سرگال:معیشت ائے شعبہ اندرا دی پؤج ائے عمل؟

نی ایں روش آں پاکستان ائے سؤداگری او سیاسی دُھر آنی نیمگا یک بحث جُزغیں کہ چھے پاکستانی پؤج نی معاشی کار آنی اندرا ضرورت آژ گیش دل لوٹھی گرغیں او چھے پاکستان ائے نی ایں ردیں بیسغیں اقتصادی حالت آنر وشتر کھنغ آپا ھِچھ خاصیں کار کھُزی آ رؤغیں۔نی آژ چند ماہ سرا عمران خان ائے یک نوخیں ترقی کونسل ٹھائینتھی آ شزغئے سا تہ آنہی آ پاکستان ائے آرمی چیف جنرل قمرجاوید باجوا آر یک رسمی ایں باسک ائے وڑا اوار کھُزغئے سا ۔ہماں وخت آ دی

سیاسی دُھر آنی نیمگا یک سوال کھڑو بیسغئے سا کہ خالص اقتصادی ترقی آپا ٹھائینتھی ایں ھِچھ

ادارہ آ پؤجی جنرل ائے چھے کار انت؟بہر حال پاکستان ائے ہماں کہ سسٹم رہسا آنہی آ پؤج ائے عمل تہ سری ایں روش آژ پدھر ایں ۔پؤج پاکستان ائے سجوں آنژ مزن ایں طاغتور ادارہ ایں ہماں

کہ ملک ائے ڈن ائے پالیسی او سیکیورتی ائے بارو آ کار آنی چکا کنترول کھنت ،ہمیں خاطرہ اگر

آنہی دائیرہ کار آ گیش کھُزی آ شُزا تہ آنہی آ حیران بی اغ ائے ھچھ ٹؤک نوی۔مگہ نی ایں روش آنی

اندرا سیاسی او سؤداگری دھُر آنی نیمگا ہمیں ٹؤک ائے باز چرچہ ایں کہ آرمی سروک جنرل باجوا

آ نی ایں روش آں سؤداگری دھُر آنی مزن ایں لیڈر آنگو بیٹھک کھُزااو آنہاں نی پھجی آ معیشت آر

وشتر کھنغ ائے گُمان آنی چکا داس گپت کھُزئی۔زرائیع آنی روگا ہمیں وڑ ائے ہمیں سال سئے بیٹھک بیسغاں ۔اے بیٹھک کراچی آ پؤجی دپتر او راولپنڈی آ پؤجی ہیڈ کوارتر آ بیسغاں۔گیر بی کہ

کراچی پاکستان ائے اقتصادی بُنجہ ایں۔تفصیل اے ڈسسی آ رؤغیں کہ پؤج او سؤداگری دھُر آنی نیمگا آپسی ایں بستگی قائیم بیسا او ہمیں وڑا بیٹھک آنی اہتمام بیسغئے سا۔جنرل باجوا سؤداگر لیڈر

آنژ اے زانغ آ باڑہ اسا کہ معیشت آ تھانگا وشتر کھنغ بیس بی او سرمایہ کار آنر سرمایہ کاری آپا

تھانگے گام زیرغ لوٹھاں ۔چنتی بیٹھک آنی اندرا چھی اے اہم فیصلہ دی بیسغاں۔باز فیصلہ اینگے

دی اساں ہماں ہاں نی بارو آ یک دم سرکاری اپسر آنر حبر داسی آ شُزا او آنہی چکا عمل کھنغ ائے

ہدایت دی کھُزی آ شُزا۔ہماں زرائیع آ ہمیں اطلاع داسا آنہاں ھچھ خاصیں مثال ناسا مگہ اے ضرور

گوشتیش کہ جنرل باجوا ہمیں ٹؤک آپا ضرور پکر کھنغیں کہ سؤداگری دھُر پکر کھنغاں ہمیں خاطرہ آنہاں نی اندرا باور پیدا کھنغ آپا کوشست درکار ایں۔ہمیں حبر آنی حوالہ آژ ہماں وخت یک

پؤجی نمائیندگ آژ پھول کھُزی آ شُزا تہ آنہی آ ھچھ وڑ ائے تبصرہ کھنغ آژ انکار کھُزا،مگہ یک

بیٹھک اینگے دی بیسا ہمائی اندرا اقتصادی کار آنگو جُرسی ایں سرکاری اپسر او سؤداگر لیڈر

اوار اساں ۔اے بیٹھک گوستی ایں چھیار شمبھے آ بیسغئے سا۔عمران خان او پؤج ائے نیمگا باز

شَر ایں مفاہمت ایں چھے اے پوہ بی سی آ برؤ کہ اے مفاہمت ہمیں ٹؤک ائے پیش خیمہ ایں کہ آئیغ

والا ایں وخت آ پؤج اصل آ معیشت آر مستحکم کھنغ آپا گام اگا زیرغیں؟اقتصادی زانتکار او پیسر

ائے سٹی گروپ بینکر یوسف نظر ائے گُشغ ایں کہ سیکیورتی ائے بارو آ کار آنی چکا تہ پؤج آ

بالادستی ایں مگہ معیشت ائے شعبہ آ ودھسغیں دل لوٹھی یک وڑ ائے بغاوت ایں ہماں کہ جمہوری

عمل آنی آپا نیخیں فال نعیں۔