سرگال:دین ائے بے حرمتی ائے نام چکا مڑدمی حق آنی پامالی ائے ردین مثال

ھِچھ دی مزہب یا مزہبی پیشوا آنی بے حرمتی کھنغ ہر معاشرہ اندرا ردین منسی آ رؤ۔مزہب یا مزہبی مڑدم آنی ٹؤک تہ اِلے ھِچھ عامین مڑدم آر دی ھِچھ گُشغ اخلاق آژ بُنا ٹؤک ائے زمرہ آ کھائے۔دین ائے بے حرمتی کھنغ تہ باز مزن ایں ڈوہ ایں۔آنہی آژ مڑدم آنی جزبہ ٹھپی بی آں او جھیڑو پیدا بی۔ہمیں خاطرہ جتا ملک آنی اندرا ہمیں وڑ ائے ٹؤک آنر دارغ آپا مناسب قانون لاگو ایں۔برصغیر ھِند او پاک آ دی بیست می صدی ائے بنگیج آ یک اینگے قانون لاگو کھُزی آ شُزغئے سا۔مگن پاکستان آ جنرل ضیاء الحق ائے زمانہ آ ہماں وخت مزہبی انتہا پسند آ گیش کھنغ ائے کوشست کھُزی آ شزغئے سا تہ ہمیں قانون اندرا سختی کھُزی آ شُزااو پھاہو ائے سزا ائے جاگاہ پیدا کھُزی آ شزا،بہر حال قانون ھِچھ دی بی آنہی اصل ایں مقصد لاقانونیت آ دارغ او معاشرہ اندرا امن امان برحال کھنغ بی نہ کہ لاقانونیت آ گیش کھنغ بی۔پاکستان اندرا ہمیں قانون ائے باز ردین استعمال بی غیں آنہی سبب آژ تشدد باز گیش بی غیں۔چوش کہ پاکستان ائے باز حاکم آں سیاسی نپ او کھٹ آپا مزہبی انتہا پسندی آ سدھائی آ یا باالواسطہ گیش کھُزا ہمیں خاطرہ مڑدم دین ائے بے حرمتی ائے نام چکا قانون ائے تعلق آژ دی ہمیختر جزباتی بیسا کہ راست ایں ٹؤک تکا پُجھغ ائے بجائے چھڑوئی آ الزام یا دروغ آ ہی اصلیت منسا او ہمائی چکا اینگے الزام جھزی آ رؤ تہ مڑدم آنی حون آ ورغ آپا تیار بی آں ۔مزہب ائے نام چکا جنون آ شعوری ایں ڈؤل چکا گیش کھُزی آ رؤ تہ آنہی نتیجہ باز ردین بی آں ۔پاکستان اندرا جزبہ آنی ہمیں عالم ایں کہ اگر عدالت اندرا قاضی ڈوہی آ بے ڈوہ منسؤ آنہی آ رہا کھنت تہ آنہی حیر نعیں۔اینگے کے ای دپ بی آں ہمائی آ عدالت آژ تہ رہائی مِلسا مگن جنونی مڑدم آں آنہی آ کُشتا۔مزن ایں قاضی آر دی نہ چھڑوئی آ دھمکی مِلسا بلکہ آنہی چکا اُرش دی بیسا۔نی گیش روش کہنیں ٹؤک نعیں کہ یک غریو عیسائی زائیف آسیہ بی بی آ مزن ایں عدالت آ ہمیں ڈوہ آژ رہا کھُزا،آنہی چکا یک مزہبی دھشت گرد جماعت تحریک لبیک پاکستان آ باز احتجاج کھُزغئے سا۔آسیہ بی بی ہمیں الزام آژ رہا تہ بیسا مگہ آنہی آ وتی وطن اِلغی بیسا۔نی ایں روش آں یک نوخیں دپ دیما آتکا پاکستان ائے مزن ایں عدالت آ عجیہہ الحسن نام ائے یک مڑدم آ ہمیں ڈوہ آژ بری کھُزا۔آنہی چکا ہشدھ سال سرا مزہب ائے بے حرمتی کھنغ ائے الزام جھزی آ شُزغئے سا۔عدالت آ وتی فیصلہ اندرا گوشتا کہ یک نمدی ائے بُنشت چکا آنہی چکا الزام جھزی آ شُزغئے سا مگہ عدالت آ ھِچھ  ثبوت پیش نہ کھُزی آ شُزا۔سجوں  آنژ مزن ایں المیہ تہ اش ایں کہ پاکستان ائے ہمیں یک اینگے قانون ایں ہمائی ھِچھ مڑدم اگر بے ڈوہ دی ثابت بیسا او عدالت آژ رہا دی بیسا گُڈا دی آنہی زند مِرغ آژ دی بدتر بی۔