگانستانئ بانوک کہ رندا شہ طالبانی نوازا پہ کمین وھدہ گون اطمینان نپس کشتنت و گون نوکین جوش وجذبہ بہ اوگانستانئ حکومت ا دیگہ کارانی تھا کوت گپتنت آ ھم نون سَکین وڑئ بہ تشویش آ انت۔ ای ھما مردم انت کہ بری پکر و حیالا انت کہ شہ نشانان ای راز معلوم بیت کہ رندا شہ ایشی کہ امریکہ و طالبانی نیاما امن و امانئ معاھدہ تسر بیت رندا اواگانستانئ تھا پوجئ بالادستی یک وارئ دیگہ قائم بوتگ کنت۔ آوانی ای تشویش و پکر بی وج ھم نہ انت۔ پہ چہ کہ بہ گپ و ترانئ دورہ وھدہ ھم دھشت گردین ھلگر بہ اوگانستانئ تھا رادگ اتنت کہ بہ آواناوگانستانئ سیکورٹئ ڈل، پوجین دپتر و ماڑی، پولیسئ کارکنوک، سرکارین کارکنون و ھور گون آوان شھروند و گیرپوجی ھم نشان گپتگ بوتنت کہ بہ آوانی تھا بانوک و گونڈکانی اشمار بہ برزین کچانہ بوتہ۔

بہر حال آمریکہ خاسین نمایندگ پہ ام  و امانئ گپ و ترانان واجہ زلمئ خلیل زاد بہ گئوستگین روچان شہ اوگانستان دورہ کرتنت و آدنا گون اوگانستانئ سروکین اپسران گیند و نیند کرتنت و پہ آوان گشتنت کہ گون طالبان معاھدہ ھما تفصیلاتئ کہ است آمریکہ گون آوان اصولین وڑئ تپک کنت و بہ ھمائی سیائگا آمریکہ پوجی شہ اوگانستان آ ڈنا دربنت۔ مگہ ای راز معلوم بیت شہ ھما ھبرئ کہ پہ حکومتئ اپسران داتگ بوتگیت حکومت مطئمن نہ انت۔ بہ گئوستگین ھپتگئ تھا اوگانستان دیم بہ ای ھبرا اشارہ کرت کہ اوگانستان نون ھم خطرہ محسوس کنت۔

کابلئ حکومت بری بھرا سَکین ردعملئ درا نہ کرتگیت مگہ جمھورین سدر واجہ اشرف غنی گوشوک صدیق صدیقی گشتگیت کہ اگہ امن و امانئ راھ ھموار بیت شہ آی نیمہ داری زرور بیت مگہ حکومت لوٹوک انت کہ رندا شہ ای امن و امانئ معاھدہ ھر نتیجہ کہ دیما کائیت گجام منفین اثرئ داشتگ مہ بیت۔

واجہ صدیقی بری پکر و حیالا انت  کہ ھر دستاویز و معاھدہ کہ اختیار بیت بیدئ آی پر تفصیل ئن پٹ و پول آ گجام ھبرئ دیگ مشکل انت۔ شہ ایشی کچانہ جتگ بیت کہ ھما ھبرئ کہ واجہ زلمئ خلیل زاد داتگنت بہ آوانی تھا بازین ھبر تفصیل طلب انت و تہ وھدہ کہ پورہ ئن وڑئ آ ھبرانا سرپھد مہ بنت اوگانستانئ تھا تشویشئ ماحلو رادگ مانیت۔ مناسب امیش انت کہ آمریکہ نہ تھانکا پہ اوگانستانئ حکومت آ بلکہ پہ اوگانستانئ استمانا ھم درائین وڑئ ای ھبرا گشیت کہ رندا شہ ای معاھدہ نفاذ ا چی بیت پہ چہ کہ ھر چیزئ کہ بیت آی اثر راستامین وڑئ بہ اوگانستانئ استمانئ سرا کپیت کہ نون بہ تشویش آ انت۔