سرگال:کاش پاکستان،بنگلہ دیش آژ ۔چھی اے سبق زُڑتھ

برز آسیائی ملک آنی اندرا بنگلہ دیش اقتصادی ترقی ائے ڈؤل آژ ہماں تیزی آگو اگا بی غیں،آں دیگر ملک آنی آپا قابل رشک ایں۔چند دھائی سرا ائے اگر ٹؤک کھُزی آ برؤ تہ بنگلہ دیش سَک غریو ملک اسا مگن نی آں راست ایں معنی آ اقتصادی ترقی ائے دگ چکا جُزغیں۔آنہی ترقی ائے شرح ائے اٹکل جزوخیں او اگی ایں سال آپا ہشت پیصد ائے غیں او فی کس آمدنی ۲۰۰۰ ڈالر
ائے بقدر ایں ۔ہمیں ٹؤک ائے دی اشارہ مِلغاں کہ اے وخت امریکہ او چین ائے نیمگا ہماں کہ سؤداگری ناوشی جزغیں،آنہی نپ او کھٹ دی بنگلہ دیش آ پُجھسا۔آنہی درآمد ائے حجم ۲۰۱۸ آ
ہموزا شش اعشاریہ ہپت پیصد اسا ہموزا ہمیں سال دھ اعشاریہ یک پیصد ائے نزیخ بیسا۔آنہی دیم
روی آسیائی ملک آنی اندرا یک مثال ایں ۔بنگلہ دیش ائے نی ایں حالت آ دیستؤ آنہی براوری پاکستان
آگو کھنغ یک عجیو ایں عمل بی۔مگہ ایزا پاکستان او بنگلہ دیش ائے زکر یک پھجی آ کھنغ ائے مقصد اش انت کہ پاکستان ائے استیبلشمنٹ آ اے گیر کھنائینغ ایں کہ اے ملک کھدیں پاکستان ائے
بہر اسا او رودرات پاکستان اسا ۔مگہ پاکستان ائے بیسؤ دی آنہی آر ہماں حیثیت مِلسی آ نیا ہماں کہ
رونشت پاکستان ائے اسا۔رودرات پاکستان ائے مڑدم آنر پاکستانی حاکم کمتر پوہ بیس گام گام چکا
آنہاںر بُنا کھُزی آ شُز ایزا تکا کہ ۱۹۷۰ ائے عامین گچین کاری بیسا او رودرات پارٹی عوامی لیگ
آ قومی اسمبلی ائے سجوں آنژ گیش سیٹ کھٹسگاں تہ آنہی آ سروکی دئے اغ تہ دیر ائے ٹؤک،اُلٹا
آنہی سروک شیخ مجیب الارحمن آ غدار منسؤ جیل آ ماکھُزی آ شُزا او رودرات پاکستان آ آرمی کریک ڈاؤن  کھُزؤ لکھیں شہری آنر فنا کھُزی آ شُزا۔پدھر ایں آنہی درا بیسغیں نتیجہ اے بیس بی کہ
ہموزا ائے مڑدم یک ظالم او جابر پؤج او آنہی کمانڈر آنژ چھُٹاں ۔ایکا رودرات پاکستان ،باقی بھچسی ایں چھیار صوبہ آنی آباتی آژ دی مزن اسا۔۱۹۷۱ آ آں پاکستان آژ جتا بیسا او بنگلہ دیش ائے
نام آژ یک نوخیں آجو او ود مختار ملک وجوت آ آتکا۔جمہوریت تہ پاکستان آ راست ایں معنی آ کھدیں آتکا دی نہ ہمیں خاطرہ رونشت پاکستان دی پؤجی سروک آنی قوضہ آ رہسا۔نی چوش کہ گُشغ
آ جمہوریت ایں مگہ گچین بیسغیں سرکار آنگو دی اصل ایں اختیار نوی آں۔طاغت ائے سرچشمہ پؤجی ہیڈ کوارتر ایں ہماں کہ راولپنڈی آ ایں۔ہمینگا کہ سرا گوشتی آ شُزا کہ بنگلہ دیش برز آسیا آ
اقتسادی ترقی ائے یک روژن مثال ایں او ہر شعبہ چکا خاصیں دھیان دئے غیں ،نی آنہی عکس دی
باز وشتر بیسا۔اگر پاکستان ائے حاکم آنر منفی ویچار او منفی سیاست ائے دائیرہ آژ درا درکھپتؤ چھی اے ویچار کھنغ ائے موقع مِلی تہ آں وتی ملک آژ جتا بی اغ والا ایں بہر ائے قِصو اُش کھنت،
آنہی چکا ویچار کھنت او گِندی کہ آنہی آ تھانگا ہمیختر ترقی کھُزا ۔آنہی آژ سِکھغ آپا باز چھی اے انت۔چھی اے سبق زُڑتھ