سرگال:پاکستان آ جمہوریت آپا گیش بیسغیں خطر

پاکستان آ جمہوریت ائے سوال بنگیج آژ ہی بحث ائے ٹک رہسا او سرا آژ اے سوال دی کھڑو بی غیں کہ آپا پاکستان ائے مڑدم ہماں وڑ ائے سیاسی تجربہ کھنغاں،آنہی آ جمہوریت ائے نام دئے اغ بیس بی یا نہ؟ہموزا چنتی اینگے عمل بیسغاں ہماں ہانر دیستؤ مان کھائے کہ جمہوریت استیں ،مثال
آ گچین کاری دی بی سرکار دی ٹھائینتھی آ رؤ او ہر شئے چھی اے روش آنی تکا راستی آ جُزی دی
مگہ سروکی ائے خاکہ چھی اے اینگے بی کہ گچین بیسغیں سرکار آ گو ہماں اختیار نوی آں ہماں کہ
جمہوریت آ بی آں ۔مثال آ ڈن ائے پالیسی چکا گچین بیسغیں نمائیندگ آگو ھچھ کنترول نوی ۔پھجی آ
اے دی مچھیں وڑا پدھر ایں کہ سیکیورتی ائے بارو آ کار آنژ سرکار آ سرا آژ دیر ایر کھُزی آ رؤ۔
اصل ایں طاغت پؤجی ہیڈ کوارتر ائے دست آ بی ہماں کہ راولپنڈی آ ایں ،اسلام آباد بنجہ ایں ۔ریاست ائے ھچھ دی ادارہ ہمیختر طاغت ایر نہ کھنت ہمیختر کہ پؤجی تلہ آنر ایں ۔اشی گون یک ٹؤکدیگر اش انت کہ پاکستان ائے تاریخ ائے کم او بیش نیم بہر چکا پؤج آ سدھائی آ حکومت کھُزا۔
کے ای دھکا پؤجی جنرل آں بغاوت کھُزا او سویلین سرکار آ بے دخل کھُزؤ سرکار چکا قوضہ کھُزا۔او مزن ایں مدت تکا عوام آر جمہوریت آژ محروم ایر کھُزیش۔سری ایں بغاوت ۱۹۵۸ آ پؤجی
فیلڈ مارشل ایوب خان آ کھُزغئے سا آنہی آ پھدا یک دوہمی جنرل یحی خان آ کمان سنبھالتھا ۔ہمیں
ہڑ دوکین جنرل آنی سروکی دوازد سال آنی تکا قائیم رہسا ۔۱۹۷۰ آ عامین گچین کاری بیسغئے سا۔
گچین کاری ائے نتیجہ رورات پاکستان ائے پارٹی عوامی لیگ ائے حق آ آتکغئے ساں مگہ آنہی آ
سروکی نہ داسی آ شُزا ہمیں خاطرہ رودرات پاکستان ائے پارٹی آ بغاوت کھُزا او ۱۹۷۱ آ آں پاکستان آژ آجو بیسا او یک نوخیں ود مختار ملک بنگلہ دیش ائے نام آژ وجوت آ آتکا۔ہماں دپ آ پھدا
امیت کھُزی آ شزغئے سا کہ نی پؤجی سیاست آژ دیر بی آں مگہ اے دی چھڑوئی آ دروغی ایں
ویچار ہی ثابت بیسا ۔۱۹۷۷ آ آرمی چیف جنرل ضیائالحق آ سروزیر زوالفقار علی بھٹو آ سروکی
آژ ہٹائینتھؤ وا سروکی چکا قوضہ کھُزؤ نشتغئے سا۔یازد سال آنژ دی گیش مدت تکا آں سروکی چکا
رہسا ۱۹۸۸ آ آں یک بالی گراب ائے دپ آ مڑتھا۔آنہی آ پھدا گچین کاری کے ای دھکا بیسا بینظیر بھتو او نواز شریف سروزیر بیسغاں مگہ کھسے دی دو ڈھائی سال آنژ گیش عرصہ تکا عہدہ چکا
نہ رہسا۔نواز شریف ۱۹۹۷ آ دوہمی دھکا سروزیر بیسا مگہ ۱۹۹۹ ائے آخیر آ آرمی چیف جنرل
مشرف آ آنہی آر سروکی آژ بے دخل کھُزا۔چھی اے عرصہ آ آنہی آ آنہی کنبہ ائے پھجی آ ملک
آژ درا کشتی آ شُزا او ۲۰۰۷ تکا ملک آژ دیر رہسا۔۲۰۰۷ آ جنرل مشرف ائے زوال شروع بیسا
قاضی آنی یک تحریک آ ہمینگے طوفان کھرو کھُزا کہ پؤجی تختہ اوندھو بیسا ۲۰۰۷ آ عامین
گچین کاری بی غی اسا مگہ بینظیر بھتو یک ترکغ آ جنجیسا۔گوشتی آ رؤ کہ دھشت گرد آں آنہی
آر کُشتا مگہ اصل ایں زمہ وار جنرل مشرف آ منسی آ رؤ،بہر حال ۲۰۰۸ ائے بنگیج آ عامین گچین کاری بیسا او پاکستان پیپلز پارٹی ائے سروکی آ سرکار قائیم بیسا۔ہماں سرکار آ پنچ سال آنی مدتکار
تہ پھیلو کھُزا مگہ سروزیر وتی مدت تکا ہمیں عہدہ چکا قائیم نہ رہسا۔آنہی آ پھدا گچین کاری بیسا
او سروکی امن آگو دوہمی پارٹی آ منتقل بیسا ۔گوستی ایں سال جولائی آ گچین کاری بیسا مگہ
پؤجی ٹولہ آ اے پسند نیا کہ نواز شریف ائے پارٹی سروکی آ بی بہر ھچھ وڑا گو پؤج وتی پسند
ائے سرکار ٹھائینغ آ سوب مند بیسا ۔پاکستان اندرا ہر شئے بیس بی ۔