سرگال:ٹرمپ اے طالبان آگو امن گپتران رد کھنغ اے فیصلہ

نی ایں ہپتغ آنژ بروبر اے حبر پھیزاغے ساں کہ امریکہ او طالبان اے نیمگا افغانستان آ امن قیام اے بارو آ دوحہ آ گپتران اے سلسلہ جزغیں او گپتران اے کے ای مرحلہ شَر ایں وڑا طے بیسغاں ۔نی ایں روش آں تہ اے حبر دی آتکا گپتران پھیلو بیسا او منغ نامہ اے خاکہ تیار بی غیں ۔مگن ہمیں حبر آنی نیمگا اے حبر دی تھرغاں کہ طالبان اے ھِلگر دی بروبر جُزغاں ۔طالبان یک وٹا گپتران آ یک فریق اساں مگن دوہمی وٹا تشدد اے عمل آنی اندرا دی اوار اساں ۔اے نہ چھڑوئی آ اوار اساں بلکہ مزن ایں فخر آگو ہمیں ھِلگر اے زمہ واری دی گِرغے ساں ۔اے بے واجبی نیا تہ گُڈا دوہمی چھے اسا کہ ہمیں مڑدم آنژ امن اے امیت

کھُزی آ رؤغے سا ہماں کہ بد امنی ودھینتھؤ امن اے گپتران آ شریک بی غے ساں ۔دوہمی ٹِک اے اسا کہ

وا افغانستان اے عوامی دُھر آنی نیمگا گپتران اے بارو آژ وڑ وڑ اے سوال کھڑو بی غے ساں ہمائی اے ھِچھ جواب نہ مِلغے سا۔یک پُرس تہ اے اسا کہ طالبان افغان سرکار آگو گپتران کھنغ چکا کھدیں دی آمادہ

پھرچھے نویسغاں؟گُڈا صدارتی گچین کاری دی ہمیں ماہ اے آخیر آ بی اغ والا ایں،درگتہ کہ گچین کاری آ

خلل ماکھنغ اے کوشش دی بی غاں ۔وا نائیب صدر اے عہدہ آپا امیتوار چکا دی زِند گروخیں ھِلگر بیسا ہمائی آ آں بھچسا۔بہر حال اے مُچھیں ٹؤک اُلٹا ایں بھیرا مان آغے ساں۔ہر وٹا کنفیوژن او بے باوری اے

ماحول اسا ہماں کہ نی دی برقرار ایں۔ہمیں نیمگا اے فیصلہ دی بیسا کہ کیمپ ڈیوڈ آ صدر ٹرمپ طالبان

اے لیڈر او افغان صدر ڈاغدار اشرف غنی اے گون لکسؤ بیٹھک کھنغ والا ایں ۔اے بیٹھک مروشی یعنی

یک شمبھے آ بی اغ والا اسا او آنہی آپا طالبان اے نمائیندگ او صدر اشرف غنی شمبھے آ کیمپ ڈیوڈ آپا

روانہ دی بیسغے ساں مگن گُڈا اچانکی آگو صدر ٹرمپ آ نہ چھڑوئی اے خفیہ بیٹھک رد کھُزا بلکہ مزن

عرصہ آژ جُزوخیں گپتران آ دی ماتل کھُزؤ اِشتئی۔ہمیں ٹؤک آنی اطلاع آنہی آ ٹویٹ آ داسا او آنہی سبب آنہی آ اے ڈسسا کہ گوستی ایں پنچ شمبھے آ طالبان آ کابل آ ھِلگرکھُزؤ دوازد مڑدم آنر کُشتغے سا ہمائی آ

یک امریکہ اے پؤجی دی اوار اسا۔وتی یک ٹویٹ آ صدر ٹرمپ آ گوشتا کہ اگر امن آپا ہمیختر خاصیں

گپتران آ دی طالبان اینگے ھِلگر کھُز کھناں تہ آنہی مطلو ہمیں بیسا کہ اینگے مڑدم آنگو معنی دار گپتران

او منغ نامہ نویس بی۔پدھر ایں وڑا تہ اے مان آغیں کہ صدر ٹرمپ ہمیں ھِلگر آژ باز ناوش بیسا او آنہی آ

گپتران آ رد کھُزا مگن اندری ایں زریعہ آنی اے دی گُشغ ایں کہ ٹؤک چھے اے دوہمی دی ایں۔بہر حال نی حالت پدوارغ ہموزا پُجھسا ہموزا امن گپتران بِنا بی اغ آژ سرا اسا۔اصل آ طالبان ڈول اے ٹلہ آنژ اے

امیت کھنغ بے کار اسا کہ امن گپتران آ آں اینگے کردار کھُز کھناں ہمائی اے روگا افغانستان آ امن قائیم

بیس بی ۔