سرگال:ھِند ائے بنگلہ دیش ائے پھجی آ مضبوط بیسغیں سیالداری

بنگلہ دیش ائے سروزیر شیخ حسینہ ائے ھِندوستان ائے نی ایں دؤرہ سیاسی اوسفارتی ڈؤل آگو باز خاصیں ایں۔ہمیں دؤرہ ائے بنیاتی ایں مقصد گوستی ایں ہپتغ نوخیں دلی آ عالمی معاشی فورم ائے سروک آنی بیٹھک ائے نیمگا بنگلہ دیش آ سرمایہ کاری ائے موقع آنر پیدا کھنغ اسا  گُڈا دی ہمیں دؤرہ ائے نیمگا ہماں کہ منغ نامہ بیسا او ہماں کہ مشترکہ جار جھزی آ شُزا آنہی آژ صاف پدھر بی
کہ ہڑ دوکین ملک آں سیال داری آ مضبوط کھنغ آپا چُنتی گام گیج کھُزغاں ۔عالمی معاشی فورم ائے
اجلاس آگو وتی گشتانگ آ سر وزیر نریندر مودی آ بنگلہ دیش ائے لیدر آنی وشادگی کھُزؤ گوشتا
کہ ھند او بنگلہ دیش ائے نیمگا سنگتداری ائے مقصد ہڑ دوکین ملک آنی عوام ائے ود او ترقی او
وشحالی آ باور دؤخ کھنغ ایں ۔ہمیں بارو آ آنہی آ نوہ پروجیکٹ آنی حوالہ داسا ہمائی آ نوخیں دلی او
ڈھاکہ آ گوستی ایں یک سال اندرا مِلسؤ بنا کھُزا۔آنہی آ گوشتا کہ آؤخیں روش آنی اندرا ہمیں
نوہ پروجیکٹ آنی اندرا سئے دیگر پروجیکٹ آنی گیشتری کھُزی آ برؤ۔ہڑدوکین ملک آں ایل پی جی
ائے سپلائی،پیشہ ور صلاحیت آنر گیش کھنغ او ڈھاکہ آ راما کرشنن مشن آ وویکا نند بھون ائے تعمیر ائے بارو آ منغ نامہ چکا دستخط کھُزغاں۔بنگلہ دیش آژ ھندوستان آ ایل پی جی ائے سپلائی ائے مقصد جال رودرات ریاست آ نغن پھاشینغ والا گیس ائے سپلائی آ وشتر کھنغ ایں۔یک دوہمی
پروجیکٹ ائے روگا ھند بنگلہ دیش پروفیشنل اسکل ڈیولپمنٹ انسٹی ٹیوٹ قائیم کھُزی آ رؤ ہمائی آژ
بنگلہ دیش ائے مڑدمی طاغت گیش کھنغ آ مدد بی۔ہڑ دوکین ملک آں دیگر ہپت منغ نامہ آنی چکا دی
دستخط کھُزغاں ہمائی آ ساحلی ھَند آنی نگرانی ،ھند جہاز آنی زریعہ چٹو گرام او مونگلا بندر گاہ آنی استعمال او تریپورہ ائے سپروم شہر آ ورغ ائے آف سپلائی کھنغ آپا فینی ندی آژ یک اعشاریہ
ہشت دو کیوسک آف ائے مِلغ آپا منغ نامہ اوار ایں۔فینی ندی ائے بارو آ منغ نامہ آژ تریپورہ ائے
سیمائی شہر آ ورغ ائے آف ائے سپلائی باز وشتر بی رؤ او ہماں ناوشی دی دیر بی ہماں کہ سال آنژ
جزغئے سا۔سیمائی دمغ آنی نگرانی ائے بارو آ منغ نامہ ائے تفصیل بیان کھُزؤ سرکاری زرائیع آ
ڈسسا کہ ہمیں منغ نامہ آژ ھند آ مشترکہ ساحلی جاگاہ آ نگرانی کھنغ والا رڈار یونٹ او بنیاتی ایں
خاکہ ایئ قیام ائے اجازت مِلی برؤ ہمائی آژ ہڑ دوکین ملک آنی مشترکہ ساحلی دمغ آنر شَر ایں
نگرانی بیس بی۔ویچار کھُزی آ رؤغیں کہ ہمیں وڑ ائے نزیخ بیست یونٹ قائیم کھُزی آ برواں ہماں
کہ ساحلی جاگاہ آنی وشتر ڈؤل آگو نگرانی کھُز کھناں۔سروزیر شیخ حسینہ آ وتی گشتناگ آ گوشتا کہ
آنہی ملک یک ترقی پزیر سیکیولر ملک ایں ہماں کہ اے وخت روہنگیا پناہ گزین آنی مسلہ آ دیما کھنغیں آنہی آ ھند آژ اپیل کھُزا کہ آں ہمیں روہنگیا باہوٹ آنی میانما رخائین صوبہ آ آنہاں نی گڑدغ
آ مدد کھنت۔امیت ایں کہ بنگلہ دیش آؤخیں بی اغ والا ایں آسیان سروک آنی بیٹھک آ روہنگیا پناہ گزین آنی مسلہ کھڑو کھنت ۔دووٹی ایں گپتران آ پھدا بانکھ شیخ حسینہ آ آؤخیں سال بنگ بدھو شیخ
مجیب الرحمان ائے سد می پیدا بی اغ ائے روش ائے تقریب آ بہر گرغ آپا سروزیر نریندر مودی آ
بنگلہ دیش آئیغ ائے کانڈھ داسا  ہمائی آ سروزیر آ منسا ۔