سرگال:پاکستان اندرا میڈیا آپا جِتا عدالتی نظام ائے وکالت

پاکستان آ عمران سرکار ائے دیما تجویز پیش کھُزی آ شُزا کہ یک اینگے ٹربیونل قائیم کھُزی آ برؤ ہماں کہ حوال کار آنی بارو آ مسلہ آنی پٹ او پھول کھنت او حوال کار آنر چھی اے ٹؤک آنی پابند کھُزی آ برؤ۔اصل آ عمران خان وا دی حوال کار آنی تعلق آژ بد گُمانی ائے شکار رہی۔آنہی پارٹی
اندرا اے احساس ایں کہ حوال کار وتی فرض آ ایمانداری آگو پھیلو نہ کھناں۔ممکن ایں کہ چند حوال کار آنی بارو آ اے ٹؤ راست دی بی مگہ مُچھیں حوال کار براسی آنر گُمان ائے نیاہ آژ گِندگ راست
نعیں ۔ہمیں ٹؤک ائے دی ھچھ جواز نعیں کہ حوال کار آنی آپا یک جتا ٹریبیونل ٹھائینتھؤ آنہاں نی مسلہ آنر آنہی اندرا ایر کھُزی آ برؤ ۔سوال اش انت کہ سرکار آر اشی چھے گزری ایں او حوال کانر
آ اینگے تھاں ڈوہ کھُزا کہ آنہاں نی آپا جتا ٹریبیونل ائے قیام ائے تجویز پیش کھُزی آ شُزا۔اصلیت
اش انت کہ پاکستان اندرا کھدیں دی آجو حوال کارگی آپا شَر ایں ماحول نہ رہسا۔سری ایں المیہ تہ
اش انت کہ ملک ائے تاریخ ائے مزن ایں بہر پؤجی حاکم آنی ظلم او جبر آ گوستا او نہ چھڑوئی آ
حوال کارگی بلکہ دیگر جمہوری ادارہ آنر دی پھاہو دئے اغ ائے کوشست کھُزی آ شُزا،مگہ اشی
آژ دی گیش دُکھ ائے ٹؤک اش انت کہ مبینہ جمہوری سرکار اندرا دی میڈیا آر دبائینغ ائے کوشست
کھُزی آ شُزا۔حوالکارگی آ جمہوریت ائے چھیارمی ستون گوشتی آ شُزا،مگہ پاکستان اندرا جمہوریت نام چکا سروکی سنبھالغ والا آنر دی کھدیں ہمیں ستون آ مضبوط کھنغ ائے کوشست نہ کھُزی آ شُزا بلکہ آنہی بر عکس حوال کار آنی چکا زور ماکھُنغ او آنہانر تھُڑسینغ ائے دپ ہر روش
بی غاں۔پاکستان اندرا حوال کانر ہماں ماہل آگو زند گوازینغی بی آنہی آژ مچھین جہان پوہ ایں۔
آنہاں نی حلاف دروغی ایں مقدمہ درج کھُزی آ رواں ۔آنہانر رپورٹنگ ائے وخت آ پریشان کھُزی آ
رؤ او کھدیں کھدیں چیلنج آنی چکا جُزغ والا ایں ھِچھ پروگرام آ مفاد عامہ ائے نام چکا جبر آگو داشتی آ رؤ،آنہانر وتی پیشہ ائے ڈؤل آژ ھچھ درجہ دی مِلسی آ نعیں۔اشی باوجوت اگر سرکار آ حوال کار براسی ائے عمل ہمیختر ناوش آں کہ آنہاں نی کار آنی نگرانی آپا یک جتا پٹا او پھول ٹربیونل ائے قیام ائے تجویز ایں تہ آنہی چکا چھڑوئی آ دکھ کھنغ ہی بیس بی۔پاکستان اندرا حوال کانر آر یک دھکا نہ بلکہ چنتی دھکا زنجیر ماکھنغ ائے کوشست کھُزی آ شُزا۔اینگے کوشست پؤجی
حکومت آنی وخت آ دی بیسغاں ۔عمران خان ائے سجوں آنژ مزن ایں شکایت اش انت کہ باز حوال
کار حاکم آنی حلاپ ردین زوان اے ستعمال کھنان ۔اگر اینگا ایں تہ جتا ٹریبیونل قائیم کھنغ ائے چھے ضرورت ایں اے تہ عامیں عدالت آ دی بیس بی ۔اصل آ اشی آژ سرکار ائے اصل ایں نیت ائے
اٹکل بی۔