سرگال: سرئ اخطار و دھشت گردین دپ دیگان اوگانستانئ جمھورین سدرئ گیچئن کاری تسر بوت۔ 

 گئوستگین ھپتگئ تھا، سرئ بازین اخطار و تشدد آمیزئن لگگ و دپ دیگان اوگانستانئ تھا جمھورین سدرئ گیچئن کاری تسر بوت۔ پہ ایشی باید انت کہ پہ اوگانستانئ سیکورٹئ کارکنوکان و ووٹران باید انت کہ مبارکی داتگ بیت کہ بہ انچین خرابین حالاتان نہ تھانکا جمھوریت و کانونئ پرچم آ برز ساتنت بلکہ گون پورہ ئن ھمت و حوصلہ گون حالاتان مکابلہ کرتنت۔  بیدئ شک بہ ووٹنگ اسٹیشنانئ تھا ووٹرانی کچانہ کم ات۔ اوگانستانئ آباتی بہ سہ و نیم کرور مردمئ کچانہ انت کہ شہ آوان کم شہ کم یک کرور مردم راجستر بوتگین ووٹ دیوک انت۔ طالبانی حکومت بہ ۲۰۰۱ سالا الاس بوت و اولئ جمھورین حکومت بہ ۲۰۰۴ سالا قائم بوت شہ آ وھدہ تہ نون بہ آ مُلکئ تھا چار وار گیچئن کاری تسر بوتگنت۔
ای واری بہ پولنگ اسٹشنان ووٹ دیوکانی کچانہ بہ برزین کچانہ کم بوتگیت۔ کچانہ جتگ بوتہ کہ ۲۵ لکھ مردم ووٹ داتگنت۔ درا بیت کہ اوگانستانئ نونین حالات بہ برزین کچانہ ناسازگار انت۔ طالبان بیدئ ایشی ھم گیچئن کاریان و جمھوریت آ پسند نہ کننت و اوگانستانئ نونین آئینا نہ مننت و لوٹوک انت کہ شہ تشدد راہ اقتدارا بہ دستا بگرنت۔ دیم شہ ایشی ھم آوان وتی ناوشنودی آ گون اخطاران دیم شہ گیچئن کاریان درا کرتنت و ھمی وڑا گون دھشت گردین ھلگران وتی ای عزم آ درا کرتنت۔ گئوستگین سالئ آخر سرا وھدہ کہ بہ آمریکہ و طالبانی نیاما امن و امانئ بھرا گپ و تران بناہ بوتنت طالب اوگانستانئ حکومتئ کوت گرگا بری گپ و ترانان ھیچ وڑئ نہ منتنت۔ پہ چہ کہ آوان ھیچ امن و امانئ قائم کنگئ کٹا نہ انت شہ ای وجا اشرف غنی ھر پیشنھادئ را پروش داتنت۔ حکومت جنگبندئ لوٹگا دیما کرت و یک نیگین جنگبندی آ نافذ کنگئ جارا جت و آی را عملی کنگئ کوشستا ھم کرت مگہ ای کوشست یک نیمگ ثابت بوت۔
بہر حال بیدئ اوگانستانئ حکومتئ شمولیت آ بہ آمریکہ و طالبانی نیاما گپ و ترانئ چُنتی دورہ تسر بوتنت و تہ ای حد کہ آوان بہ یک معاھدہ سرا تپاک کنگا ھم اتنت مگہ آمریکہ جمھورین سدر ٹرامپ شہ  طالبانی بعض نامعقول ئن رویہ وجا ای گپ و ترانانی پورہ ئن دورہ مسترد کرتنت۔ بہ آ  نیمگا اوگانستانئ جمھورین سدرئ گیچئن کاریانی جار ھم جتگ بوتہ۔ گیچئن کاری گون کمی تاخیر ا تسر بوتنت۔ طالبانی ھلگر بہ گپ و ترانئ وھدہ ھم بند نہ بوتنت۔ مگہ آوانی یک نشانہ ایش ھم ات کہ ووٹر متاثر بوتہ بہ گیچئن کاریانی تھا کوت مہ گرنت۔ بہ گیچئن کارئ دیوان و ریلیانی سرا ھم ھلگر بوت گیچئن کاریانی کاندین ھم نشانہ گپتگ بوتنت۔ ھمی وھدان حالات تہ ای حد خراب بوتنت کہ مُچین بہ شکا اتنت کہ گیچئن کاری آخرا تسر  بنت یا نہ۔ مگہ بہر حال بہ گئوستگین ھپتگئ تھا سرئ طالب و آی ایس ھلگران و گیر یقینی حالاتان گیچئن کاری بہ اوگانستانئ تھا تسر بوتنت۔
بیدئ شک ووٹ دیوکانی کچانہ کم ات مگہ باید انت کہ صورتحال ا شہ ای نظرا گیندنت کہ بنیادمین حکان و جمھوریتئ حلاپئ عناصر امنئ مُچین راھانا پہ ھما مردمئ کہ بہ جمھوریتئ راھ رادگ اتنت آنا بند کنگئ کوشستا کرت۔ تھانکا توپک و تیر و وت کُشین بمانی خوف نہ ات بلکہ عملا تیر و تیر ریچی رادگ ات۔ بہ ھمی وھدہ ھما مردمئ کہ جمھوریتئ راھ گیچئن کرتنت و گون خطران جنگ کرتہ شہ وتی ووٹ دیگئ حکا کٹ گپتنت آوان ناممکن آ ممکن کرتگنت و باید انت کہ پہ آوان مبارکی داتگ بیت۔ بازین مردمئ وترا بری گیچئن کاریانی تھا کاندید کرتگنت مگہ اصلین مکابلہ بہ ڈاکٹر اشرف غنی و عبداللہ عبداللہ نیاما انت۔ ای دوکین کاندید شہ ھمی نون ای دعوا بناہ کرتگنت کہ آوان اکثریت آ گرگا بنت۔ مگہ مُچی پہ قطعین نتیجہ چمبراہ انت۔ ووٹ دیوک وتی ووٹانا دیما کرتگنت مگہ پہ آوانی ووٹ و لوٹگان احترام بیت؟ مزنتری سوج نون امیش انت پہ چہ کہ اگہ ما پکر کننت کہ حالات بہ اوگانستانئ تھا نون نرمال انت یا بہ نزیکین وھدہ نرمال بنت ای شہ حکیکتا چما بند کنگئ برابیرا انت۔ جنگ زدہ و تباھ حالین اوگانستان عالمین براسدارئ توجہ آ پہ کار داریت۔